Афтæ чи зæгъы, зæгъгæ, фыдыбæстæ, ма-дæлон æвзаг, куыст æмæ æндæр ахæм ахс-джиаг цыдæртæ адæймагæн сабийæ æн-цондæр бауарзын кæнæн сты, уыдон хъуыды кæнынц раст. Уымæн æмæ сабийæн йæ зонд æмæ йæ хъуыдытæ айдæнау сты сыгъдæг æмæ рæсугъд. Цы фена, фехъуса æмæ ба-уарза, уыдон та цæрæнбонтæм, кæд æххæстæй нæ, уæддæр уыдзысты йæ зондахасты.
Æппæт уыдæдтæ зонгæйæ æмæ хатгæйæ, сæ куыст æмæ сæ хæстæ æххæст кæнынц Цхинвалы скъолайы агъоммæйы фæндзæм ахуырадон уагдон «Булæмæргъ»-ы кусджытæ. Уыцы хъуыдытæ æмæ хæстæм та сæ ныр цалдæр азы разæнгард кæны йæ разамонæг Æлборты Иринæ.
Бирæ æндæр уагдæттау, ацы агъуыстыл дæр гуырдзиаг абырджыты аххосæй, æрцыд стыр зиæнттæ. Бахъуыд æй капиталонæй сцалцæг кæнын æмæ цалцæг дæр æрцыдис. Кæд йе сцалцæгæй цалдæр азы рацыд, уæддæр нырма дæр бæрæг у, цалцæггæнджытæ сæ куыст цæсгомджынæй кæй сæххæст кодтой, уый. Ныр ардæм æрвылбон дæр сæ ныййарджытæ æрбакæнынц сæдæ фынддæс сабийы. Уыдонмæ сæ хъус цы дыууадæс хъомыл-гæнæджы дары, уыдонæй куыд сабитæ, афтæ сабиты ныййарджытæ дæр сты райгонд. Сы-вæллæты уагдон кæд тагъд йæ сырæзты 47 азы банысан кæндзæнис, уæддæр дзы иунæг мæгуырау хабар дæр нæ уыдис, сывæллæтæ æмæ сæ ныййарджыты зæрдæтæ цæуыл батыхстаиккой.
Уагдоны хъуыддæгтæ аразæг Багаты Зæринæ куыд банысан кодта уымæ гæсгæ рæвдауæндоны кусджытæн се ‘ппæтмæ дæр ис уæлдæр ахуырдзинад, уарзынц кæстæртимæ куыст æмæ цы хъæуы æмæ æмбæлы, уый æххæст кæнынмæ та зивæг никуы бакæнынц.
Куыд æндæр ахæм уагдæтты, афтæ ам дæр, стыр хъусдард здæхт цæуы сабиты æнæниздзинадмæ. Ацы фарсты тыххæй та рæвдауæндоны медицинон кусæг Маркъозашвили Манана банысан кодта, зæгъгæ, «нырмæ дæр сабиты æнæниздзинадмæ нæ хъус дардтам лæмбынæг, фæлæ азфæдз æмæ æрдæджы бæрц, уыцы хæстæ æххæст кæнæм ноджы хуыздæр. Тасы æнкъарæнтæ нæм æвзæрын кæны дунейы цы хæцгæниз апарахат, уый æмæ æрвылрайсом дæр сабитæ сгæрст æрцæуынц. Искæмæ дзы нæ зæрдæ куы фехсайы, уæд ист æрцæуы хъæуæг æмæ æмбæлон мадзæлттæ. Ацы фарсты нын стыр æххуыс сты горæты поликлиникæйы разамонджытæ, ифтонг нæ кæнынц хостæй. Амал сæ кæнæм нæхи тыхтæй дæр, фæкæсынц нæм сывæллæты ныййарджытæ дæр. Се ‘ппæтæн дæр зæгъын стыр бузныг».
Адæймаджы æнæниздзинадæн, уæлдайдæр та сабиты æнæниздзинадæн, стыр ахъаз сты хæлцадон продукттæ. Ацы фарст куыд скъуыддзаг цæуы, уый тыххæй та рæвдауæндоны хæринагаразæг Санахъоты Зæринæ афтæ зæгъы:
Ам кусын æхсæз азы, фæлæ нæ хъуыды кæнын æмæ хæлцадон продукттæй искуы хъуагдзинад баййæфтам, уæлдайдæр та фæстаг цалдæр азы. Се ‘фснайынæн нын ис райдзаст æмæ сыгъдæг бынат, цыран кусынц алыгъуызон уазалгæнæнтæ. Хæринæгтæ цæттæ кæныныл куы дзурæм, уæд уым та банысан кæндзынæн, кæй нын ис ног пецтæ æмæ сыл кусæм æртæ хæринагаразæгæй.
Рæвдауæндоны кусджытимæ ма ныхас кодтон, сабиты ныййарджытимæ сын цахæм ахастытæ ис, уый тыххæй дæр. Куыд банысан кодтой, уымæ гæсгæ, не сты хъæстаг. Ис сын хорз бастдзинæдтæ æмæ сын ныййарджытæ алыгъуызон мадзæлты рæстæджы бакæнынц алыгъуызон æххуыс. Фæкæсынц сæм, мадзæлттæ кæм фæуадзынц, уыцы хатæнтæ сфæлындзыны хъуыддаджы дæр.
Рæвдауæндоны алцæмæй дæр барухс мæ зæрдæ. О, фæлæ афтæ нæ зæгъдзынæн рæвдауæндоны кæртæй. Кæрт у уæрæх, фæлæ дзы хæрз цъус ис, сабиты чи сцымыдис кæна, сæхимæ сæ чи æлваса, ахæм къуымтæ æмæ бынæттæ. Кæрты бæлæстæ кæй нæй, уый аххосæй сабитæн фадат нæй, цæмæй сæрдыгон тæвд бонты ахъазой аууоны.
ГÆЗЗАТЫ Иван
Comments are closed, but trackbacks and pingbacks are open.