Не ʻмзæххон, Стыр театры æмæ Мариаг театрты прима, Хуссар æмæ Цæгат Ирыстон-Аланийы сгуыхт æмæ адæмон артисткæ Джиоты Вероникæ ацæугæ 2017 азы концертон программæимæ фæуазæг Хабаровскмæ.

Дунеон оперон зарæггæнæджы концертон программæйы йæ ралæуд уыд Дард хурыскæсæн симфонион оркестримæ иумæ Антон Шубаровы къухдариуæгадæй æмæ ссис проект «Высокая классика на берегах Амура»-йы финалон хай.

«Хабаровскы оркестр аргъæвтой, раздæр сын планмæ гæсгæ хаст чи уыдысты, уыцы гастролтæ. Уый та уымæн, æмæ сын фадат фæцис, цæмæй иу сценæйыл бакуыстаиккой Джиоты Вероникæимæ. Хабаровскы цæрджытæ байхъуыстой диссаджы симфони æмæ сопраномæ уыцыиу рæстæджы» – фыссы ХабИнфойы сайт.

Концерт уагъд æрцыдис Хабаровскы Музыкалон театры, кæцымæ, сайт куыд фыссы, афтæмæй æрбацыд бирæ адæм.

«Сценæмæкæсджытæ концертон программæйæ райстой стыр æхцондзинад. Æнхъæл куыд уыдысты, афтæ уый æххæстгонд цыдис бæрзонд профессионалон æмвæзадыл. Джиоты Вероникæ иттæг хорз сæххæст кодта йæ музыкалон номыртæ æмæ адæмæн равдыста йæ вокалон цæттæдзинад», – банысан кодта бынæттон прессæ.

Концерты Джиоты Вероникæйы сæххæстгонд музыкалон номыртæ уыдысты дунеон классикæйы зындгонд шедевртæ: Русалкæйы ари чехаг композитор Антонин Дворжакы «Русалка», Сильвайы ари Имре Кальманы опереттæ, Еленæйы болеро Джузеппе Вердийы «Сицилийская вечерня»-йы оперæйæ æмæ æндæртæ.

Comments are closed, but trackbacks and pingbacks are open.