«Августы мæйы скарз вæййынц гриппы алы хуызтæ. Ацы хæцгæ низтæ уæлдай тæссагдæр сты сывæллæттæ æмæ ацæргæ адæмæн. Гриппæн хатт уæззау фæстиуджытæ вæййы, адæймаджы æндæр хроникон низтæ дæр сытынг вæййынц. Уымæ гæсгæ курæг дæн ныййарджытæй, цæмæй уæлæнгай ахаст ма дарой æнахъом сабиты æнæниздзинадмæ, афоныл сын аразой прививкæтæ æмæ сезоны та гриппы ныхмæ вакцинæ», – фехъусын кодта Сывæллæтты поликлиникæйы сæйраг педиатр Хæныкъаты Ларисæ «Спутник-Хуссар Ирыстон»-ы пресс центры.
Интернет тыгъдад æмæ æхсæнады рæстæгæй-рæстæгмæ фæзынынц ахæмтæ, кæцытæ парахат кæнынц ахæм информаци, зæгъгæ, вакцинæтæ æмæ прививкæтæ пайдахæссæг не сты сывæллоны организмæн. Уыцы ныхæстæм, зæгъ, хъусын нæ хъæуы. Ацы фарстыл консультаци кæнын хъæуы æрмæстдæр медицинон кусджытимæ. Биноныг азхаст куынæ дара адæймаг йæ сабимæ æмæ йæхи организммæ дæр, уæд уымæн алы хатт дæр вæййы æвзæр фæстиуæг.
Уый ма æрныхас кодта, дыууæ азæй æхсæз азмæ цы сабитыл цæуы, уыдон диспансеризацийы фæстиуджытыл. «Æнæниздзинад хъахъхъæныны министрады амындмæ гæсгæ цы диспансеризаци уагъд æрцыд сывæллæтты рæвдауæндæтты, уыдонæн мониторинг сарæзтам. Педиатртæ æмæ æндæр специалисттæн сæ бон ссис 1583 сывæллоны басгарын. Иу сывæллон дæр нæ баззайдзæн æнæ диспансеризаци рацæугæйæ. Уымæн æмæ диспансеризацийы сæйраг хæс у, цæмæй низы райдайæн стадийыл бæрæг æрцæуа æмæ йын афоныл хос æрцæуа. Цас раздæр райдайа адæймаг хос кæнын, уыйбæрц эффективондæр æмæ тагъддæр уыдзæнис хос кæныны процесс».
Диспансеризацийæнæн хатдзæгтæ аразгæйæ, сывæллæтты сæйраг педиатр сабиты низты ‘хсæн фыццаг бынаты сæвæрдта тъæпæнфадæн. Уыцы диагноз сбæрæг 847 сывæллонæн, ома, ацы низ сбæрæг ис алы дыккаг басгæрстгонд сывæллонæн. Дыккаг бынаты та ис ахæм низ куыд тонзиллит – рæсыдгонд миндалинæтæ æмæ аденоидтæ. Ахæм миниуджытæ дæр сбæрæг ис 615 сывæллонæн. Фæлæ педиатр куыд зæгъы, афтæмæй стырдæргонд миндалинæтæ практикон æгъауæй вæййы æппæт сабитæн дæр æхсæз азмæ. Саби куыд рæзы, афтæ йын фæкъаддæр вæййынц. Низты ‘хсæн æртыккаг бынаты та ис кариес. Ацы низ йæ фыццаг бакастæй афтæ зыны, ома, ницы тæссаг у, фæлæ йæ фæдыл расайы бирæ æндæр хæцгæ низтæ. Уымæ гæсгæ йæм нæ хъæуы кæсын уæлæнгай цæстæй.
Сабитæн ма сбæрæг сты гуырконды проблемæтæ дæр, стæй фады деформаци къуыллауы (грыжа) миниуджытæ. Ноджы сбæрæг кодтой цæстыты низтæ. Уый та баст у, сабитæ арæх смартфонтæм кæй кæсынц, уыйимæ. Хъыгагæн, дыууæ сабийæн та сбæрæг кодтой зонды рæзты къуылымпыдзинад.
Хæныкъаты Ларисæ ма куыд загъта, афтæмæй диспансеризаци уагъд цæуы хистæр фæлтæры ‘хсæн дæр. Хъыгагæн, бирæ низтæ сæхи базонын кæнынц æгæр æрæгмæ. Уæрæсейы æнæниздзинад хъахъхъæныны министрады амындмæ гæсгæ бæстонæй хъуамæ æркæсой нæ республикæйы куыстхъом адæмы æнæниздзинадмæ.
Нæ уацх.
