Президент Тыбылты Леонид знон Фæсарæйнаг хъуыдæгты министрады колективы базонгæ кодта сæ ног къухдариуæггæнæг Джиоты Муратимæ. Уый раздæр уыди Фæсконфликтон бæстонкæнынады фарстыты фæдыл Республикæ Хуссар Ирыстоны Президенты Æххæстбарджын минæвар.

Тыбылты Леонид базонгæ кодта æттагполитикон ведомствойы коллективы æмбæлон барамындимæ, æмæ банысан кодта Джиоты Мураты бæрзонд профессионализ. «Джиоты Мурат у нæ æрыгон республикæйы бындурæвæрджытæй иу. Æмæ уый Хуссар Ирыстонæн цы хæрзты бацыд, уыдон бацæудзысты историмæ», — загъта бæстæйы сæргълæууæг.

Президент равдыста йе ‘ууæнк, ног снысангонд министр кæй фæтых уыдзæн, ведомствойы раз цы скъуддзаггæнинаг фарстытæ ис, уыдонæн се ‘ппæтыл дæр. «Йæ архайды дæргъы Джиоты Мурат йæхи равдыста куыд æцæг дипломат æмæ патриот, Женевæйаг дискусситы фæзуатыл нæ республикæйы интерестæн æвдисæн æмæ хъахъæнæг уæвгæйæ. Уый хорз зонгæ у ведомствойы архайдимæ, æмæ йын зын нæ уыдзæн фыццаг бонтæй фæстæмæ куыстмæ æрæмхиц уæвын», — загъта Президент.

Йæхи рады, Джиоты Мурат дæр банысан кодта, зæгъгæ, хорз зонгæ у коллективимæ, уымæн æмæ Фæсарæйнаг хъуыддæгты министрады кусджытæ  хицæн кæнынц сæ куыстхомдзинад æмæ профессинализмæй.

Президенты Администрацийы къухдариуæггæнæг Джиоты Алан дæр, йæхи рады, раарфæ кодта Джиоты Муратæн бæрнон куыстмæ нысан кæй æрцыд, уый тыххæй, æмæ йын загъта дарддæры  æнтыстыты фæндиæгтæ. «Республикæ Хуссар Ирыстон Президент Тыбылты Леониды разамындæй уадзы хъуыдыгонд æттагон политикæ, æмæ уый хъæуы адарддæр кæнын. Фидарæй æууæндын, Джиоты Мурат йæ хъæздыг фæлтæрддзинад æмæ зонадон ахастæй йæ хайбавæрд кæй бахæсдзæн, цы бирæ скъуыддзаггæнинаг фарстытæ дзы ис, уыдон сæраппонд», — загъта Джиоты Алан.

Comments are closed, but trackbacks and pingbacks are open.