РХИ-йы Президент Бибылты Анатоли йæхимæ райста Сæйраг тæрхондоны сæрдар Коцты Олесяйы. Фембæлды рæстæджы закъондæттæг хицауиуæгады сæргълæууæг хыгъд сарæзта республикæйы уагъдцæуæг тæрхондонон реформæйы фæстиуджыты тыххæй.
«Бæрæг куыд у, афтæмæй ивгъуыд азы 29 декабры Уæлдæр арбитражон тæрхондон йæ куыст æрурæдта æмæ арæзт æрцыд фыццаг инстанцийы тæрхондон Республикæ Хуссар Ирыстоны Арбитражон тæрхондон, кæцы архайы республикæйы æппæт территорийыл. Фондз тæрхонгæнæджы се ‘ппæт дæр нысан æрцыдысты æмæ абоны бон уыдон кусын райдыдтой. Зæгъæн ис, фыццаг инстанцийы Арбитражон тæрхондон кусы æххæстæй», – загъта Коцты Олеся.
Сæйраг тæрхондоныл дзургæйæ та банысан кодта, зæгъгæ, 12 вакантон бынатæй абоны бонмæ нысан æрцыдысты аст тæрхонгæнæджы.
«Парламент дæр иузæрдиондзинад равдыстой, Президент цы кандидатты æрбавдыста, уыдонæй алкæмæ ахасты дæр. Абоны бон æвзæрст цæуынц, цы тæрхонгæнджытæ ма хъæуы, уыдон. Дыууæ тæрхонгæнæг æмæ дыууæ хæдивæджы вакантон бынæттæм расидт æрцыд конкурс», – загъта уый.
Коцты Олесяйы ныхæстæм гæсгæ, кæронмæ бахæццæ сты къорд горæтон æмæ районон тæрхонгæнджыты æххæстбартæ æмæ уый фæстиуæгæн хъуамæ ауагъдæуа конкурс, горæт Цхинвалы тæрхондоны сæрдары æмæ Знауыры районы тæрхондоны сæрдары вакантон бынæттæм æндæрты райсыны тыххæй.
«Афтæмæй мах ныфс ис, хъуыддæгтæ равзарыны тыххæй æмгъуыдтæ фехалыны фæдыл адæммæ цы объективон претензитæ ис, уыдон конд æрцæудзысты минимуммæ, æмæ нæ бон дзурæн уыдзæн, æмгъуыдты проблемæтæ скъуыддзаг кæй æрцæудзысты, уый тыххæй», – загъта уый.
Паддзахады сæргълæууæг банысан кодта, тæрхондонон реформæйы ауагъды ахсджиагдзинад, кæцыйы сæйраг нысан у Сæйраг тæхондоны тæрхонгæнджытæ æмæ фыццаг инстанцийы тæрхонгæнджытæм адæмы æууæнк раздахын.
«Мæ бон фидарæй зæгъын нæу, зæгъгæ, тæрхондонон системæ ахæм æмвæзадыл уыдис æмæ йæ бон аскъуыддзаггæнæн ницы уыд. Уый раст нæ уыдзæн. Фæлæ мах хорз зонæм, кæй ис бирæ фадæттæ тæрхонгæнджыты куыст фæхуыздæр кæныны тыххæй, бирæ фадæттæ ис, хъæстытимæ тæрхондæттæм цы адæймæгтæ бахатынц, цæмæй уыдон ныфс уа рæстдзинадæй æмæ уыцы хъуыддæгты закъонмæ гæсгæ ас-къуыддзаг кæнынæй», – загъта Бибылты Анатоли.
Уый ныфс ис, ногæй снысангонд тæрхонгæнджытæ бæрнджынæй æмæ намысджынæй кæй æххæст кæндзысты сæ бæрны уæвæг хæстæ, кæй скъуыддзаг кæндзысты æппæт фарстатæ дæр закъоны фæлгæтты. Уыимæ иумæ ма республикæйы тæрхондонон хицауиуæгады æвæрд кæй æрцæудзæн æмбæлон фæтк.
Фембæлды кæрон Коцты Олеся Президентæн радзырдта Æмбæстагон хъуыддæгты фæдыл коллегийы æмæ Уголовон хъуыддæгты фæдыл коллегийы ног функциты тыххæй.
«Абоны бон ма нын фадат ис æркæсæм, æмбæстагон хъуыддæгты фæдыл коллеги Æмбæстæгты æмæ административон хъуыддæгты фæдыл коллегимæ рацарæзт куыд цæуы, уымæ. Афтæ арæзт æрцыд Уголовон хъуыддæгты фæдыл коллеги дæр. Ныр та сæ бæрны уыдзысты æфсæддонты хъуыддæгтæ скъуыддзаг кæнын дæр. Уыимæ иумæ уый уыд æнæмæнгхъæуæг, уымæн æмæ махмæ ис Æфсæддон прокуратурæ дæр, фæлæ нæм æфсæддон хъуыддæгтæ скъуыддзаг кæныны фæдыл нæ уыд закъондæттæг æххæстбартæ», – банысан кодта Коцты Олеся.
Comments are closed, but trackbacks and pingbacks are open.