Леуахийы цæугæдоны сæрты цы ног хид рæзы, ууыл ныридæгæн цæуæн ис. Ацы цаумæ рагæй æнхъæлмæ кастысты æгас горæт. Уæлдай цин та кæнынц микрорайон Уыцыфарсы цæрджытæ.
Зæгъын хъæуы уый, æмæ хид ногæй саразын кæй уыд, ууыл тынгдæр тыхстысты амы цæрджытæ. Æнусæй фылдæр цыд зæронд хидыл. Бындуронæй цалцæг нæ цыд, кæлæддзаг уавæрмæ æрхауд, уавæр тæссаг уыд машинæтæн æмæ фистæгæй цæуджытæн дæр. Йæ уæрæх фондз метр дæр нæ уыд. Дыууæ машинæйы дзы фæрсæй-фæрстæм нæ цыдысты. Ныр уыдæттæ фæстейæ баззадысты. Ног хид у 10 метры фæтæнæн. Ис дзы фистæгæй цæуджытæн тротуартæ. Ныртæккæ кусджытæ уыдоныл æвæрынц диабаз бынæттон дурæй. Уыцы куыстытæ рæхджы фæуыдзысты. Уыцы иурæстæг ма йыл æвæрынц асфалты фыццаг цъар дæр.
Цин кæнынц, хидмæ æввахс чи цæрынц, уыдон. Зæгъынц, зæгъгæ, ног ахуыры аз сæ сывæллæтты скъолатæм нал хъæудзæн дæрддыл цæуын. Хид эксплуатацимæ лæвæрд фæстæдæр æрцæудзæн, фæлæ йыл нырæй фæстæмæ цæуыны бар уыдзæн. Цы куыстытæ ма баззад, уыдон кæндзысты цадæггай, кæрæдзийы нæ хъуыгдардзысты кусджытæ æмæ фæндагыл чи цæуа, уыдон.
УАЗÆГТЫ Марфа
