Сфæлдыстадон изæр

Республикæйы Паддзахадон музейы уагъд æрцыд литературон клуб «Цырагъ»-ы сфæлдыстадон изæр. Изæр баст уыд ныртæккæ президентон æвзæрсытты агъомæ не ‘хсæнады цы тыхст уавæртæ сæвзæрд, уыимæ.

Клуб «Цырагъ сырæзт цыппар азы размæ. Йе сконды сты æрыгон æмæ астæуккаг кары фысджытæ, зонадон архайджытæ, литературæ уарзджытæ. Клубы уæнгты нымæц кæны фылдæрæй фылдæр. Тæккæ æрыгондæрыл дзы цæуы 10 азы. Уый у Мæргъиты Алим – Цхинвалы дыккæгæм скъолайы ахуырдзау.

Ацы хатт клубы æмбырдмæ æрбацыдысты Зассеты Мераб, Мæргъиты Ирбег, Пæррæстаты Ельдæ, Бекъойты Майя, Биазырты Павел æмæ æндæртæ. Клубы изæрæн амонæг уыди Зассеты Мераб. Уый изæры райдианы зæрдæрисгæйæ дзырдта ныртæккæйы æхсæнадон-политикон уавæры тыххæй. «Хъыгдзинад æвзæрын кæны уый, æмæ нæ адæм кæрæдзи кæй нал æмбарынц. Бирæтæ æвдисынц æнæуаг, æнæгъдаудзинад, иу иннæмæн аргъ нал кæны, нал æмбарынц адæмы хъæр», – ахæм уыдысты æрæмбырдуæвджытæ цæуыл сагъæс кодтой, уыдон.

Дарддæр клубы уæнгтæ кастысты сæхи фыст уацмыстæ. Уыдон æхсæн уыди Зассеты Мераб дæр. Уый бакаст йе ‘мдзæвгæ «Æндæрг». Уацмысы лæмбынæг дзырдæуы ирон адæмы удыхъæды Хуыцау цы миниуджытæ нывæрдта, уыдоныл, æмæ автор йæ хъайтарты фæрцы тынг сагъæс кæны, куыд сæфынц, уыдоныл сæфтыл. Йæхи фыст æмдзæвгæтæ ма бакаст Биазырты Павел дæр. Уый уацмысты темæ дæр уыд ныры дуджы уавæртæ æвдисæг.

Æрæмбырдуæвджытæ се ‘ппæтдæр зæрдæрисгæйæ дзырдтой канд абоны социалон-политикон уавæрыл нæ, фæлæ нæ адæмы культурæйы иу кабаз – нæ литературæйы иумæйаг уавæрыл дæр. Алкæмæ дæр дзы уыди ацы фарсты фæдыл хорз фæндиæгтæ æмæ бæллицтæ, фæлæ се ‘ппæты стырдæр бæллиц та уыд, ныртæккæ æхсæнады æндыгъддзинад цæмæй æрнывыл уа, цæмæй адæм кæрæдзи бамбарой æмæ се ‘хсæн ма ‘руагъдæуа дихдзинад.

Кæронбæттæны изæр амонæг Зассеты Мераб загъта йе мклубонтæн ахæм ныстуаны ныхæстæ, цæмæй ма ныууадзой се сфæлдыстадон фæллой, цæмæй зæрдиагæй кусой, лæвæрд сын цы курдиат ис, ууыл. Ахæм хуызы иучысыл уæддæр ахъаз уыдызстæм нæ адæмы культурон рæзтæн.

Ныр ахæм сфæлдыстадон изæртæ уагъд цæудзысты арæхдæр, цæмæй сфæлдыстадон кусджытæн уа, сæ зæрдæйы фæндиæгтæ кæм райхалой, ахæм уавæртæ.