Историйы сусæгдзинæдтæ арф æмæ вазыгджын сты. Æнустæ  рохуаты фæлмы стыхтой бирæ ахсджиаг цаутæ. Иунæг историкæн æмæ археологæн дæр уыдон рафæлгъауын кæронмæ йæ къухы никуы бафтдзæн, уымæн æмæ цалдæргай æнусты сæрты æрхæццæ сты. Фыдæлты цардæй ахуыргæндты руаджы цы бирæ иртасæнтæ, фольклорон бынтæ, цæстуынгæ æрмæджытæ  баззад, уыдон дæр кæронмæ рæстдзинад æвдисæг не сты.

Уæдæ чи уыди, дыууадæсæм æнусы чи царди, уыцы Мария Ясыня? Ирон историктæ куыд зæгъынц, афтæмæй алайнаг князы чызг. Фæлæ æцæг афтæ у, уый бынтон сбæлвырд кæнын тынг зын у.

Мария Ясыня – Ясская уыд владимираг князь Всеволод Большое Гнездойы бинойнаг. Всеволод йæхæдæг уыд Мæскуыйæн бындур сæвæрæг Юрий Долгорукийы дæсæм фырт. Долгорукийы киеваг князы куывды фæхъæстæ кодтой æмæ амард. Всеволод уæд уыд хæрз чысыл æмæ сæ йæ хистæр æфсымæр, æндæр мадæй гуырд, Андрей Боголюбский, сæ хæдза-рæй ратардта йæ мадимæ. Долгорукийы идæдз Ольга (кæмдæрты Елена) йæ чысыл фыртимæ ацыд Византимæ йæ цæгатмæ. Цалдæр азы фæстæ æрыздæхт Уæрæсемæ. Андрей Боголюбскийы зæрдæ уæдмæ фæфæлмæн йе ‘фсымæр Всеволодмæ. Йæ фырттæ æмæ æфсымæртимæ йæ арвыста йæ фыды марæг, князь Мстислав Изяславичæй Киев байсынмæ.

Долгорукийы цот байстой Киев æмæ дзы цасдæр рæстæг хицауиуæг дæр акодтой. Уыцы хæстыты рæстæг стыр хъæбатырдзинæдтæ равдыста Всеволод, фæлæ уæдмæ амардтой Андрей Боголюбскийы.

Уæдæ куыд базонгæ уыдаиккой Всеволод æмæ алайнаг чызг Мария? Уый тыххæй историктæ æрхастой цалдæр варианты. Цæвиттон, Всеволод йæ мад Ольгаимæ Константинополæй (Византийæ) Уæрæсемæ куы раздæхтысты, уæд сæ фæндаг ракодтой Тифлисыл сæ хæстæджыты феныны тыххæй. Ольга æмæ паддзах Тамары фыд Георгий-3 уыдысты дыууæ мадызæнæджы цот – Давид Аразæджы хъæбулы хъæбултæ. Æвæццæгæн, Георгийы бинойнаг, алайнаг паддзах Худаны чызг, Бурдухан, уæд базонгæ кодтаид Всеволоды йæ хæстæг чызг Марияимæ. Историон æрмæджыты ма ис ахæм цау дæр: паддзах Георгимæ 1170 азы æрцыд уазæг Константинополæй æмæ сын уыд чындзæхсæв ирон кнзы чызгимæ, фæлæ чи уыдысты, уый бæрæг нæу, нæй дзы бæлвырд нæмтты кой. Ясыняйæн йæ ирон ном дæр историйы нæ баззад. Княгиня Ясская – Ясыня сси фæстæдæр, Уæрæсейы князады.

Историктæй ма бирæтæм ис ахæм вариант дæр: киеваг князтæ алантимæ хæстыты рæстæджы ракодтой бирæ уацайрæгтæ. Уыдонимæ, гæнæн ис, æмæ уыдаиккæй Марияйы бинонтæ дæр. Афтæмæй фембæлдаиккой алайнаг рæсугъд чызг æмæ Всеволод. Фæлæ уымæн дæр ницы бындур ис.

Диссаг у – Мария Уæрæсейы князады цы стыр фæд ныууагъта, уый. Æрмæст йæ сывæллæттæ уыдысты дыууадæс, уыдоны цот, цоты цотимæ – 115. Всеволоды “Большое гнездо” дæр уымæн схуыдтой. Фæлæ канд сæ нымæцæй нæ уыдысты зындгонд. Уæрæсейы кад сæ рæстæджы схызт иууыл бæрзонддæр æмвæзадмæ. Ракæнæм дзы цалдæры кой: Александр Невский – Уæрæсейы князадæн ном скæнæг йæ хъæбатырдзинæдты тыххæй, Дмитрий Донс-кой – Куликоваг хæсты хъæбатыр, Даниил Московский – Мæскуыйы фыццаг феодалон князь, Иван Грозный – уырыссаг паддзахады æрбаиугæнæг, тæтæр-монголты ныхмæ хъæбатырæй чи фæмард, уыцы Георгий, Святослав, Василий Ростовский… Се ‘ппæт дæр уырыссаг историйы ныууагътой стыр фæд. Бафиппайын хъæуы уый, æмæ Всеволод æмæ Мария Ясыняйы цотæй чырыстон дины сыгъдæг удтæ кæй систы 17 адæймаджы.

Всеволод Большое Гнездо æмæ Мария Ясыняйы къайад фидар тæгтæй сбаста Уæрæсе æмæ Аланты бæстæ. Уый йæ лæгæн æрмæст бирæ цот нæ балæвар кодта, фæлæ чырыстон дины рæзтыл зæрдиагæй архайдта йæ царды бонты, уый та уæды заманы стыр кады хъуыддаг уыд. Уый уыд зондджын æмæ дардмæуынæг, йæ рæстæджы ахуыргонд. Уарзта чин-гуытæ, ахуырад, ахадгæ æххуыс кодта аргъуанты арæзтадæн, дины чингуытæ уадзынæн, иконæтæ фыссынæн, æххуыс кодта мæгуыртæн, рынчынтæн. Кæддæриддæр йæ лæ-джы фарсмæ уыд паддзахадон хъуыддæгты дæр. Уый-иу дард куы уыд, уæд-иу йæ къухмæ райста ахсджиаг лыггæнинаг фарстатæ,  арæзта ахсджиаг бадзырдтæ.

Йæ мæлæты размæ æрбынат кодта моладзандоны. Йæ цотæн бафæдзæхста хæларæй цæрын, Хуыцауы нымайын, хистæртæн аргъ кæнын, рæстаг æмæ æгъдауджынæй цæрын æмæ, сæйрагдæр, фыдыуæзæг хъахъхъæнын.   Мария Ясыня уыд,  чырыстон сыгъдæг удтæм фыццагдæр кæй ном бахауд, уыдонæй иу. Марияйы фæстæ йын йæ хъуыддæгтæ адарддæр кодта йæ фырттæй иу – Константин. Уæрæсейы алы къуымты сарæзта бирæ аргъуантæ, моладзандонтæ, духовон семинартæ, дины чингуыты библиотекæтæ…  Йæ мæлæты фæстæ уый дæр хаст æрцыд чырыстон дины сыгъдæг удтæм. 

Бæрæг куыд у, афтæмæй ма Марияйæн уыд дыууæ хойы. Сæ иу, Елена, уыд новгородаг князь Ярославы бинойнаг, иннæ, Марфа, смой кодта черниговаг князь Мстислав Святославичæй. Амыдтой сæ Шварны чызджытæй.

Ныр рахизæм сæйраг фарстамæ. Чи уыди Мария Ясыня? Æцæгдæр алайнаг чызг уыд æви æндæр адæмыхаттæй? Уый фæдыл ис алыхуызон хъуыдыгæнджытæ. Историон наукæты кандидат Сергей Перевалов разы нæу ирон историктимæ, кæцытæ фæстаг азты æнæрцухæй дзурынц æмæ фыссынц, Мария алайнаг князы чызг кæй уыд. Уый худы ирон адæмыл, сæхицæн уымæй кæй ном кæнынц, ууыл æмæ æрхаста историон наукæты доктор Бзарты Русланы ныхæстæ йе ‘рмæг “Мария, но не Ясыня”,- зæгъгæ, уым: “Все интересующиеся русской и аланской историей прекрасно знают, что Мария была аланской княжной, дочерью князя, владевшего стольным городом и княжеством, женой великого князя Владимирского, сына Юрия Долгорукого, с именем которого связано основание Московского княжества и последующей династии – она была женой Всеволода-3 Большое Гнез-до. Эта пара – предки династии Московских великих князей и царей… Среди детей, внуков и правнуков Марии Ясыни несколько десятков святых русской церкви, не говоря уже о ней самой”… (Свободный взгляд”, 08. 07. 2016г.).

Перевалов разы нæу Русланы хатдзæгтимæ æмæ амынд æрмæджы æрхаста йæхи хъуыдытæ:

“Никаких следов алано-осетинского происхождения за Шварном не прослеживается. Все Шварны, судя по фактам и биографии, принадлежали к элите древнерусского общества… Мария – представительница русского княжеского сословия воспитала детей согласно требованиям тогдашней православной веры. Ничего аланского, ничего осетинского.

Все сложные конструкции, возводящие начало знакомства Всеволода и Марии, как дочери правителя Аланского княжества, основаны только на горячем желании дополнить перечень занимательных событий аланской истории еще одним интригующим сюжетом”.

Фыццагдæр Мария Ясыняйы биографи равзарыны хæс йæхимæ чи райста, уый уыд 18-æм æнусы зынгæ фыссæг æмæ историк Николай Карамзин. Уымæн йæ азфыстытæ ссардтой архивты æмæ дзы Ясыняйы тыххæй зæгъы: “Отчество Марии Шварновны указывает, что она была дочерью не то чешского, не то богемского князя Шварна”.

Карамзины хъуыдыйы ныхмæ радзырдта историон наукæты доктор Людмила Морозова æмæ йæ уац “Великая княгиня Владимирская”-йы æрхаста йæ хатдзæгтæ: “Предположение Карамзина о том, что жена Всеволода Большое Гнездо была Богемской или чешской княжней, вряд ли обоснованно, поскольку прозвище Марии-Ясыни прямо указывает на то, что по национальности она была яской – осетинкой”.

Афтæ хъуыды кæны Мæскуыйы епархийы протоиерей, фыд Всеволод дæр: “Мария Аланская – потрясающий пример того, как представительница сильного, гордого народа, известного своими историческими свершениями, повлияла на судьбу России”.

Морозова ма куыд бæлвырд кæны, афтæмæй Андрей Боголюбскийы дыккаг ус æмæ Мария уыдысты хæстæджытæ, дыууæ дæр уыдысты Цæгат Кавказæй. Уымæн æвдисæн у Андрейы фырт йæ дыккаг усæй Юрий Боголюбскийы хъысмæт. Уый йæ фыды мæлæты фæстæ ацыд Кавказмæ æмæ ракуырдта гуырдзиаг паддзах Тамары. Уымæн уый йæ къухы бафтыдаид æрмæстдæр йæ мады хæстæджыты æххуысæй, уымæн æмæ уæды рæстæджы Гуырдзыстонæн Уæрæсейы князадимæ ахæм æнгом бастдзинæдтæ нæма уыд.

Мария Ясыняйы канд чехаг князы чызг нæ хонынц, фæлæ ма немыцаг, стæй польшæйаг дæр, фæлæ бæрæг куыд у, афтæмæй амынд бæстæты бирæ архивтæ федтой историктæ, фæлæ дзы иу ран дæр ном Шварн никуы разынд. Фæлæ ацы ном бирæ рæтты æмбæлы, уырыссаг князтæм алантæй хæстæг чи уыд, уыдоны нæмт-ты. Уыдонæй, гæнæн ис, æмæ исчи уыдаид Марияйы фыд.

Мария Ясыняйы равзæрдыл фыццагдæр сдзырдтой Ярославлы ирон æхсæнады уæнгтæ. Сæ иу, философон наукæты доктор, Дадианты Тамарæ, цалдæр наукон куысты ныффыста уый тыххæй. Сæ куырдиатмæ гæсгæ Ясыняйыл арæзт æрцыд документалон киноныв. Ныр та курынц амынд горæты йын цыртдзæвæн сæвæрын.

Ясыняйы номыл сæрмагонд мадзæлттæ вæййы нæ республикæйы аргъуанты дæр. Фидæн азы Аланийы аргъуыды 1100 азы бæрæгбонмæ Дзæуджыхъæуы епархи æмæ нациты хъуыддæгты фæдыл министрад рахастой фæндон, йæ хуызистимæ йын юбилейон æхца рауадзын.

Афтæ у историйы хъуыддаг. Иунæг ахуыргондæн дæр бæрæг бæлвырд дæнцæгтæ æрхæссын йæ бон никуы бауыдзæн. Иууылдæр дзурынц зæрдæаивæй, археологон ссарæггæгты, архивты æрмæджытыл æнцой кæнгæйæ. Ирон адæм та бирæ не сты æмæ алыран дæр агурынц сæ фыдæлты фæд. Мария Ясыня кæд æцæг алайнаг чызг уыд, уæд ахæм чызджытæй мах хъуамæ сæрыстыр уæм…

   Æрмæг мыхуырмæ бацæттæ

      кодта  ДЖУСОЙТЫ  Нинæ

Comments are closed, but trackbacks and pingbacks are open.