ÆНГОМӔЙ ӔМӔ КӔРӔДЗИ ӔМБАРГӔЙӔ КУСЫН – РАЗМӔЦЫДЫ СӔЙРАГ ФӔРӔЗ

Дарддӕр цӕуы ивындзинӕдтӕ Республикӕ Хуссар Ирыстоны ӕххӕсткӕнынадон хицауады структурӕты. Уыцы ивындзинӕдты, кӕй зӕгъын ӕй хъӕуы, сӕйраг у Хицауады Сӕрдары бынат. Куыд зонӕм, афтӕмӕй амӕйразмӕ Президент Гаглойты Алан Парламентмӕ бавдыста Джуссойты Константины кандидатурӕ. Закъоны домӕнтӕ ӕххӕст кӕнгӕйӕ ӕмӕ Парламенты регламентмӕ гӕсгӕ Президенты бавдисгӕ кандидатурӕйы фӕдыл уынаффӕ цыдис Парламенты профилон комитетты ӕмӕ алы комитет дӕр равдыста йӕ разыдзинад. Æппӕт уыцы процедурӕтӕ ӕрбӕстон кӕныны фӕстӕ майрӕмбоны  Республикӕ Хуссар Ирыстоны Парламент  кӕронбӕттӕн уынаффӕ рахӕсгӕйӕ йӕ разыдзинад равдыста Президенты бавдисгӕ кандидатурӕйы фӕдыл, Джуссойты Константин Республикӕ Хуссар Ирыстоны Хицауады сӕрдары бынатмӕ нысангонд ӕрцыд  ӕмхъӕлӕсӕй.

Парламенты сессийы куысты хайад райста Президент Гаглойты Алан йӕхӕдӕг дӕр.

Президент йӕ раныхасы банысан кодта Джуссойты Константины бӕрзонд профессионалон миниуджытӕ, социалон нысаниуӕджы проекттӕ реализаци кӕныны хъуыддаджы йӕм цы фӕлтӕрддзинад ис, уыдӕттыл лӕмбынӕг ӕрдзургӕйӕ.

– Ныртӕккӕ Хицауады сӕйраг фӕдыздӕхтытӕй сӕ иу Республикӕ Хуссар Ирыстоны социалон-экономикон рӕзтӕн ахъазгӕнӕг Инвестицион программӕ гъӕдджынӕй сӕххӕст кӕнын кӕй у, уый хынцгӕйӕ Джуссойты Хасаны фырт Константины кандидатурӕ аккагыл нымайын Хицауады Сӕрдары бынатмӕ йӕ снысан кӕнынӕн, – загъта Президент Гаглойты Алан.

Паддзахады сӕргълӕууӕг ма банысан кодта, боны фӕткы кӕй ис Хицауады ног сконд сфидар кӕнын ӕмӕ активон куыст райдайыны фарст, уыцы нымӕцы Инвестицион программӕ реализаци кӕныны фарст дӕр, кӕцыйы ӕххӕсткӕнынад абоны онг у 20 проценты.

Гаглойты Алан депутатон корпусимӕ ныхас кӕныны рӕстӕджы бафидар кодта, кӕй йӕ фӕнды, цӕмӕй ӕххӕсткӕнынадон ӕмӕ закъондӕдтынадон хицауиуӕгады къабӕзтӕ се ‘ргом раздахой нормалон куыстмӕ.

– Уымӕй уӕлдай, ӕз куыд хицауиуӕгад ӕххӕст кӕныны фӕдыл ӕмхӕццӕ системӕмӕ рахизыны идейӕйы фарсхӕцӕг, афтӕ ӕнӕмӕнгхъӕуӕгыл нымайын, Президент кӕй контроль кӕны, ахӕмтӕ ӕмӕ ӕндӕр барты кӕцыдӕр хай Парламентмӕ радтыны фӕдыл райдайӕн къахдзӕфтӕ саразын.

Президенты Администрацийы раразмӕгонд хъӕппӕристы фыццӕгтӕй иу уыдзӕн «Республикӕ Хуссар Ирыстоны Хицауады тыххӕй» Конституцион закъонмӕ уыцы нормӕ бахӕссын, кӕцы алы Министры дӕр хӕсджын кӕндзӕн йӕ бакӕнгӕ куысты тыххӕй Парламентӕн хыгъд радтын.

Мӕ хъуыдымӕ гӕсгӕ махӕн бантысдзӕн паддзахады чи уӕвынад кӕны, уыцы къуылымпыдзинӕдтӕ ӕмӕ ныхмӕвӕрддзинӕдтӕ цадӕггай нормалон ӕмвӕзадмӕ скӕнын, загъта Президент.

Президенты бавдисгӕ кандидатурӕ – Джуссойты Константины Хицауады Сӕрдары бынатмӕ снысан кӕныны фарст сессимӕ рахаста Республикӕ Хуссар Ирыстоны Парламенты Закъондӕдтынад, закъондзинад ӕмӕ бынӕттон хӕдуагӕвӕрды фӕдыл Комитеты сӕрдар Габатты Алан.

Уый фӕстӕ депутаттӕ ӕрӕвнӕлдтой Парламенты регламентмӕ гӕсгӕ хъӕлӕс кӕныны процедурӕ сӕххӕст кӕнынмӕ. Сусӕг хъӕлӕсӕппӕрсты хуызы сессийы куысты хайад исӕг 33 депутаты ӕмхъӕлӕсӕй сӕ разыдзинад равдыстой Президенты бавдисгӕ кандидатурӕйы фӕдыл.

Йӕхирдыгӕй фарс Джуссойты Константин бузныджы ныхӕстӕ загъта депутаттӕн, ахӕм ӕууӕнк ыл кӕй бафтыдтой, уый тыххӕй ӕмӕ банысан кодта фидӕны Хицауады бындурон фӕдыздӕхтытӕ.

Джуссойы-фырт куыд загъта, афтӕмӕй сӕйраг у ногдзинӕдтыл ӕнцой кӕнын, ног фадӕттӕ агурын ӕмӕ сӕ царды биноныг кӕнын:

– Сӕйраг хӕс у социалон-экономикон рацарӕзт ӕмбӕлон паддзахадон, хицӕн къабӕзты ӕмӕ ӕхсӕнкъабазон фӕлгӕтты раст план кӕнын. Махӕн ныртӕккӕ иууыл приоритетондӕр у 2022-2025 азтӕн республикӕйы Социалон-экономикон рӕзты паддзахадон программӕ, кӕцыйӕн ис астӕуккагтагъдон нысаниуӕг.

Ацы программӕйы фӕлгӕтты паддзахадӕн фӕзындзӕн уӕрӕх фадӕттӕ амалиуӕггӕнджытӕн баххуыс кӕныны хъуыддаджы, националон хъалонон-таможнӕйон закъондӕдтынад фӕхъомысджындӕр кӕныны фадыджы дӕр ис перспективон плӕнттӕ, афтӕ ма инвестицион проекттӕн хатырон финанскӕнынад дӕр. Ӕз афтӕ нымайын ӕмӕ нын ахӕм вазыгджын, фӕлӕ ӕнӕмӕнгхъӕуӕг хӕстӕ среализаци кӕнын фадат ратдзӕн размӕ цӕуынӕн, ӕрмӕст уал нырма хъӕуы ӕппӕт уыцы хӕсты кӕронбӕттӕн фӕстиуджытӕ Хуссар Ирыстоны националон интерестимӕ ӕрӕмных кӕнын ӕмӕ уый фӕстӕ та сӕ ӕххӕст кӕнынмӕ ӕрӕвналын, загъта Джуссойты Константин.

Джуссойы-фырт  националон экономикӕйы ахсджиагдӕр фӕдыздӕхтытыл банымадта агросӕудӕджерадон, туристон-рекреацион ӕмӕ сӕудӕджерадон комплекстӕ.

– Уыимӕ иумӕ ӕнӕмӕнгхъӕуӕг у уӕлдай хъусдард аздахын:

– амалиуӕгады уавӕр фӕхуыздӕр кӕнынмӕ.

Цӕмӕй дарддӕр рӕзты фӕндагыл цӕуӕм, уый тыххӕй, ӕвӕццӕгӕн, фӕстӕмӕ разда-хын хъӕуы хицауиуӕгад ӕмӕ амалиуӕгады ‘хсӕн кӕрӕдзийыл ӕууӕндындзинад, ӕрдзурын хъӕуы уыдӕттыл, цы хуызы ис гӕнӕн куылымпыдзинӕдты, уӕлдай ӕндӕвдад аиуварс кӕнын. Кӕд уый ис, уӕд хъӕуы бамбарын, цахӕм у. Кӕд бахъӕуа, уӕд хъуамӕ ивындзинӕдтӕ хаст ӕрцӕуа, амалиуӕгады субъекттӕн хатырон кредиттӕ дӕттыны хъуыддаг нывылгӕнӕг закъондӕдтынадмӕ.Æнӕмӕнгхъӕуӕгыл нымайын, амалиуӕгадыл цы административон ӕмӕ хъалонон ӕндӕвдад ис, уый максималонӕй ӕрныллӕг кӕнын;

– Хицауады дӕлбар чи ис, уыцы ресурстӕй эффективонӕй пайда кӕнын, бюджеты хӕрдзтӕ ӕмӕ националон нысӕнттӕ реализаци кӕнынӕн ног фӕрӕзтӕ агурыны приоритеттӕ арӕхстджынӕй равӕрын;

– 2022-2025 азтӕн Социалон-экономикон рӕзты программӕйы фӕлгӕтты проекттӕ реализаци кӕнын;

– Хуссар Ирыстоны националон интерестӕм гӕсгӕ экономикон закъондӕдтынад модернизаци кӕнын.

Джуссойты Константин сӕрмагонд хъусдард аздӕхта бӕстӕйы демографион уавӕр фӕхуыздӕр кӕнынмӕ, медицинон лӕггӕдты ӕмвӕзадыл бӕрзонддӕр схӕцыны ахсджиагдзинадмӕ, ахуырады системӕйы модернизаци ӕмӕ культурӕйы размӕцыды фарстатӕм.

– Паддзахад ӕмӕ йӕ адӕмы ӕдасдзинадыл куы дзурӕм, уӕд стратегион ӕгъдауӕй ахсджиагыл нымайын ӕнӕниздзинад хъахъхъӕныны системӕ ахӕм хуызы сфидар кӕнын, адӕмӕн сӕ бон куыд уа ӕппӕт ӕнӕмӕнгхъӕуӕг медицинон ӕххуыс комкоммӕ ам, Республикӕ Хуссар Ирыстоны райсын, цӕмӕй хос кӕнынмӕ республикӕйӕн ӕддӕмӕ цӕуын фӕткау мауал уа.

Хицауады архайды цы ахсджиаг фӕдыздӕхтытӕ ис, уыдонӕй сӕ иуыл Джуссойты Константин банымадта бӕстӕйы сӕвзӕргӕ демографион уавӕр фӕхуыздӕр кӕнын. Йӕ ныхӕстӕм гӕсгӕ, фӕбӕрзонддӕр кӕнын хъӕуы гуырынады ӕмвӕзад, ӕмӕ ӕппӕтдӕр хъӕуы саразын мӕлындзинад фӕкъаддӕр кӕныны тыххӕй, цӕрджыты ӕнӕниздзинад сфидардӕр кӕнын ӕмӕ бинонты институттӕ саразыны тыххӕй.

– Æппӕт уыцы хӕстӕн аскъуыддзаггӕнӕн нӕй ӕнӕнысанон программӕйӕ. Уымӕ гӕсгӕ махӕн ӕнӕмӕнгхъӕуӕг у, цӕмӕй уал ӕввахс рӕстӕджы сфидар кӕнӕм демографион политикӕйы концепци, – загъта уый.

– Æппӕт банысангонд хӕстӕ аскъуыддзаг кӕныны тыххӕй хъӕуы бӕрӕг финансон фӕрӕзтӕ. Уымӕ гӕсгӕ ӕз ахсджиагыл нымайын нӕхи сӕрмагонд фӕрӕзты структурӕтӕн анализ кӕнынмӕ ӕрæвналын ӕмӕ сӕ фыццаградон хӕстӕ аскъуыддзаг кӕныны фӕдыздӕхтмӕ саразын, – загъта Джуссойы-фырт.

Йӕ раныхасы кӕрон Джуссойты Константин депутаттӕн ныфс бавӕрдта, арӕзтцӕуӕг Хицауады ӕппӕт уӕнгтӕй алчи дӕр кӕй хӕсдзӕн персоналон бӕрндзинад нӕ разылӕууӕг хӕстӕ къухы бафтын кӕныны хъуыддаджы.

– Уыимӕ иумӕ сымахӕй алкӕмӕй дӕр курӕг дӕн, цытджын депутаттӕ, цӕмӕй нӕ Райгуырӕн бӕстӕ фидар ӕмӕ рӕзын кӕныны фарстаты алчи дӕр райса хайад. Мах ӕй ӕмбарӕм, ӕххӕсткӕнынадон ӕмӕ закъондӕдтынадон хицауиуӕгады ӕнгом куыстыл баст кӕй у не ‘нтыстыты ӕмбис хай, – загъта Джуссойты Константин.