Анахарсисы номыл республикон национ библиотекæйы уагъд æрцыд сфæлдыстадон изæр, кæцы сæрмагондæй арæзт æрцыд 20-æм æнусы 60-æм азты уырыссаг классикæмæ стыр хуынтимæ чи æрбацыдысты, уыцы диссаджы поэтты ном ссарыны цытæн.
Мадзалы хайад райстой Анахарсисы номыл республикон библиотекæйы кусджытæ, Тыбылты Алыксандры номыл Хуссар Ирыстоны Паддзахадон университеты студенттæ æмæ ахуыргæнджытæ.
Ацы уæрæх аудитори сфæлдыстадон изæры æрымысыдысты 60-æм азты поэзийы æмæ йæ зиууæтты, кæцытæ ирд æмæ егъау фæд ныууагътой куыд поэзийы, афтæ чиныгкæсджыты зæрдæты дæр. Сфæлдыстадон изæры хайадисджытæ бацæттæ кодтой цымыдисон докладтæ. Уыдон, ахæм зындгонд поэттæ куыд – Роберт Рождественский, Евгений Евтушенко, Булат Окуджава, Белла Ахмадулина æмæ бирæ æндæрты тыххæй æрдзырдтой сæ цард æмæ сфæлдыстады тыххæй. Студенттæ та сын се сфæлдыстадæй аив бакастысты æмдзæвгæтæ, азарыдысты цалдæр зарæджы гитарæйы цагъдмæ.
ХИПУ-йы уырыссаг æмæ фæсарæйнаг литературæйы кафедрæйы гæс, доцент Пæррæстаты Мананæ та йæ раныхасы банысан кодта, зæгъгæ, 60-æм азты æмдзæвгæтæ кæй сты диссаг æмæ тынг цымыдисон. «60-æм азты чи фæлдыста поэзийы жанры, уыдон куыстой ахæм аивадон фæрæзтæй, кæцытæ бындуриуæг кодтой фольклорыл. Уыцы поэттæ уыдысты нæргæ хъæлæсы хицæуттæ, ирд гоймæгтæ», – загъта Пæррæстаты чызг. Уый ма æрæмбырдуæвджытæн радзырдта, сæрыстыр кæй у поэт Роберт Рождественскийы чызгимæ сын хъарм, хæларадон ахастытæ кæй ис, уымæй. Пæррæстаты Мананæ ма банысан кодта Роберт Рождественскийы стыр курдиат æмæ загъта, зæгъгæ, уый у Хуыцауæй ратгæ поэт. Дарддæр уый аив бакаст фыссæджы æмдзæвгæтæй иу «Отдать тебе любовь? Отдай!». Уый фæстæ арфæ æмæ бузныджы ныхæстæ загъта билиоте-кæйы кусджытæн, ахæм цымыдисон мадзал кæй бацæттæ кодтой, уый тыххæй.
Йæ рады ма бузныджы ныхæстæ сфæлдыстадон изæры хайадисджытæн загъта библиотекæйы методикон хайады гæс Харебаты Галинæ дæр, кæй сæм фæуазæг сты æмæ сын сæ мадзалæн кæй саргъ кодтой, уый сæраппонд. «Махæн уыдис ахæм уавæртæ æмæ гæнæнтæ, цæмæйдæриддæр бавнæлдтаиккам æмæ арфдæр сахуыр кодтаиккам дыууынæм æнусы 60-æм азты поэтты сфæлдыстад. Ахæм ирд фысджыты мах хъуамæ ма уадзæм рохуаты æмæ сын не ‘ппæт дæр ахуыр кæниккам се сфæлдыстад. Стыр бузныг Пæррæстаты Мананæйæн, нæ университеты студенттæн æмæ нæ библиотекæйы кусджытæн, кæй нæ æрбамбырд кодтат ахæм цымыдисон мадзалмæ, уый тыххæй», – загъта Харебаты Галинæ.
Банысан кæнын хъæуы уый æмæ Анахарсисы номыл республикон библиотекæ йæ куыст кæй кæны æм-бæлон æмвæзадыл, арæх кæй сорганизаци кæнынц ахæм сфæлдыстадон изæртæ æмæ æндæр ахæм мадзæлттæ.
Нæ уацх.
Comments are closed, but trackbacks and pingbacks are open.