Республикæ Хуссар Ирыстоны Сырх Дзуары Æхсæнадæмон Комитет кусы, 1991 азы райдианы махмæ уавæр куы скарз, уæдæй нырмæ æмæ йæ нысан æмæ хæстæн ис гуманитарон характер. 1990-2008-æм азты конфликты фæстиуæгæн æбæрæгæй чи фесæфт, уыдоны хъысмæт æмæ бынат базонын у комитеты приоритеттæй иу. Организацийæн бастдзинæдтæ ис хицауады æппæт æмбæлон структурæтæ æмæ æбæрæгæй фесæфджыты бинонтимæ, цæмæй сын рабæрæг кæной сæ хъысмæт. Уыцы нысанæн Комитеты кусджытæ ауагътой 30 фембæлды æбæрæгæй фесæфджыты бинонтимæ. Организаци æрцыд 4 зæрдылдарæн мадзалы æбæрæгæй фесæфджыты бинонты уæнгты хайадистæй психосоциалон æххуысы Программæйы фæлгæтты. Афтæ ма ауагъд æрцыд æндæр мадзæлттæ дæр.
Гуманитарон æххуыс
Комитет дарддæр дæр æххуыс кæны цæрджыты иууыл æххуысхъуагдæр категорийы адæймæгтæн. Уыдонæн бынатмæ баласта алы кварталы дæр хæлцадон æмæ æнæхæлцадон продукттæ. Ахæмтæ уыдысты 240 адæймаджы бæрц. Цы хæлцадон пакеттæ сын байуæрстой, уыдон нымæц у 1, 419; гигиенæйы фæрæзтæ та 473.
Уымæй дарддæр ма хъармгæнæн сæвæрдтой иу хатæны, цалдæр ацæргæ æмæ иунæгæй цæрæг адæймæгты сфитонг кодтой цæрæн вагæттæй. Иууыл уæззаудæр уавæры уæвæг 8 адæймагæн баххуыс кæныны тыххæй сæм бацыдысты 228 хатты.
Комитеты кусджытæ бацæуынц ахæстонмæ, ахасты уавæртæ бабæрæг кæныны. Бинонтæй сын барвыстæуыд дыууæ æрвитæггаджы. Барвыстæуыд сын Сырх Дзуары 3 ныстуаны бинонтæн ахæстæттимæ бастдзинады нысанæн.
Медицинон æххуыс
Æмбæстæгтæн се ‘нцой балæууыны хуызтæй иу у ортопедион лæггад бакæнын. Куыд нейтралон организаци, афтæ Сырх Дзуары Æхсæнадæмон Комитет хицауадимæ кæны æмархайд, куы бахъæуы, уæд пациентты фæхæццæ кæны æмбæлон медицинон уагдонмæ. Цæвиттон, банысангонд рæстæгмæ ацыдысты 122 хатты æмæ аластой 116 пациенты, уыцы нымæцы сæ 83 хатты аластой æвæстиатæй. 8 æмбæстагæн та бакодтой ортопедион æххуыс.
ХУЫБИАТЫ Никъала
