Знон, 22 февралы Синагуры хъæуы астæуккаг скъолайы ауагътой мадзал Райгуырæн бæстæйы хъахъхъæнæджы боны цытæн. Бацæттæ йæ кодта уырыссаг æвзаг æмæ литературæйы ахуыргæнæг Джиоты Зæлинæ. Мадзалмæ хуынд æрцыдысты Синагуры Уæрæсейы Арæнхъахъхъæнджыты управленийы иу къорд сæ командæгæнæг Глазунов Денис, Синагур-Карзманы хъæусоветы администрацийы минæвæрттæ, скъолайы ахуыргæнинæгты ныййырджытæ, æввахс хъæуты цæрджытæ æмæ скъолайы раздæры рауагъдонтæ. Мадзалы райдайæны айзæлыдысты Уæрæсейы æмæ Хуссар Ирыстоны гимны зæлтæ, уый фæстæ скъоладзаутæ хæлардзинады нысанæн хæрдмæ систой дыууæ бæстæйы тырысатæ.
Мадзал байгом кодта ацы скъолайы 11-æм къласы ахуыргæнинаг Танделаты Анжелæ æмæ раарфæ кодта æрбацæуджытæн бæрæгбоны цытæн. Скъолайы директор Бестауты Аркади дæр йæ ныхас райдыдта арфæйы ныхæстæй æмæ банысан кодта, зæгъгæ, скъола кæддæ-риддæр кæй банысан кæны ахæм бæрæгбонтæ куыд Райгуырæн бæстæ хъахъхъæнæджы бон, 1-æм май, 9-æм май. Аркади ма куыд загъта, афтæмæй кæддæриддæр ам активон хайад райсынц Синагуры арæнхъахъхъæнæг заставæйы службæгæнджытæ дæр. Скъола активонæй æмгуыст кæны арæнхъахъхъæнджытимæ рæзгæ фæлтæры ахуыр-хъомыладон æмæ æфсæддон-патриотикон куысты. Ивгъуыд аз, Уæрæсейы Арæнхъахъхъæнæг управленийы уæды командæгæнæгæг инæлар-майор Меркурьев Витали æмæ РХИ-йы Ветеранты советы къухдариуæгад скъолайы коллективы схайджын кодтой Арфæйы фыс-тæджытæй.
Мадзалы раныхас кодта Арæнхъахъхъæнæг управленийы командæгæнæг Глазунов Денис æмæ загъта бузныджы ныхæстæ скъолайы коллективæн рæзгæ фæлтæримæ активон æфсæддон-патриотикон куыст кæй кæнынц, уый тыххæй.
Скъолайы ахуыргæнинæгтæ Деканоидзе Динара, Бестауты Леди, Танделаты Мадинæ, Танделаты Анжелæ æмæ Цхуырбаты Сабинæ аив бакастысты балладæ «На поле танки грохотали». Мадзалы рæстæджы скъоладзаутæ сæхи равдыстой активонæй, æмдзæвгæтæ кастысты, куыд иронау, афтæ уырыссагау дæр. Уæлдай активондæрæй æмдзæвгæтæ бакаст 8-æм къласы ахуыргæнинаг Декъаноидзе Динара.
Чызджыты къорд сæххæст кодтой С. Гуценкойы балладæ «Погранич-ная баллада», Лебедьев-Кумачы «Брат за брата», æмæ æфсæддон темæйыл фыст æндæр зарджытæ. Скъолайы ахуырдзау чызджытæ Арæнхъахъхъæнæг управленийы службæгæнджытæн æмæ скъолайы раздæры рауагъдонтæ Танделаты Батрадз æмæ Бестауты Гамлетæн балæвар кодтой дидинтæ. Уый фæстæ аив сæххæст кодтой æфсæддон кæфтытæ æмæ ирон национ кафт «Симд». Бестауты Гамлет æмæ Танделаты Батрадз æрыздæхтысты сæ райгуырæн хъæумæ се ‘фсæддон хæс РХИ-йы æфсады рæнхъыты сæххæст кæнгæйæ. Скъолайы рауагъдонты номæй Гамлет раарфæ кодта йе схъомылгæнæг скъола æмæ коллективæн.
Арæнхъахъхъæнæг управленийы службæгæнджытæ скъоладзаутæн бацæттæ кодтой цымыдисон номыртæ Калашниковы автоматимæ æмæ ахуыркуыдзы хайадистæй. Скъоладзаутæн, куыд лæппутæ афтæ чызджытæн бацамыдтой автомат райхалын æмæ сæмбырд кæныны сусæгдзинæдтæ. Скъоладзаутæ уыдысты тынг райгонд сæ архайдæй. Ахуыр куыдз та равдыста йæ цæттæдзинад, арæныл фæткхалæджы уромыны хъуыддаджы. Но-мыр рауад тынг цымыдисон. Мадзалы кæрон скъолайы коллектив сæххæст кодтой зарæг «Точанка-Ростовчанка».
Скъолайы директор куыд загъта, афтæмæй ацы скъолайы коллектив ныридæгæн цæттæ кæны 9-æм майы Уæлахизы бæрæгбонмæ. Уырдæм хуынд æрцæудзысты хæсты æмæ куысты ветерантæ.
Хуыгаты Миленæ
Comments are closed, but trackbacks and pingbacks are open.