Хуссарирыстойнаг хуыйæг-дизайнер-модельер Бекъойты Хох ныридæгæн йæхи цæттæ кæны æхсæнадæмон конкурсмæ. Уый ацæудзæн проект «Россия-Латинская Америка: дизайн сквозь континенты»-йы фæлгæтты 21-æм июлы Мæскуыйы. Ацы конкурс сорганизаци кодта Мæскуыйы «Латинаг Америкæйы Хæдзар».
Не ‘мзæххон дизайнер цы бирæ диссаджы уæлæдарæсы хуызтæ бахуыдта, уыцы коллекцитимæ бирæ адæм базонгæ вæййынц Уæрæсейы Федерацийы регионты хайад цы равдыстыты райсы, уым æмæ йын аккагæй саргъ кæнынц. Уымæ гæсгæ хуынд æрцыд радон конкурсмæ æмæ та цæуыл батыхса дизайнер, уыцы куыст ын ис.
Конкурсы сæйраг нысан у – латинаг дизайнерты сæ уæрæсейаг коллегæтимæ базонгæ кæнын, афтæ ма ацы хъуыддаджы чи архайы, уыцы хайадисджытæ цæмæй дарддæр æмгуыстад кæной æмæ сæ къухты æфта хуыздæр æнтыстытæ. Конкурс ма фадат дæтты дизайнертæн сæ дарæс профессионалон жюрийæн æмæ модæйы специалисттæн равдисын.
Бекъойты Хох конкурсмæ цы ног коллекци цæттæ кæны, уыдонæн æрымысыд ном – «Madre de Dios». Йæхæдæг Хох куыд зæгъы, афтæмæй йæ коллекци цæхгæр хицæн кæндзæн йæ темæмæ гæсгæ. «Перуйы ис регион Мадре-де-Дьос, ахæм ном ис йæ цæугæдонæн дæр. Ацы цæугæдоны былтыл йæ рæстæджы фылдæр ссардæуыд инкты (индейæгты знæмтæй) арæзтæдтæ. Легендæмæ гæсгæ, инкты сыгъзæрин æмбæхст у растдæр ацы регионы.
Мæ коллекцийы цы уæлæдарæс ис, уыдон фылдæр уыдзысты сыгъзæрины хуызтæй, уыцы цæугæдоны хуыз – æрвгъуызтæй (бирюзовый) æмæ терракотæйы хуызтæй. Ног коллекци ма фæлындзыд уыдзæн рагон инктæ сæ рæсугъдгæнæнтæ цахæм орнаменттæй пайда кодтой, уыдæттæй. Иудзырдæй, ацы коллекцийы равдыст уыдзæн инкты æмæ се сæфт сыгъзæрины цытæн.
Курдиатджын дизайнер-моельер модæйы дунемæ йæ фæндаг райдыдта 2017-æм азы. Фыццаг фæлварæнтæ йе сфæлдыстадон куысты райдыдта Цхинвалы.
КОЦТЫ Еленæ
