РХИ-йы Президент Тыбылты Леонид лæууыд, Республикæ Цæгат Ирыстон-Аланимæ æрцæуæг делегацийы сæргъ, цыран ацыдысты æвзæрстытæ æмæ республикæйы Сæргълæууæджы бынатмæ бахизынæн цытджын церемони.

Хуссарирыстойнаг паддзахады сæргълæууæг раарфæ кодта Битарты Вячеславæн, Цæгат Ирыстоны Сæргълæууæджы бынатмæ æвзæрст кæй æрцыд, уый сæраппонд. Йæ раныхасы Тыбылты Леонид банысан кодта республикæйæн Битарты Вячеславы сæвзæрсты нысаниуæг.

«Зынаргъ хæлæрттæ! Цытджын Вячеслав Землимханы фырт!

Абон ацы диссаджы рæсугъд залы нысан цæуы ахсджиаг историон цау  Республикæ Цæгат Ирыстон райсдзæн ног Сæргълæууæджы», — загъта Тыбылты Леонид.

Хуссар Ирыстоны Президент банысан кодта, зæгъгæ, Республикæ Цæгат Ирыстон-Аланийы уæлдæр Паддзахадон бынатмæ снысан кæнын у ирд æвдисæн Битарты Вячеславæн кад кæнын æмæ йыл æууæнк бафтауынæн.

«Уый у ды æмæ дæ командæ чысыл æмгъуыдмæ Уæрæсейы Федерацийæн уæззау экономикон уавæрты цы куыст бакодтат, уымæн стыр аргъ скæнын. Уыцы рæстæджы ды дæхи равдыстай принципиалон къухдариуæггæнæгæй, кæцыйæн йæ бон у ахсджиаг фарстытæ скъуыддзаг кæнын, республикæйы цæрджыты интерестæ фæдфæдылонæй хъахъхъæнын», — дарддæр загъта уый.

Тыбылты Леонид банысан кодта, зæгъгæ, республикæйы Сæргълæууæг уæвын у стыр бæрндзинад, уымæн æмæ адæм æнхъæлмæ кæсынц царды гъæд реалонæй фæбæрзонддæр кæнынмæ, стабилон куыстмæ æмæ аккаг куыстмыздмæ, гъæдджын медицинæ æмæ ахуырадмæ.

«Дæ хæс у, уыдон цæмæ æнхъæлмæ кæсынц, уыцы ныфсыты аккаг разынын, кадимæ республикæйы Сæргълæууæджы бæрзонд ном хæссын», — загъта уый йæ цæгатирыстойнаг коллегæйæн.

Республикæ Хуссар Ирыстоны Президент загъта ахæм ныфсдзинад, зæгъгæ, республикæйы ногсæвзаргæ Сæргълæууæг разындзæн закъондæттынадон хицауиуæгады минæвæртты æмæ республикæйы æппæт цæрджыты æууæнчы аккаг, равдисдзæн йæ иууыл хуыздæр хъуыддагон æмæ адæймагон миниуджытæ Республикæ Цæгат Ирыстон-Аланийы хæрзиуæгæн, йæ къухты бафтдзæн регионы къухдариуæггæнæджы сæйраг хæс — цæрджыты царды æмвæзад æмæ гъæд бæрзонддæр кæнын, социалон стабилондзинад.

Йæ раныхасы уый загъта ахæм ныфс, зæгъгæ, республикæйы цæрджытæ рахæцдзысты ног сæргълæууæджы æвварс йæ архайды.

«Дæуæн кæддæриддæр дæ бон уыдзæн ныфс æвæрай Хуссар Ирыстоны адæмæй, сæрмагондæй, ме ‘ххуысæй. Мах стæм иу адæм, ис нын иу хъысмæт, — баныфсæвæрдта Тыбылты Леонид. — Æхсызгонæй банысан кæндзынæн уый æмæ Республикæ Хуссар Ирыстоны интеграцион бастдзинæдтæ Республикæ Цæгат Ирыстон-Аланиимæ кæй сты тыхджын. Ныфс мæ ис сымахимæ иумæ мах ныфсджынæй кæй кæсдзыстæм нæ иумæйаг фидæн-мæ».

Йæ раныхасы кæрон Тыбылты Леонид ноджыдæр раарфæ кодта Битарты Вячеславæн РЦИ-Аланийы Сæргълæууæгæй æвзæрст кæй æрцыд, уый тыххæй.

«Зынаргъ Вячеслав Зелимханы фырт! Ацы зæрдылдарæн боны зæрдæбынæй арфæ кæнын дæуæн Республикæ Цæгат Ирыстон-Аланийы Сæргълæууæгæй фидар кæй æрцыдтæ, уый тыххæй. Мæ цæст дын уарзы фидар æнæниздзинад, фæрныгад, æвидигæ тых æмæ ног æнтыстытæ дæ куысты Ирыстоны дидинрафтыдæн, Стыр Уæрæсейы хъомысадæн», — загъта Тыбылты Леонид.

Цæгат Ирыстоны Сæргълæууæг Битарты Вячеслав ард бахордта республикæйы Парламенты раз. Йæ текст ын бакаст уырыссаг æмæ ирон æвзæгтыл. Битарты Вячеслав ныфс бавæрдта, кæй хъахъ-хъæндзæн бæстæйы æмæ регионы Конституци,  кæй аргъ кæндзæн æмæ кæй хъахъхъæндзæн адæймаджы бартæ æмæ сæрибардзинæдтæ, кæй фидардæр кæндзæн паддзахаддзинад æмæ Цæгат Ирыстоны адæмæн æнувыдæй кæй лæггад кæндзæн.

 

Республикæ Хуссар Ирыстоны

 Президенты официалон сайт

Comments are closed, but trackbacks and pingbacks are open.