Курдиатджын фысджытæ, зындгонд ахуыргæндтæ цы адæммæ ис, уыдон хъæздыг æмæ тыхджын сты, цыфæнды чысылнымæц куы уой, уæддæр. Уыдон алывæрсыгæй æвдисынц сæ адæмы истори, æгъдæуттæ, культурæ. Сæ руаджы æндæр адæмтæ базонгæ вæййынц сæ цардыуагимæ.
Фæлæ нæ ахуыргæндтæ æмæ фысджытæн сæ куыстытæ, се сфæлдыстад чи æвзары æмæ сæ адæмы размæ чи хæссы, уый къаддæр арфæйаг куыст нæ кæны. Уыдонæй у зынгæ литературæиртасæг, УФ-йы Фысджыты цæдисы уæнг, педагогон зонæдты кандидат, ахуыргæнæг-методист Мзокты Аслæнбег дæр.
Аслæнбег æрæджы рауагъдад «Ир»-ы цы зонадон-иртасæн æмæ ахуырадон-методикон чиныг рауагъта «Ирон аив дзырды дунейы», зæгъгæ, уымæй стыр лæвар ракод-та ахуыргæнджытæ, студенттæ æмæ скъолаты ахуырдзаутæн. Чиныджы редактор у филологон наукæты кандидат Куыдзойты Анжелæ, йæ редактор – Дзанайты Иринæ. Йæ рауадзынæн фæрæзтæй баххуыс кодта амалхъом Дзгойты Хъазыбег.
Чиныджы æрмæджытæ сты ирон æмæ уырыссаг æвзæгтыл. Ахуыргонд йæ ног чиныгмæ бахаста, алы азты национ литературæйы рæзт æмæ мадæлон æвзаджы ахадындзинады тыххæй цы зонадон куыстытæ фæфыста, уыдон. Чиныг арæзт у æртæ стыр хайæ: 1. Уацтæ ирон литературæйæ; 2. Итервьютæ фысджытимæ æмæ аивадон архайджытимæ; 3. Уроктæ ирон æвзаг æмæ литературæйæ.
Фыццаг хайы йæ критикон уацты бæлвырд æвзæрст æрцыдысты литературæ æмæ нæ фысджыты сфæлдыстады бирæ фарстатæ. Хаст æм æрцыдысты Колыты Аксойы, Темырболаты, Къостайы, Нафийы, Хъодзаты Æхсары, Агънаты Гæстæны, Малиты Васойы æмæ Гæздæнты Гайтойы сфæлдыстадон бынтæ.
Дыккаг хаймæ автор бахаста йæ интервьютæ фысджытæ Джусойты Нафиимæ, Хуыгаты Сергейимæ, Косты Лизæимæ, Касаты Батрадзимæ, Мамыкъаты Хъазыбегимæ, ахуыргæндтæ Куыдзойты Анжелæимæ, Бигъуылаты Ирæимæ, нывгæнæг Цæллагты Фатимæимæ… Ацы æрмæджытæн дæр сæ сæйраг темæ у не ‘взаг, нæ истори, нæ аивады фарстатæ
Æртыккаг хайы методикон амынддзинæдтæ автор афтæ бæлвырд бацамыдта æмæ ахуыргæнджытæн сты ахъаззаджы æххуыс. Уроктæм бахаста алыхуызон æрмæджытæ нæ фысджыты сфæлдыстадæй æмæ сæ равзæрста методикон æгъдауæй: пълантæ, фарстытæ, дзуаппытæ, хæслæвæрдтæ, æмдзæвгæтæ, сценаритæ, цæвиттонтæ, таблицæтæ, тесттæ, викторинæтæ, конспекттæ, интегративон уроктæ, терминологон дзырдуæттæ, презентацитæ, урок-ты темæтимæ баст аивадон æмæ критикон æрмæджытæ… Мзокы-фырт адон иууылдæр райста йæхи бæрæазон фæлтæрддзинадæй.
Ахуыргæнæг-методист Мзокты Аслæнбег стыр æвæрæн бахаста ирон литературæмæ, ахуырадон методикæмæ йæ диссаджы чиныгæй. Уымæн зæгъы: «Не ‘взаг нæ бындур кæй у, алцæмæн дæр йæ рахæцæн уым кæй ис, уый рох макæмæй уæд… Нæхæдæг куынæ уæм, уæд нæ наци æмæ не ‘мбисонды æвзаг бахъахъхъæныны тыххæй йе ‘нгуылдз уазал доны дæр ничи атулдзæн, уый бамбарын афон нын у. Кæд ма нæ уый фæнды, æмæ зæххы цъарыл, куыд этнос, баззайæм, кæцыдæр адæмтæ куыд фесæфтысты, афтæ ма фесæфæм, уæд æркæсæм нæ уавæрмæ æмæ йыл басæттæм, нæ наци æмæ не ‘взаг цæуынц сæфтмæ, æмæ бацагайæм наци бынсæфтæй бахъахъхъæныны механизмтæ, науæд райсом уыдзыстæм фæсмойнаг…».
Мзокты Аслæнбег стыр удуæлдай æмæ арфæйаг куыст бакодта, ахæм чиныг ирон адæмæн кæй балæвар кодта, уымæй æмæ арфæйаг уæд!
Нæ уацх.
