Теннис

Хуссарирыстойнаг спортсментæ æртæ бронзæ майданы рамбылдтой стъолы теннисæй Цæгат Кавказы Федералон зылды чемпионаты. Ерыстæ уагъд цыдысты Налцыччы. РЦИ-Аланийы æмбырдгонды сконды командон ерысты бронзæйон призер ссис Бекъойты Эдвард. Дыууæ хатты та пьедесталы æртыккаг къæпхæнмæ схызт Елбачиты Иринæ. Уымæн та ахæм æнтыстытæ йæ къухты бафтыдысты къæйтты æмæ æмхæццæ къæйтты ‘хсæн ерысты. Уый тыххæй хъусын кæны Уæлдæр спортивон дæсныйады скъолайы тренер Джиоты Мириан.

«Раст зæгъгæйæ, хуыздæр бæрæггæнæнтæм æнхъæлмæ кастæн, фæлæ нæм кæмдæр спортивон амонд нæ бахудт», – банысан кодта Джиоты Мириан.

Уæгъдибар хъæбысхæст

Хуссар Ирыстоны минæвæрттæн иу сыгъзæрин æмæ иу æвзист майдан рамбулын бантыст уæгъдибар хъæбысхæстæй, 21 азы онг кæуыл цæуы, уыцы спортсменты ‘хсæн РЦИ-Аланийы чемпионаты. 79 кг уæзы категорийы аккаг ныхмæлæууæг нæ разынд Джиоты Артурæн. Финалы уый фæуæлахиз Андиаты Сосланы номыл спортивон скъолайы хъомылгæнинаг Хуыбиаты Ибрагимыл.

Тренер Коцты Тамерланы иннæ хъомылгæнинаг Цхуырбаты Артем та дыккаг ссис 74 кг уæзы категорийы.

***

26-29 январы Красноярскы уагъд æрцæудзæн уæгъдибар хъæбысхæстæй дунеон турнир «Иван Ярыгин – 2023». Уым иууыл уæззаудæр уæзы категорийы (125 кг) йæ тыхтæ фæлвардзæн цхинвайлаг Бестауты Андрейимæ. Æдæппæтæй ерысты архайдзысты Ирыстоны хъæбысхæсты 39 хъомылгæнинаджы.

ХУРИТЫ Батрадз