Республикæ Цæгат Ирыстон-Аланийы Къостайы номыл паддзахадон университеты ирон филологийы факультеты студенттæ æмæ ахуыргæнджытæн зæрдиаг фембæлд уыд фыссæг, ахуыргонд, Ирыстоны Фысджыты цæдисы æмсæрдар, Къостайы номыл паддзахадон премийы лауреат, æхсæнадон архайæг Хъазиты Мелитонимæ.

Фембæлдмæ фæхуыдтой Ирыстоны адæмон фысджытæ, Къостайы премийы лауреаттæ — Ирыстоны Фысджыты цæдисы иннæ æмсæрдар Ходы Камал, сабиты журнал «Ногдзау»-ы сæйраг редактор Дзасохты Музафер, чиныгуадзæн «Ир»-ы хистæр редактор Хуыгаты Сергей, Фысджыты цæдисы сæрдары хæдивæг Агънаты Гæстæн, профессор, ахуыргæн-джытæн ахуыргæнæг Къомайты Риммæйы æмæ æндæр уазджыты.

Фембæлд амонæг, педагогон зонæдты кандидат, ЦИПУ-ы ирон æвзаг æмæ литературæйы кафедрæйы доцент Безаты Фаризæ сарæзта цыбыр æмæ бæстон афæлгæст Мелитоны цард æмæ сфæлдыстадыл. Куыд загъта, афтæмæй ахæм фембæлдтытæ студенттæн  стыр  æххуыс сты сæ ахуыры фыссæджы сфæлдыстад лæмбынæгдæр базоныны тыххæй, стæй сæ иумæйаг цæттæдзинадæн. Уæлдай æххуысдæр та сын уыдзысты, скъолатæм кусынмæ куы ацæуой, уæд, фыссæджы сфæлдыстад сабитæн амонгæйæ.

Мелитон сæ хæрз цыбыртæй куы базонгæ кодта йæ биографион зонæнтимæ, уæд уазджытæ æмæ фысымтæ дзырдтой фыссæджы аивадон æмæ зонадон сфæлдыстадыл.

Развæлгъау афтæ кæй бадзырдтой, зæгъгæ, абон æппæлгæ ма кæнæм, æрмæстдæр дзурдзыстæм Хъазийы-фырты сфæлдыстадыл, уый тыххæй Ходы Камал загъта: «Сымах зæгъут, зæгъгæ, абон æппæлгæ ма кæнæм. Æрмæст, дам ын йæ уацмыстыл дзурæм… Æмæ цæмæннæ хъуамæ æппæлæм, æппæлинаг чи у æмæ цы у, уымæй?

Æз æвзæр нæ зонын Мелитоны сфæлдыстад. Сæрмагондæй фæкастæн йæ чиныг «Цатыр». «Цатыр»-ы ис бирæ… тынг бирæ хорз æмæ тынг хорз уацмыстæ. Адæймаджы зæрдæ сæ рухс кæны. Куы сæ кæсай, уæд дæ æфтауынц фидæныл сагъæс кæныныл.

Мелитонмæ æз хæлæг кæнын… Мæнæ «белая зависть» кæй хонынц, афтæ йæм хæлæг кæнын, уыйбæрц хорз хъуыддæгтæ аразын æмæ йын æппынæдзух кусын кæй æнтысы, уый тыххæй… Мæнæн бирæ хорз хæлæрттæ уыдис. Уæдæ, Бестауты Гиуæрги, Дзаболаты Хазби… Нымайгæ сæ нæ кæндзыстæм.

Ныр дæр мын ис хорз хæлæрттæ. Æмæ мæ уыцы хорз хæлæрттæй, далæ ма студент куы уыдис, уæдæй фæстæмæ Мелитон кæй у, уымæй дæн сæрыстыр». Ахæм ныхасы хъæдæй дзырдта Дзасохты Музафер дæр. Ома, йын æрмæст йæ уацмыстæй æмæ хъуыд-дæгтæй нæ, фæлæ: «Мелитон нæ журнал «Ногдзау»-ы редколлегийы уæнг кæй у, уымæй дæр стæм сæрыстыр». Уæлтæмæн ныхас кодта Мелитоны сфæлдыстад æмæ удыхъæды тыххæй Хуыгаты Сергей. Профессор Къомианы ныхас та уыдис бынтон цымыдисон: «Мæнæн абон ирон филологийы факультет скодтой стыр кад. Æрбахуыдтой мæ Иры хуыздæр поэттæ æмæ прозаиктимæ фембæлдмæ. Æмæ уын бузныг…

Мелитон, ды та æрмæст Ирыстоны Хуссар хайы поэт æмæ хъæбул нæ дæ, фæлæ лæггад кæныс æппæт Ирæн дæр. Мелитоны сфæлдыстад адæймаджы зæрдæйы гуырын кæны цардбæллондзинад, æхцон уæлмонцтæ æмæ дын ноджы дæр бантысæд… Мелитон ирон литературæйы у удæгас классик æмæ уыцы кад дæлæмæ макуы ‘руадз!».

Тынг цымыдисон уыдис Агънаты Гæстæны раныхас. Æрымысыд, Мелитонимæ зонгæ кæй у цыппор азæй фылдæр: «Зонгæ та баистæм Мæскуыйы. Уæд уым уыд фысджыты æп-пæтцæдисон æмбырд… Æмæ уырдыгæй райдыдта нæ хæлардзинад.

Абоны онг ахæм æрвылазон бæрæгбон — «Æмбалы бон» нæма уыд, Мелитон мæм ма æрбадзура, æмæ мын ма раарфæ кæна. Уый та дзуры йæ зæрдæйы ахастыл адæймагмæ, йæ лæгдзинад æмæ уæздандзинадыл.

Æрæджы йын йæ уацмыстæ кастæн журнал «Мах дуджы», зæ-гъын, фыццаджы хуызæн хорз ма фыссы. Нæ уæ бауырндзæнис — фæдис кодтон: Мелитон рæзы иу уацмысæй иннæ уацмысмæ», — у Гæстæны хъуыды.

Йæ раныхасы факультеты декан, филологон зонæдты кандидат Хозиты Барис сæрмагондæй банысан кодта, зæгъгæ, Мелитон æрмæст хорз фыссæг нæу, фæлæ ма у ахæм зонадон кусæг, литературæиртасæг дæр. Иухатт, дам, Нафийыл фыстон юбилейон уац æмæ йæ, зæгъгæ, афтæ фæдæн, ома, искуы ма нæм разындзæнис Нафийы хуызæн фыссæг æмæ ахуыргонд. «Абон æз дызæрдыг нæ кæнын, Нафийы хуызæн фыссæг æмæ ахуыргонд Ирыстонæн кæй у Хъазиты Мелитон», — фыссæг æмæ ахуыргонды сфæлдыстадыл дзургæйæ, Барис йæ ныхас балхынцъ кодта ахæм уæлмонц хъуыдыйæ.

Студенттæ Мелитоны сфæлдыстадæй бацæттæ кодтой сæрмагонд раныхæстæ. Сæ ахуыргæнджытимæ йæм лæвæрдтой, йæ цард æмæ йын йе сфæлдыстадæй кæмæ цымыдис кодтой, ахæм алыхуызон æмæ уыимæ бирæ цымыдисон фарстытæ.

Кæронбæттæны Хъазийы фырт, фембæлды чи уыдис, уыдонæй се ‘ппæтæн дæр арфæ ракодта, кæй йæ фæхуыдтой, йæхицæн, стæй йын йе сфæлдыстадæн ахæм стыр аргъ кæй скодтой, уый тыххæй.

Мелитонæн, йæхи загъдау, фем-бæлд рауад мидисджын, аив æмæ зæрдæмæдзæугæ, кæд дзы æгæр стыр абарстытæ æмæ уæлмонц, æппæлæн ныхæстæ уыдис, уæддæр.

Дзебысаты Г.

Comments are closed, but trackbacks and pingbacks are open.