Хуссар Ирыстоны уагъд æрцыдысты практикон æхстæй «карабин»-ы дисциплинæйы дыууæ турниры РХИ-йы Президенты Кубок æмæ дунеон ерыстæ. Хайад сæ райстой дунейы 12 бæстæйæ 60 спортсмены бæрц. Ерыстæ сæхгæныны æмæ йын йæ уæлахиздзаутæ æмæ призерты схорзæхджын кæныны церемони уагъд æрцыд спорты галуан «Олимп»-ы.
Йæ райдианы æрæмбырдуæвджыты раз раныхас кодтой «УФ-йы практион æхсты федераци»-йы вице-президент Антон Назаров æмæ «Санкт-Петербурджы практикон æхсты федерацийы совет»-ы сæрдар Æлборты Алан.
Ацы дыууæ нæлгоймаджы РХИ-йы практикон æхсты размæцыдмæ стыр хайбавæрд кæй бахастой, уый тыххæй сæ президенты номæй схорзæхджын кодта паддзахады сæргълæууæджы уынаффæгæнæг Уанеты Владимир. Уымæй дарддæр ма сын майдантæ лæвæрд æрцыд Хъахъхъæнынады министрады номæй.
ФУТБОЛ
РХИ-йы столицæйы фембæлдысты Цхинвал æмæ Беслæны футболон командæтæ. Хъазт уагъд æрцыд РЦИ-Аланийы чемпионаты кæронбæттæн туры фæлгæтты. Кæй зæгъын æй хъæуы цхинвайлæгты фæндыд сæхи бынæттон спортуарзджыты раз рæсугъд хъазт акæнын. Уымæ гæсгæ фыццаг минуттæй стыр тыхтæй абырстой размæ. Ныхмæлæууæг командæйы кулдуары раз сывзæрын кодтой цалдæр хорз уавæры пурти бакъуырынæн, фæлæ-иу куы пурти кулдуары цурты атахт, куы та-иу уазджыты кулдуаргæс хорз ахъазыд. Афтæ уыд 20-æм минуты онг, цалынмæ фысымты размæбырсæг Джиоты Маратæн хыгъд байгом кæнын нæ бантыст, уæдмæ. Афтæмæй 1:0 хыгъдæй фæцис хъазты фыццаг æмбис. Фембæлды дыккаг хай цхинвайлæгтæ хуыздæр спайда кодтой пурти бакъуырынæн сын цы уавæртæ уыд, уыдонæй. Нырма дыууæ пуртийы бакъуырдта Зассеты Александр. Стæй та расгуыхт Тедеты Батрадз. Уазджытæн та сæ бон ссис дыууæ пурти бакъуырын. Афтæмæй цхинвайлаг командæ фæуæлахиз 4:2 хыгъдæй.
Банысан кæнын хъæуы уый дæр, æмæ хъазт Цхинвалы уагъд кæй æрцыд беслæйнаг командæйы минæвар Елбачиты Александры хъæппæрисæй, кæцы у дзауаг, фæлæ йæхæдæг дæр æмæ ма йæ хъомылгæнинæгтæй цалдæрæй хъазынц «Беслæн»-ы командæйы сконды.
УÆГЪДИБАР ХЪÆБЫСХÆСТ
Хуссарирыстойнаг спортсментæ 5 майданы рамбылдтой уæгъдибар хъæбысхæстæй Дзæуджыхъæуы уагъдцæуæг турнир «Олимпийские надежды»-йы, зæгъгæ. Ерысты 71 кг уæзы категорийы фæуæлахиз Коцты Арсен. Уый акодта 5 тохы. Ноджы ма иу сыгъзæрин майдан бафтыд Хуыбиаты Асаны къухты. Уый 42 кг уæзы категорийы финалы тыхджындæр разынд иннæ хуссарирыстойнаг богал Санахъоты Аленæй, кæцы ссис дыккаг. 65 кг уæзы категорийы ма дыккаг бынат бацахста Сидамонты Артур. Бронзæйон призер ма сис Пухаты Роланд. Уый та хæцыд 80 кг уæзы категорийы.
ХУРИТЫ Батрадз
