Рæстæг дугъон бæхау тагъд лидзы размæ. Фараст азы рацыд, фыныфенæгау нын чи уыд, æнæнхъæлæджы цы цыбыр, фæлæ æвирхъау, уæззау хæсты цæхæры бахаудыстæм, уымæй. Нæ цæстыты раз ног æмæ ногæй сысты нæ пырх, дæрæн горæт, сæ иувæрсты ахизæнтæ кæмæн нал уыд, уыцы сыгъд, пырх хæдзæрттæ, змæст чъизи уынгтæ, сæ къалиутæ уынгты чи байтыдтой, уыцы хæстдзагъд бæлæстæ…
Абон Цхинвал уыцы Цхинвал нал у. Иу стæмтæй дарддæр пырх хæдзæртты бынæтты сырæзтысты ног, ноджы рæсугъддæр цæрæн хæдзæрттæ æндæр нысаниуæджы объекттæ. Сæ хуыз скалдтой иумиагахуырадон уагдæтты æмæ скъолайы агъоммæ кары уагдæтты бæстыхæйттæ. Ногæй та нæ горæты Театралон фæзуаты рафидауын кодта, æнæхъæн Кавказы дæр æмбал кæмæн нæй, нæ адæмы культурон царды ахсджиаг нысаниуæг кæмæн ис, уыцы объект – Хетæгкаты Къостайы номыл Хуссар Ирыстоны паддзахадон драмон театры бæстыхай. Ныртæккæ уымæн куыд йæ алыварс территори, афтæ фæзуат йæхæдæг дæр хæрзарæзт цæуы æмæ та рæхджы нæ горæты цæрджытæ æмæ йæ уазджытæн дæр суыдзæн сæ уарзондæр ирхæфсæн бынат.
Ацы аз стыр лæвар æнхъæлмæ кæсы нæ республикæйы студентон фæсивæдмæ дæр – арæзт цæуы æмæ эксплуатацимæ лæвæрд хъуамæ æрцæуа Хуссар Ирыстоны паддзахадон университеты ног комплекс, цыран æппæт уавæртæ дæр уыдзæн гъæдджын уæлдæр ахуырад райсынæн.
Нæ горæты нын сæ аивдзинадæй бирæ фæрæсугъддæр кодтой ног спортивон, базарадон, сæудæджерадон, административон бæстыхæйттæ. Нæ цæрджытæ сæ фидæныл æууæндын кæй райдыдтой, ууыл дзурæг у уый дæр æмæ бирæтæ сæ хæдзæртты сæхи тыхтæй кæй аразынц, цалцæг кæнынц. Ахæм нывтæ нæ горæты уынгты цæугæйæ, бирæ фенæн ис.
Æппæт уыдæттæ, æнæмæнгдæр, хорзæрдæм æндавынц нæ горæты иумæйаг бакастыл, йæ рæсугъддзинадыл, фæлæ ууыл уæддæр тынгдæр æндавынц, æрвылбон машинæтыл, фистæгæй кæуыл цæуæм, уыцы хæрзарæзт уынгтæ. Ахæм уынгтæ азæй азмæ бирæ фылдæр кæнынц æмæ ныр, зæгъæн ис, йæ сæйраг уынгтæ, стæй бирæ æндæр уынгтæ дæр цал-цæг, хæрзарæзт кæй æрцыдысты. Ацы аз дæр уыдонмæ бафтдзæн ноджыдæр 13 уынджы. Уыдонæй иутæ ныридæгæн арæзт фесты, иннæ уынгты та куыстытæ сты сæ тæмæны. Уыцы уынгтæй сæ иу у Колыты Аксойы уынг. Ацы уынджы цæрджытæ рагæй тыхстысты йæ мæгуырау уавæрæй. Стæй æрмæст цæрджытæ нæ, фæлæ ма ацы уынджы кæрон сты иуæндæсæм астæуккаг скъола, аивæдты паддзахадон лицей æмæ сывæл-лæтты рæвдауæндон. Гъе æмæ ардæм цæугæйæ, куыд сывæллæттæ, афтæ сæ ныййарджытæ дæр æвзæрстой зындзинæдтæ. Ныртæккæ дзы арæзтадон куыстытæ кæй кæнынц, уымæ гæсгæ йыл машинæтæ нæ цæуынц, æгæрыстæмæй, дзы фистæгæй цæуджытæн дæр зын у ахизын. Фæлæ тагъд рæстæджы рæсугъд, хæрзарæзт уынджы кæй цæудзысты, уыцы æхцон хъуыдыимæ райгондæй кæсынц фæндаг аразджыты архайдмæ.
Ныртæккæ ам баконд æрцыдысты канализацион æмæ хæдзæрттæм донуадзæн куыстытæ. Арæзт цæуынц тротуартæ. Кусджытæ куыд зæгъынц, афтæмæй ист æрцæудзæн фæндаджы уæлцъар, уый фæстæ дзы ныккалдзысты хуыр æмæ йæ бацæттæ кæндзысты асфальтмæ æмæ сæххæст уыдзæн рæхджы ацы уынгыл цы бирæ цæуджытæ ис, уыдоны бæллиц.
Уадз, рæзæт, рæсугъддæр кæнæт нæ уарзон Цхинвал, нæ уарзон республикæ. Йæ цæрджытæ сæ ногдæр историйы цы фыдæвзарæнтæ, хъизæмæрттæ бавзæрстой, уыдон фæстæмæ макуыуал раздæхæт, баззайæд историйы æмæ сæ нæ зæрдыл дарæм. Цы цардарæзты фæндагыл лæуд стæм, ууыл та цæуæм фæндвидарæй нæ ныфсджын стыр Уæрæсеимæ иумæ.
Бестауты Валя
Comments are closed, but trackbacks and pingbacks are open.