7-æм мартъийы горæт Сочийы айзæлыдысты Фæсивæды дунеон фестивалы фæстаг зæлтæ. Уым нæ делегацийы сконды хайад райста ХИПУ-йы журналистикæйы факультеты 5 курсы студенткæ, газет «Республикæ»-йы уацхæссæг Багаты Элинæ æмæ йæм бахатыдыстæм, цæмæй нын радзура йæ тæлмæнтæ.
– Куы базыдтон, ацы фестиваль Сочийы уагъд цæудзæнис æмæ дзы нæ республикæйы делегаци хайад райсдзæнис, уæд мæ бæллиц ссис уым хайад райсын æмæ мын сæххæст ис. Ам цы авд боны арвыстам, уыдон махæй алкæмæндæр уыдысты æнæферохкæнинаг бонтæ, Дунейы 190 бæстæйæ ардæм цы 20 минæй фылдæр æрыгон лæппутæ æмæ чызджытæ æрцыдысты, уыдоны. Кæд фыццаг хатт æмбæлдысты, уæддæр сæм кæрæдзимæ æвзæрдис хъарм, уарзæгой зæрдæйы æнкъарæнтæ. Алкæмæн дæр райдзаст мидбылхудт сæ цæсгæмттæй нæ хызт. Ам зæрдæйæ банкъарæн уыд, ныры дунеон æндыгъд уавæрмæ нæ кæсгæйæ, дунейы бæстæты фæсивæды кæй фæнды сабыр арвы бын цæрын, кæй сæ фæнды æндæр æмæ æндæр бæстæтæй сæхицæн хæлæрттæ ссарын. Кæд фæстивалы хайадисджытæ мингæйттæ уыдысты, уæддæр фестиваль организаци æрцыд бæрзонд æмвæзадыл. Йæ гом кæныны церемонийы форумы хайадисджытæн йæ видеосидты раарфæ кодта Уæрæсейы президент Владимир Путин æмæ банысан кодта, æрыгон фæлтæрæн кæй нæй дихгæнæг арæнтæ.
Фестивалы фыццаг бонæй фæстæмæ алчидæр зыдта, чи кæцы къорды уæнг уыдис, уым цы мадзæлтты хъуамæ растаиккой хайад. Нæ программæ уыд хъæздыг алыгъуызон мадзæлттæй. Архайдтой дзы ахæм здæхтытæ, куыд информацион технологитæ, зонад, культурæ, медиа-туризм, экологи, амалиуæгад, политикæ, ахуырад æмæ æндæртæ. Уыдон афтæ бирæ уыдысты æмæ се `ппæты хайад райсæн нæ уыд, нæ сыл уыд аххæссæн. Уымæ гæсгæ хайад истам, нæ зæрдæмæ æв-вахсдæр цы къордтæ уыдис, уыдоны куысты.
Æрвылрайсом æмæ изæрæй дæр Фестивалы сценæйæ зарыдысты зындгонд зарæггæнджытæ, ансамблтæ. Боны дæргъы махæн уыдис алыгъуызон темæтыл лекцимæ байхъусыны фадат. Фембæлдтытæ нын уыдис ахæм зындгонд политиктæ æмæ адæймæгтимæ, куыд Сергей Лавров, Дмитри Медведев, Мария Захарова, Маргарита Симонян, Татьяна Черниговская, Милош Бикович æмæ æндæртæ. Стыр цымыдисимæ байхъуыстам профессор Татьяна Черниговскаяйы лекцитæм аразгæ интеллекты тыххæй. Фестивалы ма хайад райсæн уыдис музыкалон æмæ кафты программæты, спортивон ерысты, мастер-кълæсты, конкурсты, алыгъуызон хъæзтыты. Уымæй дарддæр ма хицæн го-рæттæ æмæ областтæн уыдис сæхи павилонтæ æмæ афтæмæй зонгæ кодтам Уæрæсейы æндæр æмæ æндæр регионтимæ. Фæлæ уæддæр ахсджиагдæр цауыл банымайын хъæуы фестивалы хайадисджыты æргом диалог Владимир Путинимæ. Уымæ лæвæрдтой алыгъуызон фарстатæ.
Нæ делегацийы уæнгтæ, кæй зæгъын æй хъæуы, уæлдай æнгомдæр балæууыдысты, æмæ схæлар сты Цæгат Ирыстоны делегацийы уæнгтимæ. Уыдон уыдысты тынг активон алыгъуызон мадзæлтты дæр. Нæ баскетболисттæ фестивалы бацахтой æртыккаг бынат. Зарæггæнæг Джиоты Любæ та ныффыста ног зарæг Хъодалаты Марияйы ныхæстыл æмæ йæ презентаци дæр уыдис уым. Нæ кафджытæ цæгатирыстойнаг кафджытимæ иумæ акафыдысты “Симд” олимпион арты фоныл.
Фестивалы бонты нæ делегацийы уæнгтæ фембæлдысты Донецкы Адæмон Республикæ, Белоруси, Серби, Болгари æмæ Аргентинæйы делегацитимæ дæр. Афтæ ма нын хъарм фембæлдтытæ уыдис æндæр бæстæты минæвæрттимæ. Базонгæ-иу стæм семæ æмæ-иу кæрæдзийæн радзырдтам нæ бæстæты, нæ историйы тыххæй.
Фестиваль фæцис æмæ мах фæстæмæ здæхтыстæм æгæрон ирд тæлмæнтимæ. Рацæудзысты азтæ, фæлæ ацы фестваль мæнæн мæ зæрдæйы баззайдзæнис цæрæнбонтæм. Æз мæхи амондджыныл нымайын æмæ сæрыстыр дæн, хайад дзы кæй райстон, уымæй, – загъта йæ ныхасы кæрон Багаты Элинæ.
БЕСТАУТЫ Валя
