Цæгатирыстойнаг паралимпионтыл цытджын æгъдауæй сæмбæлдысты аэропорт «Владикавказ»-ы. Республикæмæ æрыздæхтысты дæргъмæ гæпп кæнынæй Паралимпион хъæзтыты уæлахиздзау Хынцæгты Хетæг, ядро æппарынæй, лидзынæй æмæ хæрдмæ гæпп кæнынæй Олимпиадæйы призертæ Кокойты Алан, Сланты Виктория æмæ Мæргъиты Георги.
Спортсментыл фембæлдысты Цæгат Ирыстон-Аланийы физикон культурæ æмæ спорты министр Хуадонты Артур, спортсменты æввахс хиуæттæ æмæ зонгæтæ, афтæ ма республикæйы цæрджытæ Уæрæсе æмæ Цæгат Ирыстоны тырысатимæ.
Хынцæгты Хетæг куыд банысан кодта, афтæмæй бузныг у, йе ‘вварс чи хæцыд, уыдонæй. «Райдианы мæхи лæмæгъ равдыстон. Фæлæ мæхицæн бауырнын кодтон, зæгъын, ныртæккæ кæнæ та æппындæр никуы. Рацыдтæн алыгъуызон физиопроцедурæтæ, арæзтон рыстуромæн судзинтæ дæр. Мæ къах мæ куы нæ хъыгдардтаид, уæд ноджы дарддæр агæпп кодтаин. Мæ бинонтæ æмæ æввахс хиуæттæ мемæ адих кодтой мæ циндзинад. Райгонд дæн алкæмæй дæр», – радзырдта Хынцæгты Хетæг.
РЦИ-Аланийы физикон культурæ æмæ спорты министр Хуадонты Артур раарфæ кодта Олимпион хъæзтыты уæлахиздзаутæ æмæ призертæн республикæйæн æмæ иумиагæй сисгæйæ Уæрæсейæн ахæм нысаниуæгджын æмæ ахсджиаг уæлахизы тыххæй. «Республикæйы разамынады номæй уын арфæ кæнын. Сæрыстыр дæн уæ фæстиуджытæй. Зæгъын мæ фæнды уый дæр, æмæ уæ нæмттæ сыгъзæрин дамгъæтæй фыст кæй æрцыдысты Олимпион чемпионты номхыгъды. Мæ зæрдæ уын зæгъы æнæниздзинад, цæмæй уын иннæ Паралимпиадæ суа ноджы фæстиуæгджындæр æмæ уын мах та æххуыс кæндзыстæм», – загъта министр.
ХУРИТЫ Батрадз
