1-æм декабры Хуссар Ирыстоны делегаци республикæйы Президент Бибылты Анатолийы сæргълæудæй хайад райста – Дзæуджыхъæуы РХИ-йы адæмон нывгæнæг Козаты Ушангы мард бавæрыны церемонийы.

Делегацийы сконды уыдысты Президенты Администрацийы къухдариуæггæнæг Козаты Игорь, РХИ-йы Хъахъхъæнынады министры хæстæ æххæстгæнæг Гассеты Ибрагим, Генералон прокурор Дзæгъиаты Уырызмæг, Культурæйы министрады, Нывгæнджыты цæдисы, паддзахадон драмон театры минæвæрттæ æмæ культурæйы æндæр архайджытæ Зассеты Жаннæйы сæргълæудæй.

Бибылты Анатоли бахатыд Республикæйы фыццаг Президент Цыбырты Людвигмæ, цæмæй Хуссар Ирыстоны делегацийы номæй раныхас кæна фыдохы митинджы.

«Адæмæн ном кæнынц интеллигенцийы минæвæрттæ æмæ махæн тынг зын у, ахæм адæймæгтæ æмгъуыдæй раздæр кæй ацæуынц цардæй. Ацы бонты уыдис Козаты Ушангы куыстыты равдыст, кæцымæ æрбацыдысты бирæ адæм, уыдоны нымæцы зындгонд уæрæсейаг нывгæнджытæ. Абон уый не ‘хсæн нал ис, фæлæ йе сфæлдыстад æнустæм баззайдзæн ирон адæмы истори æмæ культурæйы», – загъта уый.

Цыбырты Людвигы ныхæстæм гæсгæ Козаты Ушанг æрмæст стыр нывгæнæг нæ уыдис, кæцыйæн аккаг æрцыдысты бирæ хорзæхтæ æмæ нæмттæ, фæлæ ма уыд иттæг хорз адæймаг дæр, йæ Райгуырæн бæстæйы патриот, кæцы бирæ уарзта йæ адæмы.

«Хуссар Ирыстон иууыл уæззаудæр рæстæджытæ куы æвзæрста, уæд уый уыдис, сæ адæмы чи уарзтой æмæ сæ сæрыл чи тох кодтой, уыцы æцæг патриотты нымæцы. Хуссар Ирыстоны иууыл уæлдæр паддзахадон хорзæх – «Уацамонгæ»-йы орденæй хорзæхджын цæуынц, хæстон архайдтыты чи фесгуыхтысты, уыцы хъайтартæ, кæцыты ‘хсæн ис Козаты Ушанг дæр. Уый та дзурæг у Хуссар Ирыстоны хæдбардзинадмæ йе стыр бавæрдыл», – банысан кодта Цыбырты Людвиг.

Comments are closed, but trackbacks and pingbacks are open.