21-æм июны изæрæй Цхинвалы Театралон фæзуатмæ æрæмбырд бирæ адæм. Се ‘хсæн уыдысты паддзахады разамонджытæ, студенттæ æмæ ахуыргæндтæ, фæсивæд æмæ хистæр кары адæм. Уыдон ардæм æрбацыдысты, цæмæй ауадзой акци «Мысæн цырагъ», æрымысой, Стыр Фыдыбæстæйон хæсты чи бабын, уыцы хæстонты рухс нæмттæ.  Сорганизаци йæ кодта Культурæйы министрад.

Развæлгъау бацæттæгонд сценæйæ иугай æрттивын райдыдтой номарæн цырæгътæ. Цырæгътæн сæ равæрдæй фыст цыд дзырд «Помним». Уыдон сыгъдысты, Театралон фæзуаты астæу. Æвзонг чызджытæ зылдысты адæмыл æмæ сын цырæгътæ уæрстой, цæмæй сæ фæстæдæр ссудзой æмæ лæууой судзгæ цырæгътимæ.

Адæм фылдæрæй-фылдæр кодтой. Хъуыстысты фыдохы зæлтæ. Гимнази «Альбион»-ы кæстæр кълæсты ахуыргæнинæгтæ сæ ахуыргæнæг Дзабиты Екатеринæимæ кастысты хæст æмæ хæсты хайадисджытыл фыст æмдзæвгæтæ.

Уæдмæ милицийы сæрмагонд нысаниуæджы къорд нæ горæты «Æнусон арт»-æй бронемашинæйыл ирон æмæ уæлахизы тырысатимæ æрбаластой, Мæскуыйæ «Александровский сад»-ы аргъуанæй цы судзгæ цырагъ сæмбæлын кодтой нæ зæххыл, уый. Бронемашинæйæ æрхызт иу хæстон. Бацыд Театралон фæзуаты сæйраг цырагъмæ æмæ йæ ссыгъта. Уый фæстæ адæм иугай цыдысты æмæ сыгътой, сæ къухты цы цырæгътæ уыдис, уыдон. Культурæйы министр Зассеты Жаннæ Мæскуыйы цæрæг не ‘мбæстæгтæ Санахъоты Алан æмæ Зассеты Олегæн бахæс кодта, цæмæй  Мæскуыйы  ссудзой цырагъ æмæ йæ судзгæйæ рарвитой Цхинвалмæ. Хæс æнцон æххæстгæнæн нæ уыдис, Мæскуыйы судзгæ цырагъ хæдтæхæгмæ нæ уагътой.  Кæд сын Алан æмæ Олег дзырдтой, зæгъгæ, цырагъ куынæ аласæм, уæд Цхинвалы ауагъд нал æрцæудзæнис Стыр Фыдыбæстæйон хæсты фæмардуæвджыты номарæн митинг. Зассеты Жаннæйæн йæхи дæр бахъуыд аэропорты разамындмæ фæдзурын. Фæдзырдта сæм, бамбарын сын кодта хабар, æмæ аэропорты кусджытæ æрмæст уæд загътой сæ разыйы ныхас.

Цырагъмæ Дзæуджыхъæуы æнхъæлмæ каст æмæ йæ райста не ‘мзæххон Æлборты Олгъæ. Уырдыгæй йæ Цхинвалмæ та æрластой паддзахадон  хъахъхъæнынады службæйы кусджытæ.

Банысан ма хъæуы уый дæр, æмæ митинг «Мысæн цырагъ» иттæг хорз кæй амыдтой Æлборты Алана, Хъоцыты Сергей æмæ Хуыгаты Илар.

Гæззаты иван

Comments are closed, but trackbacks and pingbacks are open.