Нæ горæты 11-æм скъолайы уырыссаг æвзаг æмæ литературæйы ахуыргæнæг Цоциты Ингæ йæ квалификаци фæбæрзонддæр кæныны нысанæн ис Нижний Новгороды. Уым ныридæгæн лекцитæм хъусынц, фæсарæнты чи цæрынц, уыцы æмфыдыбæстæйон ахуыргæнджыты къорд.
Сæ ахуыртæ организацигонд æрцыдысты «Россотрудничество»-йы æххуысæй. Цхинвалы Уырыссаг хæдзары кусджытæ куыд хъусын кæнынц, уымæ гæсгæ Нижний Новгороды уагъдцæуæг мадзæлтты хайад исынц 30 бæстæйæ. Ахуыргæнджытæ, сæйраджыдæр, байхъусдзысты лекцитæм, хайад райсдзысты мастер-класты æмæ ма сын сараздзысты экскурси, Александр Пушкин 1830 азты кæм цард æмæ кæм фæлдыста, уыцы хъæу. Большое Болдиномæ. Уым йæ номыл ис стыр литературон музей «Болдино» æмæ фæсарæйнаг ахуыргæнджытæн фадат уыдзæнис, цæмæй лæмбынæгдæр базонгæ уой музейы цымыдисон æрмæджытимæ.
Ахуыргæнджытæн сæ ахуыр Уæрæсейы ахъаз кæй уыдзæн, стæй сыл хорз тæлмæнтæ кæй ныууадздзæн, ууыл дызæрдыггæнæн нæй. Уымæн æмæ сын бацæттæгонд программæ у тынг хъæздыг æмæ цымыдисон.
Нæ уацх.
