Хицауады Сæрдары фыццаг хæдивæг Джиоты Алан æмæ Зонад æмæ ахуырады министр Лолаты Аслан рæзты хицæндзинæдтимæ сывæллæттæн коррекцион æххуыс фæхуыздæр кæныны куысты фæлгæтты басгæрстой скъола-интернаты коррекцион блокæн ифтонггæрзты радон парти.
Уый размæ, республикæйæн æддейæ цæрæг не ‘мбӕстӕгтӕ – Джиджджойты Виктор ӕмӕ Уалыты Роман, Хицауады сӕрдары фыццаг хӕдивӕг Джиоты Аланы куырдиатмӕ гӕсгӕ æлхæд ӕмӕ лӕвӕрд ӕрцыдысты эллиптикон тренажертӕ ӕмӕ сæрмагонд спортивон-лидзæн аппараттæ адаптивон физикон культурӕйы кабинетӕн.
Ацы бонты Цхинвалы скъола-интернаты коррекцион блокы ЛФК-йы кабинетӕн лӕвӕрд ӕрцыд сӕрмагонд ифтонггарзы радон парти.
Комплексон ифтонггарзы сконды сты гантельтӕ, хъазӕн ӕмӕ массажгӕнӕн пуртитӕ, сур бассейн, батут, рӕзтæн ахъазгæнæн тактикон æмбырдгæндтæ ӕмӕ афтæ дарддæр.
Ӕлхӕд ифтонггæрзты иумӕйаг аргъ у цалдӕр милуан сомы.
ЛФК-йы кабинеты сӕргълӕууӕг Беппиты Миленӕ куыд загъта, афтӕмӕй ног ифтонггарз феххуыс уыдзӕн сывӕллӕттимӕ эффективонæй кусынӕн.
«Не ‘мзæххонты ӕххуысы фæрцы райстам уӕлӕмхасӕн инвентарь, кӕцы феххуыс уыдзӕн сывӕллӕтты проблемӕтыл хуыздæрæй бакусын, уыимӕ иумæ психомоторон функцитæ хæлд кæмæн сты, уыцы сывæллæттимæ. Змӕлынгӕнӕн активондзинад цырын кӕны сӕры магъзы рӕзт, ӕмӕ ӕххуысгӕнӕг базӕ цас алыхуызондӕр уа, уыйас у хуыздӕр», – загъта Беппиты Миленӕ.
Хицауады Сӕрдары фыццаг хӕдивӕг Джиоты Аланы ныхӕстӕм гӕсгӕ, кабинеттӕ нырыккон ифтонггарзӕй ифтонг кӕнын у ӕнӕмӕнгхъӕугӕ элемент сывæллæтты рӕзты хицӕндзинӕдтимӕ коррекцион ӕххуысæн.
«Мах дарддӕр кусӕм, психофизикон рӕзты хицӕндзинӕдтӕ кӕмӕн ис, уыцы сывӕллӕттимӕ коррекцион куысты системӕ хуыздӕр кӕныныл. Техникон ифтонгады фарстатӕ скъуыддзаг кӕныны хъуыддаджы нын ӕххуыс кӕнынц не ‘мбӕстӕгтӕ. Уый тыххӕй та сын радон хатт зæгъын бузныг», – загъта Джиоты Алан ӕмӕ банысан кодта, зӕгъгӕ, Хицауад дарддӕр кæй кусдзæн скъола-интернаты бындурыл коррекцион центр саразын. Уый ӕххӕст кӕндзӕн ӕппӕт хъӕугӕ мадзӕлтты комплекс сывӕллӕтты рӕзты хицӕндзинӕдтимӕ баст проблемӕтӕ рабӕрӕг, баххуыс ӕмӕ сӕ фӕкъаддӕр кӕныны тыххӕй.
«Куысты къабӕзтӕй сæ иу у специалистты ногæй бацæттæ кæнын – дефектологты, логопедты, тюторты – ХИПУ-йы фӕзуаты ӕмӕ сывæллæттыл æмбæлон экспертизæ рауæрæх кæныны фæдыл психологон-медикон-педагогон къамисы архайд.
Рæзты хицæндзинæдтимæ сывӕллӕттӕн ӕххуысы проблемӕ республикӕйы у тынг вазыгджын. Ӕнӕххӕст бӕрӕггӕнӕнтӕм гӕсгӕ коррекцион ахуыргӕнджыты ӕххуыс цы сывӕллӕтты хъæуы, уыдоны нымӕц у 450 бӕрц, уыцы нымӕц азӕй-азмӕ рӕзы 12-20 проценты бӕрц ӕмӕ махӕн уыцы тӕссагдзинӕдтӕ ницӕмӕ дарын нӕ бон нӕу. Фарстмæ сӕрмагонд хъусдард дары паддзахады сӕргълӕууӕг», – банысан кодта Лолаты Аслан.
Нæ уацх.
