Республикон фестиваль «Традициты фæдонтæ – Аланиадæ»-йы фæлгæтты уагъд æрцыд турнир дзюдойæ. Ерысты хайад райстой 80 æвзонг спортсменæй фылдæр. Уыдон уыдысты республикæйы столицæ æмæ районтæй. Ерысты официалонæй байгом кæныны церемонийы хайад райстой Фæсивæдон политикæ æмæ спорты фæдыл комитеты сæрдар Хубежты Руслан, «РХИ-йы дзюдойы федераци»-йы президент, парламентон комитеты сæрдар Гæбæраты Инал, депутаттæ Касаты Ацæмæз æмæ Хъотайты Дмитри.
Æвзонг спортсментæн музыкалон лæвар бакодта Хуссар Ирыстоны эстрадæйы стъалы Икъаты Миленæ.
Уый фæстæ райдыдтой спортивон тохтæ. Сæ фæстиуджытæм гæсгæ иууыл хуыздæр бæрæггæнæнтæ равдыстой Знауыры районы минæвæрттæ.
Республикон фестиваль «Традициты фæдонтæ – Аланиадæ» уагъд цæуы ирон æвзаг æмæ литературæйы бындурæвæрæг Хетæгкаты Къостайы райгуырæн боны цытæн. Фестивалы фæлгæтты уагъд цæудзысты æрмæст ерыстæ нæ, фæлæ ма конкурстæ, викторинæтæ æмæ равдыстытæ.
ГРЕКЪАГ-РОМАГ ХЪÆБЫСХÆСТ
Ейскы уагъд æрцыд И.М. Поддубныйы номарæн æппæтуæрæсейон турнир грекъаг-ромаг хъæбысхæстæй. Ерысты сыгъзæрин майдантæ рамбылдтой Теблойты Давид (72 кг) æмæ Джиоты Дмитри (82 кг). Дыккаг бынат бацахста Дзасохты Чермен (67 кг) æмæ бронзæйон хорзæх та бафтыд Богъаты Вадимы (63 кг) къухты.
Теблойты Давиæдн ма лæвæрд æрцыд «хуыздæр техникæйы тыххæй» приз дæр.
ХУРИТЫ Батрадз
