Кинойы нысаниуæг рагæй фæстæмæ дæр зындгонд у адæмы царды, сси сын уарзон æмæ йæм алы хатт дæр бакæсынц стыр æхцондзинады æнкъарæнтимæ. Хуссар Ирыстоны æмбæстæгтæн дæр сæ цымыдис тынг у кинонывтæм æмæ куыддæр фæзыны аивадон кæнæ документалон фильм, афтæ сын вæййы бæрæгбоны хуызæн. Кæй зæгъын æй хъæуы, фильмтæ иутæ сты хæстон темæйыл, æндæртæ райгуырæн бæстæмæ уарзондзинад, æвзонг цардбæллон æмкъæйтты сыгъдæг уарзт æмæ æндæр ахæмтæ.
Уыцы фильмтæй алкæмæн дæр ис йæхи киноуарзджытæ æмæ бакæсынц, сæ зæрдæмæ æввахсдæр цы киноныв вæййы, уымæ.Нæ раздæры областы цæрджытæн дæр киноаивад уыд уарзон æмæ йæм кодтой тынг цымыдис, лæууыдысты йæм æнгом æмæ дзы истой эстетикон æхцондзинад, хъомыл сæ кодта фыдыбæстæмæ уарзты æнкъарæнтыл, сæ зæрдæмæ арф истой æвæрццаг хъайтарты сурæттæ, ницæйаг та сын уыдысты æппæрццаг фæлгонцтæ.
Нæ киноуарзджытæн стыр лæггад кодта, Сталины уынгыл цы кинопрокат уыд, уый коллектив. Ацы уагдоны 22 азы намысджынæй фæкуыста, йæ хъуыддагыл æнувыд æмæ иузæрдион адæймаг Козаты Павел. Прокаты æдæппæт уыд 18 кусæджы, алкæмæн дæр сæ уыд хицæн хæстæ, куыстмæ сын уыд бæрндзинады ахаст æмæ æмбæлон æгъдауæй æххæст кодтой киноуарзджыты æрвылбонон домæнтæ. Уыимæ хъахъхъæдтой кинолентæты гъæд, цæмæй кино æвдисыны рæстæджы фильмы мацы къуылымпыдзинæдтæ уыдаид. Прокат фильмтæ иста Тбилисæй æмæ цы фильмтæ иста, уыдон-иу баззадысты бынаты. Кæй зæгъын æй хъæуы, киноныв райдианы хъуамæ æвдыст цыдаид горæты, ацы ран уыд цалдæр кинотеатры æмæ иу фильм фыццаг æвдыстой иу бынаты, стæй та уый фæстæ иннæтыл дæр æрзылд. Уæд горæты киноуарзджытæ дзæвгар уыд æмæ алы сеансмæ дæр адæм цыдысты бирæгæйттæй. Уый фæстæ фильмтæ æрвыстой фыццаг Дзаумæ, стæй Къуайса, Ленингор, Знауыр æмæ Цхинвалы районмæ. Зæгъæм, иу районы ис, кинонывтæ кæм æвдыстой, ахæм клубтæ 10-12, уæд сын æрвыстой фылдæр кинонывтæ 14 кæнæ 15, цæмæй-иу уыцы клубтæ ма фæстиат кодтаиккой. Прокат фылдæр хатт кинофильмтæ алы районмæ дæр хæццæ кодта йæхæдæг, стæй сæ уыдон та сæхи рады æрвыстой сæ бæрныуæвæг хъæутæм.
Зæгъдзынæн мæ райгуырæн Къостайыхъæуы киномеханикты куысты тыххæй дæр. Зæгъын хъæуы, фильм равдисыны хъуыддаджы стыр фыдæбон хъуыд киномеханикы, чысыл аипп дæр ын нæ барстой киномæкæсджытæ. Райдианы дзы киномеханикæй куыста горæттаг Гæззаты Амиран, уый фæстæ азты киноуарзджыты домæнтæ æнæкъуылымпыйæ æххæст кодтой Мамиты Елиоз, тъбеттаг Гаглойты Ило, сатихъайраг Дыгъуызты Жора, Хетæгкаты Эльбрус, Джиоты Федыр æмæ æндæртæ. Сæрмагондæй зæгъдзынæн фæстаг дыууæ кусæджы тыххæй. Хетæгкайы фырт клубы сæвæрдта сæрмагонд аппарат æмæ киноныв æвдисыны хæдразмæ цæрджытæ хъуыстой ирон æмæ уырыссаг зарджытæм. Джиойы фырт ма горæты прокаты дæр кæй фæллой кодта, уымæ гæсгæ фылдæр ногдæр кинонывтæй æххæст кодта йæ райгуырæн хъæуы цæрджыты домæнтæ.
ХУЫБИАТЫ Никъала
