Спорт

ФУТБОЛ

Кæронмæ бахæццæ сты футболæй дунейы чемпионаты 3-æм туры хъæзтытæ. Сенсаци æрцыд къорд «F», цыран 2014 азы дунейы чемпион Германы командæ фæхæрд Хуссар Кореяйы командæйæн 2:0 хыгъдæй, афтæмæй йæ дæлкъорды бацахста фæстаг бынат æмæ нал ахызт финалы 1/8 хаймæ. Ацы къордæй ахызтысты Мексикæ æмæ Швецийы коман-дæтæ, кæцытæ фæстаг туры фембæлдысты кæрæдзиимæ. Хуыздæр ахъазыдысты шведæгтæ æмæ рамбылдтой 3:0 хыгъдæй. «E» къордæй рахызтысты Бразили æмæ Швейцарийы æмбырдгæндтæ. Бразилийæгтæ 2:0 хыгъдæй тыхджындæр уыдысты Сербийы командæйæ, Швейцари та Коста-Рикаимæ ахъазыд æмдыхæй  2:2. «G» къорды фыццаг æмæ дыккаг бынæттæ чи бацахсдзæн, уый бæрæг кодтой Бельги æмæ Англисы командæтæ. Ацы фембæлды фæуæлахиз Бельгийы командæ – 1:0. Ацы къорды иннæ хъазты та Тунис 2:1 хыгъдæй рамбылдта Панамæйы.

«H» къорды  Колумбия 1:0 хыгъдæй рамбылдта Сенегалы æмæ фыццаг бынатæй ахызт финалон хаймæ. Дыккаг хъазты Япон фæ-хæрд Польшæйæн, фæлæ уæддæр уымæ нæкæсгæйæ къорды бацахста дыкаг бынат æмæ ахызт дарддæр.

 

УÆГЪДИБАР ХЪÆБЫСХÆСТ

Уæгъдибар хъæбысхæстæй РЦИ-Аланийы æмбырдгонд ко-мандæ йæхи цæттæ кæнын райдыдта УФ-йы чемпионатмæ, кæ-цы уагъд æрцæудзæн 2-6 августы Мæскуыйы. Тренировкæтæ уагъд цæуынц Хæдæрцаты Асланы номыл хъæбысхæс-ты академийы. Ирон богалтимæ сæхи цæттæ кæнынц Узбекистан æмæ Венгрийы богалтæ дæр.

 

УÆЗЗАУ АТЛЕТИКÆ

24 азы онг кæуыл цæуы, уыцы спортсменты ‘хсæн Башкортостаны уагъд æрцыд Уæрæсейы чемпионат уæззау атлетикæйæ. уым дыккаг бынат бацахста Кокайты Сослан, кæцы иууыл уæззаудæр уæзы категорийы (+105) равдыста 379 кг бæрæггæнæн (174+205).

Хуриты Батрадз