Бирæ нал баззад ног ахуыры азы райдианмæ, фæлæ ма сæрдæй цы бонтæ баззад, уыдонæй пайда кæнынц ахуырдзау фæсивæд, уæлдайдæр, сæрдыгон улæфæн лагерты чи улæфынц, уыдон.
Июлы мæйы Цхинвалы Сывæллæтты сфæлдыстады галуаны базæйыл нæ республикæйы Ахуырад æмæ зонады министрады хъæппæрисæй организацигонд æрцыд сæрдыгон улæфæн лагерь «Фидæн» æмæ уым цы дыккаг фæлтæр улæфыд, уыдонæн сæ хъæлдзæг улæфты бонтæ фесты ивгъуыд къуырийы кæрон. Сывæллæттæ сæ хъомылгæнджытимæ лагеры фæстаг бон банысан кодтой кæронбæттæн хъæлдзæг программæйæ.
«Фидæн»-ы кусджытæ 12-æм августы ногæй хъæлдзæгæй сæмбæлдысты сæ радон улæфджыты къордыл. Лагеры куыстæн ацы фæлтæр ацы аз у кæройнаг. Ныр та галуаны базæйыл баулæфдзæн 70 ахуыргæнинаджы – 5-7 кълæсты ахуыргæнинæгтæ. Уыдон сты Цхинвалы скъолаты ахуырдзау фæсивæдæй.
Лагеры нын куыд радзырдтой, афтæмæй ацы фæлтæрæн сæ кармæ гæсгæ бацæттæ кодтой сæрмагонд программæ, у цымыдисон национ фæдыздæхтимæ. Сæрдыгон лагерь «Фидæн» æртыккаг фæлтæримæ йæ куыст кæндзæн 23-æм августмæ, стæй æхгæд æрцæудзæн.
Нæ уацх.
