Фæскавказы æдасдзинады фæдыл Женевæйы дунеон дискусситы æмсæрдæрттæ, Евроцæдисæй Тойво Клар, ЕÆÆО-йæ Рудольф Михалка æмæ ИНО-йæ Джихан Султаноглу, ацы бонты кусæгон балцы æрцыдысты Хуссар Ирыстонмæ. Балцы нысан уыд, 2-3 апрелы Женевæйы уагъд чи цæудзæн, уыцы дискусситы радон раунды боны фæткы фарстатыл æруынаффæ кæнын.
Женевæйаг дискусситы æмсæрдæрттимæ фембæлды рæстæджы Хуссар Ирыстонæй дискусситы æмсæрдар, Постконфликтон фарстатæ бæстонкæнынады фæдыл президенты æххæстбарджын минæвар Джиоты Мурат фехъусын кодта, раздæр дæр æмæ ныр дæр хуссарирыстойнаг фарс ныфс кæй æвæры дискусситы ахадæн куысты фæстиуæгæй, тыхæй пайда кæй нал æрцæудзæн, уыцы документ бацæттæ кæныны фарстæн Женевæйы кæй уыдзæн размæцыды нысæнттæ.
Йæ ныхæстæм гæсгæ, Женевæйы дискусситы фæлгæтты Хуссар Ирыстон æдзух æвдисы цæттæдзинад конструктивон куыстмæ æмæ ныфс æвæры, дискусситы хайадисджыты раз цы хæстæ лæууы, уыдон бæстон кæй цæудзысты бынæттон цæрджыты интерестæ хынцгæйæ. Уымæй дарддæр хуссарирыстойнаг фарс нымайы афтæ, æмæ Женевæйаг дискусситы эффективондзинад фæхуыздæр кæнын, фыццаджыдæр, тыхæй пайда кæй нал æрцæудзæн, уыцы юридикон бæрнджын документ бацæттæ кæныны фарстæн кæй уыдзæн æвæрццаг импульс.
Евроцæдисæй æмсæрдар Тойво Клаар дæр ныфс бавæрдта дискусситы æнтыстджын куыстæй æмæ раразмæ кодта Хуссар Ирыстон æмæ Гуырдзыстоны ‘хсæн арæнтыл уадзæн пункттæ æхгæд кæй сты, уыцы фарст. Йæ ныхæстæм гæсгæ, уыдон гриппæй бахизыны нысанæн æхгæд кæй æрцыдысты, уый проблемæ бæстон кæнынæн ницы ахъазгæнæг у, зæгъгæ, уымæн æмæ уыцы проблемæйы фæдыл фæрстæн ахъазгæнæг механизмæй фаг пайда нæ цæуы.
Джиоты Мурат куыд банысан кодта, уымæ гæсгæ хуссарирыстойнаг фарсы уыцы ма-дзæлттæ исыны сæр бахъуыд йе ‘мбæстæгты æдасдзинад ифтонг кæныны нысанæн, кæ-цытæн ис рæстæгмæ характер.
«Арæнтæ сæхгæнын уыд эффективон æмæ раст, уый руаджы фадынæг æмæ хуыйы грипп не ‘рбаирвæзтысты Хуссар Ирыстонмæ. Хъуыддаг уый мидæг ис, æмæ гуырдзиаг къухдариуæгад ацы уавæрæй хъавыдысты пропогандистон нысанæн спайда кæнын, уымæй дæр сæхимæ дунеон организациты хъусдард раздахгæйæ. Уым егъау куыст кодтой Гуырдзыстоны информацион фæрæзтæ дæр», – банысан кодта æххæстбарджын минæвар.
Йæ ныхæстæм гæсгæ, Хуссар Ирыстон æрвылбонон режимы йæ хъус дардта, ацы низтæ куыд нымæг кæнынц, уыцы уавæрмæ æмæ мониторингы фæстиуджытæм гæсгæ, нæ бæстæйы Æдасдзинады совет нымайы 15 мартæй фæстæмæ Гуырдзыстонимæ уадзæн пункты куыст сног кæнын.
Мæсæллæйы ныхæстæ
Æрæджы цы уæлдæфон æнамонддзинад æрцыд Эфиопийы, уым фæмард ИНО-йы 19 æмкусæджы, кæцытæ тахтысты ИНО-йы Ассамблейы саммитмæ. Уый фæдыл Джиоты Мурат мæсæллæйы ныхæстæ загъта ИНО-йæ æмсæрдар Джихан Султаноглуйæн. Мæсæллæй ма, зæгъгæ, кæнæм, уыцы æнамонд цауы кæй æмбæстæгтæ фæмард сты, уыцы бæстæтæн дæр.
Джихан Султаноглу бузныджы ныхæстæ загъта Джиоты Муратæн йе ‘рхъуыдыйы тыххæй.
Æбæрæгæй сæфт æмбæстæгты фарст
Джиоты Мураты ныхæстæм гæсгæ фембæлды рæстæджы хуссарирыстойнаг фарс рæгъмæ рахаста Хуссар Ирыстоны æбæрæгæй сæфт æмбæстæгты агурыны фарст, цæмæй дискусситы æмсæрдæрттæ ацы фарстыл уынаффæ кæной сæ гуырдзиаг коллегæтимæ. Мах, зæгъгæ, дунеон эксперт Душан Игньятовичы куысты æнхъæлмæ кæсæм реалон фæстиуджытæм. Иумиагæй сисгæйæ, хуссарирыстойнаг фарс бахаста къорд хъуыдытæ, кæцытæ ахъазгæнæг уыдзысты Женевæйы дискусситы фæлгæтты эффективон куыстæн.
Евроцæдисæй æмсæрдар Тойво Клаары ныхæстæм гæсгæ, дзырд цыд Женевæйы дискусситы боны фæткы фарстатыл. Æркастæуыд дискусситы эффективондзинады гæнæнуæвæн фæндæттæм дæр. Æруынаф-фæ ма кодтам хуссарирыстойнаг-гуырдзиаг арæнтыл уадзæн пункты æхгæды æмæ байгомы аххосæгтыл, зæгъгæ.
«Продуктивон æмæ хорз цæттæгæнæн фембæлд уагъд æрцыд радон раундмæ бацæттæ кæнынæн», – фехъусын кодта Клаар.
Хуссар Ирыстоны сылгоймæгтæ бандавдзысты женевæйаг процессыл
Ахæм хъуыды фехъусын кодта ИНО-йæ æмсæрдар Джихан Султаноглу, зæгъгæ, сылгоймæгты позици, гæнæн ис, æмæ бандава дунеон дискусситы бадзырдон процессыл. Уымæн æмæ сабырадон бадзырдтыты сылгоймæгты хайадист кæдфæндыдæр уыд эффективон. Уымæ гæсгæ женевæйаг процессмæ хъуамæ баиу кæной нæ бæстæйы сылгой-мæгтæм сæвзæргæ фарстатæ æмæ сæ аскъуыддзаг кæныны уавæртæ.
«Хуссарирыстойнаг сылгоймæгтæ хъаруджын сты, ис сын сæхи хъуыды уæвæг проблемæтæ бæстон кæныны хъуыддаджы. Æмæ мах иннæ æмсæрдæрттимæ фæнды байхъусын Хуссар Ирыстоны сылгоймæгты организациты минæвæртты хъуыдымæ, фехъусæм, нæ разы цы фарстатæ ис, уыдон куыд æрбæстон æмæ аскъуыддзаг хъæуы, æппæт уыдæт-тæм. Женевæйы дискусситæ сты сæрмагонд платформæ, æмæ нæ тыхы цы ис, уый хъуамæ саразæм»,- банысан кодта уый.
Адæймагады рæсугъд хай сылгоймæгты позици æрцæудзæн хынцыд бадзырдон процессы æмæ, зæгъгæ, гæнæн уæвгæйæ, сараздзыстæм æппæт дæр бынæттон сылгоймæгты организацитæн.
Механизмты куыст у ахадæн
ЕÆÆО-йæ æмсæрдар Рудольф Михалкайы ныхæстæм гæсгæ, фæрсты цы фарстатæ тыхсын кæнынц, уыдоныл уынаффæ цæуы Инциденттæ ма æр-уадзын æмæ сæм хъусдард здахыны фæдыл механизмты фæлгæтты.
«Кæй зæгъын æй хъæуы, Механизмты куысты цы фарстытыл дзырд цæуы, уыдон махыл баст не сты, фæлæ – фæрстыл. Цы фарстатæ сæ тыхсын кæнынц, уыдоныл, æнæмæнгдæр, уынаффæ хъуамæ цæуа Механизмты куысты рæстæджы», – банысан кодта уый.
Механизмты фæлгæтты фæстаг фембæлд хорз, æмбаргæ уа-вæрты уагъд кæй цыд, уый дæр дзырдта ЕÆÆО-йы минæвар, зæгъгæ, цы дыууæ фарст бахастæуыд Механизмты куыстмæ, уыдон боны фæткмæ хаст æрцæу-дзысты. Фыццаг фарст у, фермерты цы тыхсын кæны, уый хъæдрæбынты арæх зынгсирвæзтытæ æмæ дыккаг та – Хуссар Ирыстонæй гуырдзиаг хъæутæм цы дон уагъд ис, уый алыварс сæвзæргæ проблемæ.
КЪÆБУЛТЫ Маринæ
Comments are closed, but trackbacks and pingbacks are open.