Президент Гаглойты Алан арфæйы тел арвыста Республикæ Никарагуайы Президент Даниэль Ортегамæ Сандинистон революцийы уæлахизыл 45 азы сæххæсты цытæн.
Арфæйы, сæрмагондæй, дзырдæуы:
«Зынаргъ Президент Ортега!
Зынаргъ никарагуайаг æфсымæртæ æмæ хотæ!
Æхсызгон мын у Никарагуайы æппæт адæмæн зæрдæбын арфæтæ æмæ иууыл хуыздæр фæндиæгтæ зæгъын Сандинистон революцийы уæлахизыл 45 азы сæххæсты цытæн!
Никарагуайаг адæмæн, 1979 азы июлы сæрибардзинад равзаргæйæ æмæ бахъахъхъæнгæйæ, сæ къухты бафтыд зынгæ æнтыстытæ. Никарагуайаг адæмы тох æмæ революцийы амæттæгтæ æнæхъуаджы нæ фесты. Сандинистон революцийы уæлахиз Никарагуайы адæмæн фæндаг байгом кодта демократи сфидар кæнынмæ. Бæстæйы социалон-экономикон рæзт, алыгъуызон фадгуыты йе ‘нтыстытæ, дунеон æмæхсæнады иннæ бæстæты ‘хсæн аккаг бынат къухты бафтыдысты фæуæлахизуæвæг революцийы фæрцы.
Революцийы хъуыддагыл никарагуайæгты æхсардзинад, фидардзинад æмæ æнувыддзинад сты кады аккаг. Уырны мæ, Никарагуайы ницы ныхдуртæ бахъыгдардзысты сæ равзæрст фæндагæй фæиппæрд уæвынмæ. Никарагуайы сæрыстыр адæм фадат никæмæн ратдзысты, сæ къухты цы æнтыстытæ бафтыд, уыдон байсынæн. Сабыруарзаг, фæлæ хъæбатыр адæм иу æмæ дыууæ хатты не сбæлвырд кодтой Райгуырæн бæстæйы сæрыл тох кæнынмæ цæттæ кæй сты, хисæрмагонд хъысмæты хицæуттæ уæвынмæ æмæ уым ис сæ рæсугъд фидæны нысан дæр.
Республикæ Хуссар Ирыстоны адæм стыр аргъ кæнынц хуссарирыстойнаг-никарагуайаг хæларадон ахастытæн. Стыр бузныг сты Никарагуайы къухдариуæгад æмæ адæмæй не ‘взонг паддзахады историйы иууыл вазыгджындæр рæстæджы уæ фарсхæцынадæй.
Уырны мæ, Республикæ Хуссар Ирыстон æмæ Республикæ Никарагуайы ‘хсæн хæлардзинад æмæ æмгуыстады ахастытæ кæй фидардæр кæндзысты æмæ дыууæ бæстæйы интерестæ кæй рæздзысты.
Цытджын Президент, мæ зæрдæ дын зæгъы фидар æнæниздзинад, æвидигæ энерги, ног æнтыстытæ æмæ снысангонд плæнтты реализаци. Никарагуайы æфсымæрон адæмæн та – сабырдзинад æмæ дидинæфтыд!
Уадз, азæй-аз хуыздæр кæнæд цард никарагуайаг зæххыл!».
