21-æм июлы не ‘мзæххон – дизайнер-модельер, Республикæ Хуссар Ирыстоны сгуыхт нывгæнæг Бекъойты Хох хайад райста Мæскуыйы æхсæнадæмон конкурс «Россия-Латинская Америка: дизайн сквозь континенты»-йы æмæ дзы бацахста 2-аг бынат.
Ацы æхсызгон хабарыл хуссарирыстойнаг æмбæстæгтæ сæмбæлдысты стыр цины æнкъарæнтимæ, уæлдайдæр та Хохы чи зоны æмæ йын йæ курдиат æмæ арæхстдзинадæн чи табу кæны. Уæдæ дунеон модæмæ йæ хъус чи дары, æппæт уыдон дæр хабарыл зæрдиагæй фæцин кодтой.
Конкурс сæрмагондæй уагъд цыдис Латинаг Америкæйы бæстæты цытæн. Йæ организатортæ уырдæм фæхуыдтой Республикæ Хуссар Ирыстоны минæварады. Бекъойты Хох ацы конкурсмæ афæндараст нæ республикæйы Фæсарæйнаг хъуыддæгты министрады инициативæмæ гæсгæ.
Æдæппæтæй æхсæнадæмон конкурсы хайад райстой 14 бæстæйы дæсны дизайнертæ æмæ уыдон æхсæн æнтыстджын æмæ цымыдисон уыд Бекъойы фырт, аккаг аргъ ын скодтой жюрийы уæнгтæ. Адæмы рæгъмæ Хох рахаста ног коллекци, «Madre de Dios», зæгъгæ, æмæ уый цæхгæр хицæн кæны йæ темæмæ гæсгæ. Хох йæхæдæг куыд банысан кодта, афтæмæй Перуйы цæугæдон Мадреде Дьосы былтыл йæ рæстæджы фылдæр ссардæуыд инкты (индейцты знæмтæй) арæзтæдтæ. Ис ахæм легендæ, зæгъгæ, инктæ сæ сыгъзæрин бамбæхстой комкоммæ дæр ацы регионты.
![](https://xurzarin.ru/wp-content/uploads/2024/07/96_16.jpg)
Хуссарирыстойнаг дизайнер-модельер конкурсы равдыста рагон инктимæ баст коллекци. Уæлæдарæс фылдæр уыдысты сыгъзæрины хуызтæй, цæугæдоны хуыз – æрвгъуызтæй æмæ терракотон хуызтæй. Коллекци фæлындзыд уыдис рагон инктæ сæ фæлындæнты цахæм орнаменттæй рæсугъд кодтой, уыдæттæй.
Конкурсы сæйраг нысан уыд, латинаг дизайнерты сæ уæрæсейаг коллегæтимæ æввахсдæр базонгæ кæнын. Афтæ ма конкурсы чи архайы, уыцы дизайнертæ цæмæй дарддæр æмгуыстад кæной æмæ сæ къухты æфта фылдæр. Дунейы бæстæты адæмтæ та зонгæ кæной се сфæлдыстадимæ.
КОЦТЫ Еленæ