Æхсæнадон Экологон организаци «Зеленая Алания» сывæллæтты иу къорды баулæфын кодта Чъехы хъæуы цы экологон парк арæзт æрцыд, уым.
Организацийы сæргълæууæг Габайты Залинæ куыд зæгъы, афтæмæй: «Сывæллæттæ æрмæст улæфгæ нæ бакодтой. Æрдзы хъæбысы уыдон сарæзтой зиу – бафснайдтой, хистæртæ сæ фæстæ цы бырæттæ ныууадзынц æрдзы хъæбысы, уыдон. Мах ма уагътам экологийы темæйыл беседæтæ дæр сы-вæллæттимæ. Уыдон се ‘нæразыдзинад æвдыстой, мæсты кодтой, хистæр кары адæймæгтæй бирæтæ нæ иумæйаг бæстæ – Ирыстоны экологийыл кæй нæ аудынц. Сæхицæй та дзырдтой, аудгæ ахаст кæй дардзысты нæ æрдзы сыгъдæгдзинадмæ. Сывæллæттæ бирæ нæ уыдысты, сæйраджыдæр, уыдысты эколо-гон æхсæнады чи ис, ахæм бинонтæй. Нæ сæйраг хæс уыд сывæллæтты æрдз уарзыныл сахуыр кæнын, йæ хъахъхъæнынмæ сæ сразæнгард кæнын æмæ нын бантыст. Дарддæр дæр нæ зæрды ис ахæм акцитæ уадзын».
«Зеленая Алания»-йæн Чъехы хъæуы сæрмæ цы 70 гектары зæххы фадыг ис, уый рахицæн кодта Республикæйы хицауад дыууæ азы размæ, цæмæй уым саразой экологон парк. Ам цадæггай садзынц бæлæстæ æмæ хосгæнæн зайæгойтæ. Бæлæсты мыггæгтæ сын рахицæн кодтой сæ уæрæсейаг колле-гæтæ. Экопарк аразынæн ма сын баххуыс кодта Абхазы Республикæ дæр.
Габайты Залинæ æмæ ацы æхсæнады уæнгтæй цалдæр ивгъуыд азы уыдысты Абхазы ботаникон дыргъдоны. Уыдон уым фæлтæрддзинад райстой, куыд зилын хъæуы æмæ ботаникон дыргъдоны цы уавæртæ хъуамæ арæзт уа, уый фæдыл.
«Ныртæккæ дуне лæууы экологон катастрофæйы къæсæрыл. Уымæ гæсгæ æгас дунейы уадзынц эко-логон акцитæ. Уæрæсейы цы егъау æхсæнад ис «Кедры России», уый кусы сæрмагонд проектыл. Лæварæй дæттынц, сæхæдæг цы бæлæсты мыггæгтæ схъомыл кæнынц, уыдон. Махæн дæр хорз ахастытæ ис семæ. Фарон нын уыдон æрæрвыстой 300 сыбыраг кедры талатæ. Ацы бæлæстæ нымад цæуынц пайдайагыл, уымæн æмæ сыгъдæг кæнынц уæлдæф. Экопаркы активисттæ баххуыс кодтой уыцы талатæ садзынæн, ныссагътой дзы 100 талайы бæрц, иннæтæ радтой горæты мэримæ. Кедртæ сагъд æрцыдысты Хуыбылты Валерийы номыл Стыр парчы, афтæ ма скъолатæ æмæ сабиты рæвдауæндæтты кæртыты. Махæн æдзухон бастдзинад ис нæ уæрæсейаг коллегæтимæ. Ныфс нæ ис, кæдфæнды дæр нын ног талатæ кæй æрæрвитдзысты», – дзырдта Залинæ.
Уазæгты Марфа
