Цхинвалы мыхуыры рацыдысты чингуытæ «Традиционное земледелие горной Осетии» – йæ автор у историон зонæдты кандидат, Уанеты Захары номыл Хуссар Ирыстоны зонад-иртасæн институты истори æмæ этнологийы хайады хистæр зонадон кусæг Хъуылымбегты Роберт æмæ «Этнокультурный феномен погребального обряда у осетин» – йæ автор у историон зонæдты кандидат, Хуссар Ирыстоны зонад-иртасæн институты истори æмæ этнологийы хайады хистæр зонадон кусæг, Хуссар Ирыстоны паддзахадон университеты Ирыстоны истори æмæ Кавказзонынады кафедрæйы хистæр ахуыргæнæг Кокойты Азæ.

Дыууæ чиныджы дæр бацæттæ кодта хуссарирыстойнаг рауагъдад «Республика» зонад-иртасæн институты грифы бын. Рауагъдады куыд фехъусын кодтой, уымæ гæсгæ ныры онг институты рауагъдтæ мыхуыры цыдысты зонад-иртасæн институты грифы нæ, фæлæ алыгъуызон форматты бын.

«Мах бакуыстам сæрмагонд формæ зонад-иртасæн институты библиотекæйы чингуытæн, ома, мыхуыр куы цæуой, уæд уыдзысты визуалон иугъуызон, ивд цæудзæн æрмæстдæр чиныджы æддаг цъары хуыз», – бамбарын кодтой рауагъдады.

Уым ма банысан кодтой, зæгъгæ, ныр та мыхуыры рацæудзæн профессор Гаглойты Зинæйы чиныг «Осетинские фамилии».

Чиныг «Традиционное земледелие горной Осетии»-йы этнографион æрмæджы бындурыл æвдыст цæуы хæххон Ирыстоны зæхгуыст, куыд йæ централон, афтæ хуссар æмæ цæгаттаг хæйтты дæр иумиаг æмæ локалон хицæндзинæдты. Этнографи, истори, археологи æмæ фольклоры фæдыл æрмæджыты бындурыл иртасæнты æвдыст æрцыдысты регионы хæххон быдыргуысты комплексон характеристикæ: æрдзон-хæдзарадон уавæр, адæмон агрикультурон зонындзинæдтæ, кондадон-материалон базæ.

Чиныг «Этнокультурный феномен погребального обряда у осетин» у Хуссар æмæ Цæгат Ирыстоны алы районты этнографийы фæдыл авторы би рæазон иумиаг куыст. Автор хъæздыг фольклорон-этнографион æрмæджыты бындурыл раргом кодта ирæттæм мард ныгæныны фæткы уникалондзинад, хæдбындурдзинад æмæ йæ функционалон æрдз.

Рауагъд адресгонд у этнологтæ, культрологтæ, историктæ, фольклористтæм национ æгъдæуттæ чи ахуыр кæны, уыдонæн се ппæтмæ дæр.

 

 

Comments are closed, but trackbacks and pingbacks are open.