Фыстæджытæ фронтмæ

Гуманитарон æххуысы радон парти ирыстойнаг æфсæддонтæн æрæмбырд кодтой Ленингоры районы цæрджытæ. Уыдон бынатмæ фæхæццæ кодта районы сæргълæууæг Гæджиты Иларион. «Æз, æппынæдзух бастдзинад дарын Хуссар Ирыстонæй сæрмагонд æфсæддон операцийы хайадисджытимæ. Махæй фронтмæ ацы æххуыс фыццаг нæу. Æрæджы дæр ныхас кодтон лæппутимæ, уыдон мын фехъусын кодтой цух цæмæй æййафынц, уый тыххæй. Фыццаджыдæр мæ хъуыды загътон  районы хъæууон администрациты сæргълæуджытæн. Байгом кодтам гуманитарон æххуысы пункт. Æрсидтыстæм æгас районмæ, цæмæй фронты цы лæппутæ ис, уыдон тыххæй æрбангом уæм æмæ сын баххуыс кæнæм. Кæй фæнды, уыдон исæн пунктмæ æрбахæссой хъарм дзаумæттæ, хойраджы продукттæ, кæнæ æхцайы фæрæзтæ. Бахатыдыстæм ма сæм, цæмæй сывæллæттæн ныффыссын кæной фыстæджытæ мингай километр дарддæр чи сты, уыцы æфсæддонтæм. Æмæ æцæг алы къоппы дæр лæвæрдтæй дарддæр уыд открыткæтæ æмæ фыстæджытæ дæр. Ам уæлдай активондæр уыдысты Цъинагары зонæйы цы сабидон æмæ скъолаты ахуыргæнинæгтæ ис, уыдон. Сабиты фыстæджытæ уæлдай æхсызгон уыдысты æфсæддонтæн. Нывтыл конд уыд – тохы быдыр сабиты цæстæй. Алы фыстæджы дæр сныв кодтой нæ бæстæйы тырыса. Цъинагары скъолайы ахуыргæнинаг Быценты Вячеслав та «æнæзонгæ салдат»-мæ ахæм фыстæг ныффыста. «Зынаргъ ирон æфсæддон! Махæн æхсызгон вæййы сæрмагонд æфсæддон операцийæ куы райхъуысы искæцы ирыстойнаг æфсæддоны сгуыхтдзинад. 23-æм февралы мыл сæххæст 15 азы æмæ мæм фæзынд иу фæндон, цæмæй сымахæй алчидæр сæрæгасæй æрæздæха йæ райгуырæн зæхмæ. Æз дæр æнæмæнг сымахау уыдзæн «Фыдыбæстæ хъахъхъæнæг» – фыссы Вячеслав.

Ленингоры районæй Запорожьейы областмæ цы гуманитарон æххуыс аластой, уымæ сæ хайбавæрд бахастой Цхинвалы 2-æм скъола дæр. Уыдон арæх æрвитынц гуманитарон æххуыс нæ хæцæг лæппутæм», – радзырдта нын Гæджиты Иларион.

Ленингоры районы сæргълæууæг сæрмагондæй йæхæдæг æрзылд 4-æм базæйы æфсæддон позицитыл æмæ байуæрста гуманитарон æххуыс. Къоппыты уыд бирæ мыд æмæ хæдзарон консервтæ.

Алы лæвар дæр зынаргъ у фронтæн, фæлæ сабиты фыстæджытыл тынг фæцин кодтой хæстонтæ. Уыдон дæр ныффыстой бузныджы фыстæг сывæллæттæм æмæ йæ рарвыстой Гæджийы фыртæн. «Ныртæккæ цы хæццæ дуг у, уый æрмæст УФ адæмы уæззау фæлварæн нæу. Украинæйы хæсты цы ирон лæппутæ хайад истой уыдон сгуыхтдзинæдтæй сæрыстыр уыдзыстут сымах. Афтæ уыд Стыр Фыдыбæстæйон хæсты заманы дæр. Гæххæттыл нæм уæ гыццыл къухтæй цы æнкъарæнтæ ныффыстат, мах уыдонæн аргъ кæнæм. Хуссар Ирыстоны адæмæй фылдæр гуманитарон æххуыс ничи æрвиты йæ хæстонтæн. Мах  сæ адих кæнæм нæ фарсмæ уæхски-уæхск чи тох кæны, уыдонимæ. Уæ фыстæджытæ уын бахъахъ-хъæндзыстæм æмæ уæлахиз куы нысан кæнæм, уæд сæ иумæ бакæсдзыс-æм», – ахæм хъарм фыстæг рарвыстой фæстæмæ ирон лæппутæ, Ленингоры районы сывæллæттæм.

УАЗÆГТЫ Марфæ