Цæцæны республикæйы дыууæбонон Инвестицион форумы хайад иста Хуссар Ирыстоны делегаци Президент Гаглойты Аланы сæргълæудæй. Дыууæ боны дæргъы нæ делегацийы уæнгтæн уыд цалдæр политикон, экономикон æмæ культурон фембæлды. Бантыст сын зонадон-техникон æмгуысткæнынады тыххæй сразыдзинадыл къухтæ æрфыссын. Сæ къухты цы бафтыдис, уыдæттыл лæмбынæгдæр æрдзурдзысты делегацийы уæнгтæ сæхæдæг, Хуссар Ирмæ куы æрыздæхой, уæд. Цыбыртæй та уал афæлгæсæм форумыл.
Фыццаг бон Хуссар Ирыстоны делегациимæ фембæлд Уæрæсейы Федерацийы Хицауады сæрдары хæдивæг Александр Новак.
Уæрæсейы Экономикон райрæзты министры хæдивæг Дмитрий Вольвач дæр хайад иста форумы æмæ официалонæй æрсидт форумы хайадисæг инвестортæм, цæмæй сæ цæст æрдарой Хуссар Ирыстон æмæ Абхазмæ:
«Мах иумæ бирæ цыдæртæ хъуамæ саразæм, цæмæй Хуссар Ир æмæ Абхазы республикæты инвестицион потенциал æмæ сæудæджерадон-экономикон рæзт фылдæр кæна. Ацы форумы хайад исдзæн 300 эксперты. Уыдон ауадздзысты 60 кусæгон мадзалы. Мæн фæнды, цæмæй инвестортæ цымыдис кæной ацы дыууæ республикæмæ. УФ-йы экономикон райрæзты министрад алыварсон æххуыс кæндзæн инвестортæн: административон, барадон, организацион æмæ, гæнæнуæвгæйæ та, финансон дæр», – дзырдта форумы Дмитри Вольвач.
«Дарддæр дæр уын æххуыс кæндзыстæм. Размæ цæут!», – загъта Михаил Мишустин Президент Гаглойты Аланæн форумы дыккаг бон.
Уæрæсейы Федерацийы Хицауады сæрдар Михаил Мишустин Грозныйы цæуæг Кавказаг инвестицион форумы бабæрæг кодта Хуссар Ирыстоны стенд. Ам Мишустиныл фембæлдысты Гаглойты Алан, Джуссойты Константин æмæ Хъотайты Сæрмæт. Уæрæсейы Федерацийы Хицауады сæрдар зæрдиаг арфæтæ ракодта Хуссар Ирыстоны делегацийы уæнгтæн. Лæмбынæг æркаст, стенды цы продукци презентаци цыд, уыдонмæ.
Хуссар Ирыстонмæ ма ам цымыдисдзинад равдыстой Абхаз, Адыгейæ, Хъæрæсе-Черкесы республикæтæ æмæ иннæ республикæтæ æмæ æндæр регионты минæвæрттæ.
Форумы фæстаг бон та Цæцæны республикæйы сæргълæууæг Рамзан Кадыров йæ телеграм-каналы фехъусын кодта: «Уæлахиздзауæн хорзæх радта мæ зынаргъ уазæг æмæ æфсымæр Хуссар Ирыстоны республикæйы президент Гаглойты Алан».
Куыд рабæрæг, афтæмæй Рамзан Кадыров форумы фæлгæтты уагъд бæхдугътæм æрбацыдис нæ бæстæйы президентимæ.
УАЗÆГТЫ Марфа
Ацы æрмæджытæ дæр бакæс:
Ялтæйы дунеон экономикон форумы
Ялтайы IV-æм Æхсæнадæмон экономикон форумы
Хуссар Ирыстоны инвестицион химæлвасдзинад фенын кодтой Абхазы экономикон форумы
Тыбылты Леонид: «Цæцæйнаг адæм сæ хъысмæт радтой æууæнкджын адæймаджы къухтæм»
РХИ-йы Хицауады Сæрдар Хъуылымбегты Доментийы хыгъд парламенты сессийы 2015 азы бакæнгæ куысты тыххæй
