…Сæ хорз ахаст æмæ зонындзинæдты тыххæй
Кæд цалдæр азы размæ акастæн ме стай азы сæрты, уæддæр æппынæрæджыйы онг мæхи хатыдтæн хорз, арæх мæ нæ хъуыд дохтырты æххуыс. Куы –иу мæ бахъуыд, уæддæр уæлæнгай низты тыххæй. О, фæлæ æрæджы, зонгæ дæр æй нæ бакодтон, цы мыл æрцыдис, уый. Уæнгтæ ныууæззау сты, нал мæ уыд тыхы мур æмæ цалдæр боны мæ уат нæ систон. Рынчындонмæ куы бахаудтæн, уæд дохтыртæ уадид рахатыдысты мæ уавæр æмæ мæ схуыссын кодтой реанимацийы. Фæдæн дзы аст боны æмæ куыд хайады хистæр Харебаты Жаннæ, афтæ ма медицинон хотæ дæр, цалынмæ мæ 2-æм терапимæ нæ ракодтой, уæдмæ æппынæдзух уыдысты мæ уæлхъус. Уый фæстæ дæр ма-иу мæ абæрæг кодтой. Ам та мын хос кодтой дохтыртæ Къæбулты Ирмæ æмæ Цхуырбаты Ирмæ. Уыдон æппæт дæр арæзтой, цæмæй ме ‘нæниздзинад ноджыр фæхуыздæр уа æмæ сын уый æнтысгæ дæр бакодта.
Диссаг у, æвæдза, фæлæ кæд рынчындонæй рацыдтæн цалдæр къуырийы размæ, уæддæр мæм арæх æрбадзурынц телефоны æмæ мæ бафæрсынц мæхи куыд хатын, уымæй.
Зæгъын мæ фæнды уый æмæ нырмæ хъуыстон нæ дохтырты тыххæй æфхæрæн дзырдтæ, цасдæр бæрцæй мæ уырныдтой, фæлæ мæ нырæй фæстæмæ нал уырндзысты. Ахæм дзурджытæн, гæнæн уæвгæйæ, уайдзæф дæр кæндзынæн. Уымæн æмæ мæхи удыл банкъардтон нæ дохтыртæн рынчынтæм цахæм хорз ахаст ис, уый. Алы рынчынæн баххуыс кæнынмæ дæр сты цæттæ æмæ ‘фхæрæн дзырдты бæсты дзурын хъæуы сæ хорз ахаст æмæ зонындзинæдты тыххæй.
КАРСАНТЫ Разиат