Æрæджы нысан æрцыдис зынгæ ирон композитор æмæ дирижер Галаты Барисы 130 азы юбилей. Мадзал уагъд æрцыдис Цхинвалы, Барисы хæдзар-музейы. Хайад дзы райстой, хорз æй чи зыдта уыдон, йæ хæстæджытæ, ах-уыргæндтæ, ахуырдзау фæси-вæды минæвæрттæ.
Мадзал бацæуæн ныхасæй байгом кодта æмæ йæ хайадисджыты Барисы хæдзар-музейы экспонаттимæ базонгæ кодта Гаглойтэ Лиана. Бæстон сын æрдзырдта, Барис бирæ рæстæджы дæргъы цы музыкалон инструменттæй пайда кодта уыдоны тыххæй. Музеймæ æрбацæуджытæ уæлдай тынгдæр цымыдис кодтой 1913 азы уагъд пианино, рагон дарæсæфснайæн æмæ æндæр ахæм мигæнæнтæн.
Барис Хуссар Ирыстонмæ куыд æрцыд, æмæ цы зынтыл æмбæлд уый тыххæй та музеймæ æрбацæуджытæн радзырдта Гæбæраты Андрей. Уый банысан кодта, зæгъгæ, Барис цард æмæ куыста Цæгат Ирыстоны. «Фехъуыста Хуссар Ирыстоны музыкæ райтынг кæныны тыххæй музыканттæ кæй хъæуы æмæ 1929 азы майы мæйы æрцыд Цхинвалмæ. Нæ йын уыд цæрæн бынат æмæ райдианы цард кæмæдæр. Фæстæдæр йæ дзау-мæттæ æмæ мигæнæнтæй ауæй кодта æмæ балхæдта мæнæ ацы хæдзар кæцы йæ амæлæты фæстæ ссис йæ хæдзар-музей. Барис Хуссар Ирыстонмæ æрцæугæйæ, фыццаг балц сарæзта Хъемулта, Цъон æмæ Куайсамæ», – загъта Андрей.
– Уый фæстæ та, – ныхас адарддæр кодта философон зонæдты доктор Дзугаты Къоста, – Барис уыд Дзау, Уанел æмæ Дзомагъы. Дзомагъы баззад æхсæз боны, æрбынат кодта Дзугаты Хасæхъотæм. Нæ мыггагæй цалдæр ацæргæ адæймаджы зарыдысты тынг хорз. Куы-иу зарыдысты уæд-иу сæм Барис хъуыста лæмбынæг æмæ ныффыста цалдæр зарæгæн музыкæ. Йæ иу чиныджы дарддæр зæгъы Къоста, ис сæдæ зарæджы. Уыдоныл куыста 40 азы.
Уымæй дарддæр ма Къоста банысан кодта, зæгъгæ, Барисæн мыхуыры чи нæ рацыд, бакусын кæуыл хъæуы, ахæм зарджытæ йын баззад 700-йы бæрц. Уыдоныл бакуыстой хистæр фæлтæр, фæлæ сыл ноджы хуыздæр хъуамæ бакусой абоны æмæ нырæй фæстæмæйы фæлтæртæ.
Кæронбæтæны Колыты Аксойы номыл аивæдты лицейы ахуыргæнинæгтæ равдыстой концерт.
Гæззаты Иван
Comments are closed, but trackbacks and pingbacks are open.