РХИ-йы Хицауады Сæрдар Джуссойты Константин фембæлд Цæгат Кавказы федералон университеты ректор Дмитрий Беспаловимæ. Уый Хицауады Сæрдарæн информаци радта Ахуырады министрад æмæ ХИПУ-имæ иумæйагæй сæ бакæнгæ куысты фæдыл æмæ радзырдта сæ дарддæры пълæнтты тыххæй.
Фембæлды ма хайад райста Хицауады Аппараты къухдариуæггæнæг Пæрæстаты Алинæ.
Банысанчындæуыд, зæгъгæ, Цæгат Кавказы федералон университеты регулярон æгъдауæй уагъд цæуынц квалификаци бæрзонддæргæнæн курсытæ РХИ-йы паддзахадон службæгæнджытæ, иумæйагахуырадон скъолаты ахуыргæнджытæ, коррекцион педагогтæн æмæ æндæр специалисттæн.
Уымæй дарддæр ма Цæгат Кавказы федералон университет республикæйæн æххуыс кæны ахуырадон закъондæттынад хуыздæр кæнынæн. Хуссар Ирыстонимæ æмгуыстады рæстæджы ЦКФУ-йы бындурыл бакуыст æрцыдысты æртындæс закъоны æмæ дæлзакъонон актæй фылдæр, кæцытæ хорзыл банымадта республикæйы Хицауад æмæ Парламент æмæ абон æнтыстджынæй архайынц.
Джуссойты Константин раарфæ кодта ЦКФУ-ы ректорæн Хуссар Ирыстонмæ йæ хъусдарды тыххæй æмæ банысан кодта ахуырад æмæ зонады рæзты, алыгъуызон къабæзты кусджыты квалификаци фæбæрзонддæр кæнынæн уавæртæ саразыны республикæйы хицауиуæгады цымыдисдзинады тыххæй. «Фæнды мæ раарфæ кæнын æмæ стыр бузныг зæгъын дæуæн нæ Ахуырад æмæ зонады министрад æмæ университетимæ бирæ азты дæргъы æнтыстджын æмгуыстады тыххæй. Республикæйæн Цæгат Кавказы федералон университет у ахсджиаг партнер. Махæн ахсджиаг у уæ æмархайд ахуырады рæзты фарстатæ скъуыддзаг æмæ бæрзондквалификацион кадртæ бацæттæ кæныны. Ныфс мæ ис, æппæт нæ иумæйаг пълæнттæ реализаци кæй æрцæудзысты. Мах алцыдæр сараздзыстæм, цæмæй æнтыстджын æмгуыстад дарддæр кæна», – загъта Джуссойты Константин.
Йæ рады Дмитрий Беспалов банысан кодта, зæгъгæ, Хуссар Ирыстон уæлдæр ахуырадон уагдæтты ‘хсæн æмгуыстадæй дарддæр, хайад кæй исы практикон æгъдауæй ЦКФУ-ы æппæт æхсæнадæмон проектты. Сæрмагондæй уый фехъусын кодта, зæгъгæ, æввахс рæстæджы, Россотрудничествоимæ иумæ план кæнæм Казахстан æмæ Египеты ахуырадон форумтæ ауадзын. Уырдæм фадат ис ХИПУ-йы æмæ паддзахадон службæйы минæвæртты фæхонынæн.
«Мах ныртæккæ кусæм фидæн азы куысты иумæйаг здæхтытыл. Ныридæгæн ныхас кодтон ХИПУ-йы ректор Тедеты Вадимимæ. Кæд уæм исты фæндæттæ ис, уæд цæттæ стæм байхъусынмæ», – загъта Дмитрий Беспалов.
Уый ма радзырдта, абон ЦКФУ куыд рæзы, уый тыххæй дæр æмæ Джуссойты Константины фæхуыдта йæ дæлбар университетмæ.
«Хонæм дæ нæ университетмæ нæ локацитæм бакæсынмæ: музейон комплекс, кæцы у æххæстæй интерактивон, æрæджы чи байгом, уыцы геномон центр, афтæ ма обсерватори, кæцы тагъд рæстæджы байгом уыдзæн Ставрополы губернаторы æххуысы фæрцы. Мах ма дæуæн сорганизаци кæндзыстæм фембæлд Республикæ Хуссар Ирыстонæй студенттимæ», – банысан кодта Дмитрий Беспалов.
Хицауады Сæрдарæн æхсызгон уыд, кæй йæ фæхуыдта, уый æмæ банысан кодта, зæгъгæ, райзæрдæйæ æрцæудзæн ЦКФУ-мæ æмæ фембæлдзæн Хуссар Ирыстонæй уым чи ахуыр кæнынц, уыцы студенттимæ.
Фембæлды кæрон дыууæ фарсæрдыгæй дæр кæрæдзийæн бакодтой зæрдылдарæн лæвæрттæ.
