Республикæ Хуссар Ирыстоны Парламенты Уынаффæ

«Республикæ Хуссар Ирыстон æмæ Сириаг Арабаг Республикæйы ‘хсæн хæлардзинад æмæ æмгуыстады фæдыл бадзырд сратификаци кæныны тыххæй» Республикæ Хуссар Ирыстоны Закъоны тыххæй

Республикæ Хуссар Ирыстоны Парламент рахаста уынаффæ:

1. Ист æрцæуæд «Республикæ Хуссар Ирыстон æмæ Сириаг Арабаг Республикæйы ‘хсæн хæлардзинад æмæ æмгуыстады фæдыл бадзырд сратификаци кæныны тыххæй» Республикæ Хуссар Ирыстоны Закъон, кæцыйыл къухтæ фыст æрцыд горæт Дамаскы 2018 азы 23 июлы.
2. Ацы Закъон æрвыст æрцæуæд Республикæ Хуссар Ирыстоны Президентмæ къух ыл æрфыссынмæ æмæ йæ ныммыхуыр кæнынмæ.
3. Ацы Уынаффæ йæ тыхы цæуы йæ райсыны бонæй.

Республикæ Хусар Ирыстоны Парламенты Сæрдар ГАССИТЫ Петр

г. Цхинвал, 2018 азы 2 ноябрь

 

РЕСПУБЛИКÆ ХУССАР ИРЫСТОНЫ ЗАКЪОН

Республикæ Хуссар Ирыстон æмæ Сириаг Арабаг Республикæйы ‘хсæн хæлардзинад æмæ æмгуыстады фæдыл бадзырд сратификаци кæныны тыххæй

Республикæ Хуссар Ирыстон æмæ Сириаг Арабаг Республикæйы ‘хсæн хæлардзинад æмæ æмгуыстады фæдыл бадзырд, кæцыйыл къухтæ фыст æрцыд Дамаскы 2018 азы 23 июлы, ратификацигонд æрцæуæд.

Республикæ Хуссар Ирыстоны Президент БИБЫЛТЫ Анатоли

г.Цхинвал, 2018 азы 16 ноябрь

 

Б А ДЗ Ы Р Д

Сириаг Арабаг Республикӕ ӕмӕ Республикӕ Хуссар Ирыстоны ‘хсӕн хӕлардзинад ӕмӕ ӕмгуыстады тыххӕй

Сириаг Арабаг Республикӕ ӕмӕ Республикæ Хуссар Ирыстон, дарддӕр – Бадзурӕг Фӕрстӕ,

хӕларадон ахастытӕ ӕмӕ ӕппӕт сферӕты кӕрӕдзийӕн пайдайы æмгуыстад рӕзын кӕнынмӕ ӕмхуызонӕй тырнгӕйӕ.

Сири ӕмӕ Хуссар Ирыстоны адӕмты ‘хсӕн хӕлардзинады рагон традициты ӕнцой кӕнгӕйӕ,

Сириаг-хуссарирыстойнаг ахастыты рӕзты ахсджиаг ӕууӕлтӕ бафидар кӕнгӕйӕ,

ӕмбардзинады бындурыл хӕларадон ахастытӕ фидар кӕнын дыууӕ паддзахады адӕмты бындурон интерестӕн дзуапп кӕй дӕтты, уый нымайгӕйӕ, ӕхсӕнадӕмон барады принциптӕ ӕмӕ нормӕтӕн аргъ кӕнын бафидар кӕнгӕйӕ,

бадзырдтой дӕлдӕруӕвӕгыл:

Уац 1

Бадзурӕг Фӕрстӕ сӕ ахастытӕ араздзысты, куыд хӕларадон паддзахадтӕ, паддзахадон суверенитет ӕмӕ территориалон ӕнӕхъӕндзинады принциптӕн фӕдфӕдылонæй ӕмхуызонӕй аргъкӕнынадӕй къухдариуӕггӕнгӕйӕ, быцӕутӕ сабырӕй скъуыддзаг кӕнгӕйӕ, кӕрӕдзийы мидӕггагон хъуыддӕгты хи нӕ хӕццӕ кӕнгӕйӕ, ӕхсӕнадӕмон хӕслӕвӕрдтӕ цӕсгомджынӕй ӕххӕст кӕнгӕйӕ, афтӕ ма ӕхсӕнадӕмон барты ӕмхуызон нымад принциптӕ ӕмӕ нормӕтӕ.

Уац 2

Бадзурӕг Фӕрстӕ ӕнгомӕй ӕмгуыстад кӕндзысты ӕддагон политикӕйы къабазы, ӕмархайд кӕндзысты сабырад фидар кӕныны хъуыддаджы ӕмӕ уыцы нысӕнттӕн регуляронӕй уадздзысты фембӕлдтытӕ, консультацитӕ, ӕмхуызон цымыдисдзинад сын кӕмӕ ис, ахӕм дунеон проблемӕты фӕдыл.

Уац 3

Бадзурӕг Фæрстæ хайад нӕ исдзысты, кӕцыфӕндыйы ныхмæ дӕр сӕ здæхт чи уа, ахӕм искӕцы блокты, кӕнӕ цӕдисты.

Бадзурӕг Фӕрстӕй алкæцы дӕр йӕхиуыл фӕхӕцдзӕн, иннӕ Бадзурӕг Фарсы ныхмӕ комкоммӕ кӕнӕ иуварсонӕй чи уа, ахӕм цыфӕнды архайд кӕнӕ мадзӕлтты дӕр хайад исынӕй, кӕнӕ се ‘вварс рахӕцынӕй ӕмӕ нӕ бауадздзæн цӕмӕй йӕ территорийыл исты амӕлттæй спайдачындӕуа кæнӕ ӕххӕст ӕрцӕуа иннӕ Бадзурӕг Фарсы ныхмӕ агресси кӕнӕ ӕндӕр тыхбахасты архайд.

Уац 4

Бадзурӕг Фӕрстӕ регулярон ӕгъдауӕй уадздзысты консультации алы ӕмвӕзадтыл дӕр дыууӕфарсон ӕмгуыстады уӕлдай актуалондӕр фарстаты, афтӕ ма ӕндӕр фарстаты фӕдыл дӕр, кӕцытӕм сын уа ӕмхуызон цымыдисдзинад.

Уыцы консультацитӕ уагъд цӕудзысты алы ӕмвӕзадтыл, Бадзурӕг Фӕрсты паддзахадты сӕргълӕуджыты фембӕлдтытӕ дӕр сӕм бафтаугӕйӕ, фæсарӕйнаг хъуыддӕгты министрты, афтӕ ма дыууӕ бӕстӕйы министртӕ ӕмӕ ведомствоты сӕргълӕуджыты официалон делегацитӕ æмӕ сӕрмагонд минӕвӕрттӕ фӕхоныны фӕлгӕтты.

Уац 5

Бадзурӕг Фӕрстӕй алкӕцыйы территорийыл дӕр нымад цӕудзысты ахæм документтӕ, кӕцыты раттой иннӕ Фарсы паддзахадон органтӕ, Бадзурӕг Фӕрстӕй алкӕцыйы закъондӕттынадмӕ гӕсгӕ документæн ӕмбӕлон легализаци ауадзыны фæстӕ.

Уац 6

Бадзурӕг Фӕрстӕ ахъаз кæндзысты ӕмгуыстад рӕзын кӕнын ӕмӕ кӕрӕ-дзийӕн фӕлтӕрддзинад ӕмӕ информацийæ ӕххуыс кӕнынӕн базарад, экономикæ, зонад ӕмӕ техникӕйы къабазы, уыцы сферӕты дыууӕ бӕстӕйы фадӕттӕй спайда кӕныны нысӕнттӕн.

Афтӕ ма Бадзурӕг Фӕрстӕ ӕмгуыстад уӕрӕхдӕр кӕндзысты культурӕ, аивад, спорт ӕмӕ туризмы къабазы. Фӕрстӕ ахъаз кӕндзысты дыууӕ бӕстӕйы сфӕлдыстадон коллективтӕ ӕмӕ культурӕйы архайджыты ‘хсӕн кæрæдзимæ цӕуыны хъуыддаг рауӕрӕхдӕр кӕнынӕн.

Бадзурӕг Фӕрстӕ ӕмархайд кӕндзысты историон-культурон бынтӕ бахъахъхъӕнын, реставраци ӕмӕ сӕ спайда кæныны къабазы.

Бадзурӕг Фӕрстӕ ӕппӕтварсонӕй разӕнгард кӕнынц спортивон клубты ‘хсӕн контакттӕ фидар кӕнын, иумиаг ӕхсӕн-паддзахадон спортивон мадзӕлттӕ уадзын, афтӕ ма ӕндӕр къабӕзты дӕр.

Бадзурӕг Фӕрстӕ ахъаз кӕндзысты кӕрӕдзийӕн информацийӕ ӕххуыс кӕныны сферӕйы ӕмгуыстад рӕзын кӕнынӕн, дзыллон информацион фӕрӕзты уагдӕттӕ ӕмӕ минӕвӕртты ‘хсӕн контакттӕ разӕнгард кӕнгӕйӕ. Фӕрстӕ бӕрзонддӕр кӕндзысты ӕмархайды ӕмвӕзад ӕмӕ рӕзын кӕндзысты ӕмгуыстад паддзахадон организацитӕ ӕмӕ уагдӕтты ‘хсæн, дыууӕ адӕмты цард, куыст, фӕлтӕрддзинад ӕмӕ ӕнтыстытимӕ бӕстондӕр зонгӕ кӕныны нысанӕн.

Уац 7

Бадзурӕг Фӕрстӕ ахъаз кӕндзысты амалиуӕгад, инвестицион ӕмӕ ӕндӕр экономикон архайдӕн хӕрзиуӕгон, экономикон, финансон ӕмӕ барадон уавӕртӕ саразынӕн, инвестицитӕ разӕнгард кӕнын ӕмӕ ӕмхуызонӕй хъахъхъӕнын дӕр сӕм бафтаугӕйӕ, афтӕ ма алкӕцы Фарсы закъӕттӕ æмӕ ӕндӕр нормативон акттӕм гӕсгӕ ӕппӕт уӕвӕг фӕрӕзтӕй ӕмбӕстӕгтӕ, компанитӕ, кусӕндӕттӕ ӕмӕ Бадзурӕг Фӕрстæй экономикон ӕмгуыстады ӕндӕр субъектты ‘хсӕн комкоммӕ бастдзинӕдтӕ размæ кӕнын.

Уац 8

Бадзурӕг Фӕрстӕ рӕзын кӕндзысты ӕмгуыстад ахуырад ӕмӕ зонады къабазы, ахуырадон ӕмӕ зонад-иртасӕн уагдæтты ‘хсӕн комкоммӕ бастдзинӕдтӕ разӕнгард кӕнгӕйӕ, иумиаг программӕтӕ, иртасӕнтӕ ӕххӕст кӕнгӕйӕ.

Бадзурӕг Фӕрстӕ сӕхимӕ исдзысты ӕмархайд кӕнын ӕмӕ кадртӕ цӕттӕ кӕныны къабазы хӕрзиуӕгон уавӕртӕ аразыны хӕс, кӕрӕдзимӕ ахуыргӕндтӕ, специалисттӕ, аспиранттӕ ӕмӕ студенттӕ ӕрвитгӕйæ.

Уац 9

Бадзурӕг Фӕрстӕ рӕзын кӕндзысты ӕмгуыстад ӕнӕниздзинад хъахъхъӕныны къабазы, социалон ӕмӕ гуманитарон сферӕты, разӕнгард кӕндзысты медицинӕ ӕмӕ медицинон техникӕ, афтӕ ма ахъаз кӕндзысты медикаменттӕ ӕмӕ медицинон ифтонггӕрзтӕй ӕххуыс кӕнынӕн.

Уац 10

Бадзурӕг Фӕрстӕ ӕмгуыстад кӕндзысты экологийы къабазы ӕрдзон ресурстӕй рационалонӕй спайда кӕныны фӕл-тӕрддзинадӕй кӕрӕдзийӕн ӕххуыс кӕнын, экологион сыгъдӕг технологитӕ царды уадзын ӕмӕ алфӕмблай дунейы хъахъхъӕнын ӕмӕ ӕндидзын кӕныны фӕдыл мадзӕлттӕ уадзыны хуызы. Афтӕ ма уыдон кӕрӕдзийӕн гӕнӕнуӕвӕг ӕххуыс кӕндзысты ӕрдзон ӕмæ техногенон катастрофӕты фӕстиуджытӕ аиуварс кӕнынӕн. Дыууӕ Фарсы, се ‘мбӕлон националон проблемӕтӕ хъусдардмӕ исгӕйӕ, сӕ хайбавӕрд хӕсдзысты алфӕмблай ӕрдз хъахъхъӕныны фӕдыл ӕхсӕнадӕмон стратеги бакусыны хъуыддагмӕ.

Уац 11

Бадзурӕг Фӕрстӕ ӕхсӕнадӕмон барады нормӕтӕ ӕмӕ сӕ националон за-къондӕттынадтӕм гӕсгӕ ӕххӕст кӕндзысты ӕмгуыстад ӕдасдзинады къабазы, ӕхсӕнадӕмон организацигонд фыдракӕндтӕ ӕмæ терроризмы ныхмӕ тохы.

Уац 12

Бадзурӕг Фӕрстӕ, сӕхимӕ исынц дыууӕ паддзахады парламенттӕ ӕмӕ парламентариты ‘хсӕн контакттӕ ӕмæ ӕмгуыстады рӕзтмӕ сӕрмагонд хъусдард здахыны хӕс.

Уац 13

Ацы Бадзырд нӕ хъыгдары Бадзурӕг Фӕрсты бартӕ ӕмӕ хӕслӕвӕрдты, кӕцытӕ гуырынц, хайадисӕг кӕм сты, ахæм ӕндӕр ӕхсæнадӕмон бадзырд-тӕй.

Уац 14

Кæд ӕнӕмӕнгхъӕуӕг уа, уӕд Бадзурӕг Фӕрстӕ се ‘хсӕн сараздзысты сӕрмагонд фидыдтӕ, иумиаг цымыдисдзинад сын кӕм уа, ахӕм къабӕзты.

Уац 15

Бадзурӕг Фӕрсты ‘хсӕн ацы Бадзырд ӕмбарын кӕнын ӕмӕ дзы пайда кӕнынимӕ бастуӕвæг быцӕутӕ скъуыддзаг цӕуынц баныхӕстæ ӕмæ консультациты фӕрцы, хӕларадон, кӕрӕдзийӕн аргъкӕнынад ӕмӕ кӕрӕдзиӕмбарынады уавӕрты.

Уац 16

1. Ацы Бадзырд йӕ тыхы цæуы, йӕ тыхы бацӕуынӕн ӕнӕмӕнгхъӕуӕг мидпаддзахадон процедурӕтӕ сӕххӕст кӕныны тыххӕй Фӕрстæ кӕрӕдзийӕн дипломатон каналтыл фæстаг хъусынгӕнинаг фыстæй фехъусын кӕныны бонӕй.
2. Ацы Бадзырд арӕзт цӕуы дӕс (10) азы ӕмгъуыдмӕ.

Йӕ архайд  автоматикон  ӕгъдауӕй  дарддӕргонд цӕуы алы фондзазон (5) ӕмгъуыдтӕм, кӕд æмӕ Бадзурӕг Фӕрстӕй иу йӕ архайды фӕудӕй ӕппынкъаддӕр ӕхсӕз мӕйы раздӕр дипломатон каналтыл фыстӕй нӕ фехъусын кæна йӕ архайд ӕруромыны фӕндон, уӕд.

З. Ацы Бадзырдмӕ дипломатон каналтыл Бадзурӕг Фӕрсты фыст ӕмразыдзинадмӕ гӕсгӕ бахӕссӕн ис, йӕ ӕнӕаскъуынгӕ хай чи уой, ахӕм ивындзинӕдтӕ ӕмӕ баххӕсткӕнинӕгтæ, æмӕ сӕ тыхы цӕудзысты ацы уацы 1 пункты банысангонд фӕткмӕ гӕсгӕ.

Фыст ӕрцыд сахар Дамаскы  23/7/2018 азы дыууӕ экземплярӕй, алкӕцы дӕр дзы арабаг ӕмӕ ирон ӕвзӕгтыл, уымӕй дӕр дыууӕ текстӕн дӕр ис ӕмхуызон тых.