28-æм ноябры РХИ-йы Президент Тыбылты Леонид фехъусын кодта Хуссар Ирыстоны ахуырады, æнæниздзинады, культурæйы, физкультурæ æмæ спорты, хъæууон хæдзарады æмæ дзыллон информацийы фæрæзты фадгуыты кусджыты куыстмызд фæбæрзонддæр кæныны тыххæй. Республикæйы иннæ категориты æмбæстæгтæн, уыцы нымæцы пенсиисджытæ, студенттæ æмæ уыцы æмбæстæгтæ, кæцытæн ис сывæллæттæ æмæ сын  исынц пособитæ, уыдонæн лæвæрд æрцæудзысты иурæстæгон бафыстытæ. Аивгъуыйгæ 5 азмæ  республикæйы куыстмызд ныр фылдæр кæны æртыккаг хатт, кæцы абоны вазыгджын экономикон æмæ финансон цæстæнгасмæ гæсгæ у тынг хорз хабар, æрмæст Хуссар Ирыстоны алы цæрæгæн дæр нæ, фæлæ ма уый æвдисæн у, Президент уæрæсейаг фарсимæ эффективонæй кæй скъуыддзаг кæны адæмы тыххæй уæлдай ахсджиагдæр фарстытæ. Уæрæсейаг ведомствотимæ ахастыты системæ æмæ Тыбылты Леонидыл Уæрæсейы æууæнкдзинады æмвæзад Хуссар Ирыстонæн систы бæрæг конкурентон уæлиондзинад. Ацы уæлиондзинад уæлдай ахсджиагдæр у уыцы нысæнтты къухты бафтын кæныны, кæцытæ Президент банысан кодта 2016 азы 19-æм февралы адæммæ æмæ Парламентмæ йæ Ныстуаны: Тыбылты Леонид фæнд кæны æндидзынады процессы акценттæ экономикон рæзты фарстытæм ракæнын.

Президенты стратегион инициативæйы æвварс рахæцыд Уæрæсе иууыл бæрзонддæр æмвæзадыл. Уый фæдыл банысан кæнын хъæуы, уæрæсейаг ведомствотимæ Тыбылты Леониды æмархайды фæстиуæгдзинад, кæцытæ комкоммæ архайынц Хуссар Ирыстоны фарстытыл, фылдæр бæрцæй бæрæг цæуы Владимир Путинимæ хисæрмагонд ахастыты бæрзонд æмвæзадæй. Нæ республикæмæ йæ фæстаг визиты рæстæджы уый тыххæй дзырдта Цæгат Кавказы хъуыддæгты фæдыл министр Лев Кузнецов дæр. Тыбылты Леонидимæ Хуссар Ирыстоны  æввахс æртæ азы бюджетон параметртыл уынаффæ кæнгæйæ, министр, сæрмагондæй, банысан кодта: «Фæнды мæ сымахæн фехъусын кæнын уый, æмæ уыцы параметртæ, кæцытæ æвæрд сты Хуссар Ирыстонæн баххуыс кæныны программæйы иннæ æртæ азмæ бюджеты проекты æвзæрдæр не сты, фæлæ къорд бæрæггæнæнтæм гæсгæ иннæ азтæй сты хуыздæр, æгæрыстæмæй, Цæгат Кавказы фоныл дæр, цыран лимиттæ фæкъаддæр сты. Республикæмæ æмæ сæрмагондæй дæумæ Уæрæсейы Президенты персоналон ахаст хынцгæйæ, афтæ ма æууæнкдзинады цæстæнгасæй Владимир Владимиры фыртимæ дæ ахастыты, кæй зæгъын æй хъæуы, мах æмбарæм, кæй нæ хъæуы фенын кæнын,  махæн нæ къухты бафтыдысты бæрзонд æнтыстытæ æмæ сæ нæ ныллæгдæр кæнæм».

Бюджетон фадыджы кусджытæн куыстмызд фæбæрзонддæр кæнын у, Хуссар Ирыстоны æмбæстæгты фæрныгады рæзтæн республикæйы къухдариуæгад цы къахдзæфтæ кæны, уыдонæй сæ иу. Æвæццæгæн, уæлдай уыдзæн зæрдыл æрлæууын кæнын уый тыххæй, уартæ ма 5 азы размæ дæр республикæйы горæт æмæ районтæ цахæм уавæры уыдысты, уый. Цхинвалы хæрзарæзтад, фæндæгты, скъолаты, сывæллæтты цæхæра-дæтты арæзтад, бæрзонд хæххон хъæуты электрификаци сты республикæйы æндидзынады фæстиуæг. Университеты æмæ театры бæстыхæйтты арæзтад,  æнæдызæрдыгæй, кæронмæ акæндзæн. Ацы бæстыхæйттæ ахсджиаг сты нæ республикæйы цæрджытæн психологон цæстæнгасмæ дæр.

2017 азы кæронмæ фæуд кæны æртæазон инвестицион программæ. Ныртæккæ куыст цæуы иннæ æртæ азы программæйыл. Уый уыдзæн республикæйы рæзты инвестицион программæ. Æндидзынады этап, сæйраджыдæр, фæуд кæны 2017 азы. Уый афтæ нæ нысан кæны, æмæ ууыл фæуыдзысты æндидзынгæнæн куыстытæ, уыдон адарддæр уыдзысты уый онг, цалынмæ хæсты рæстæджы цы ныппырх, уыдон иууылдæр арæзт фæуой, уæдмæ. Фæлæ, уæддæр боны фæткы фыццаг планмæ бацæудзысты республикæйы социалон-экономикон рæзты фарстытæ.

Хуссар Ирыстоны æндидзынады къухтыбафтгæ фæстиуджытæ æмæ Уæрæсейы фарсхæцынад фадат ратдзысты республикæйы адæм æмæ Президентæн фидæнмæ ныфсджынæй кæсынæн. Абон Президент цы хæстæ æвæры, уыдон комкоммæ баст сты адæмы фæрныгад фæбæрзонддæр кæнынимæ. Экономикон рæзты хорз темптæм рахизын хуымæтæджы хъуыддаг нæу алы бæстæйæн дæр, уыцы нымæцы Хуссар Ирыстонæн дæр.  Фæлæ Президент цы бындур æрæвæрдта, æмæ уымæ Владимир Путины ‘рдыгæй æууæнкдзинад хорз фадат дæттынц нæ республикæйæн экономикæйы хъуыддæгты уавæр фæивынæн æмæ системон æгъдауæй рæзты хæслæвæрдтæ æххæст кæнынæн.

Битеты А.

Comments are closed, but trackbacks and pingbacks are open.