26 август Хуссар Ирыстоны æмæ дунеон æмахастыты историйы дæр баззайдзæн Уæрæсейы къухдариуæгады политикон фæндондзинады ирд æвдисæнæй. Уæрæсейы Федерацийы ‘рдыгæй Хуссар Ирыстоны паддзахадон хæдбардзинады банымад хынцы ахæм факт, кæцы æвдисы официалон Мæскуыйы уæвæг стандарттæ æмæ дунеон лидерты хъуыды.
Знон, 26 августы, уыцы егъау, историон, нысаниуæгджын боныл дæс азы сæххæсты цытæн паддзахадон драмон театры уагъд æрцыд цытджын мадзал.
Хъахъхъæнынады цытджын караул цытджын уавæры сценæмæ бахастой Республикæ Хуссар Ирыстон æмæ Уæрæсейы Федерацийы Паддзахадон тырысатæ.
Уæрæсейы Федерацийы ‘рдыгæй Хуссар Ирыстоны паддзахадон хæдбардзинады банымадыл дæс азы сæххæсты цытæн нæ Республикæмæ цы уазджытæ æрцыд, уыдоны ‘хсæн уыдысты: УФ-йы Президенты æххуысгæнæг Владислав Сурков, Федералон Æмбырды Советы Федерацийы делегаци Советы Федерацийы сæрдары хæдивæг Умаханов Ильясы сæргълæудæй, Паддзахадон Думæйы УФ-йы Федералон Æмбырды хъахъхъæнынады фæдыл комитеты сæрдары фыццаг хæдивæг Андрей Краснов, УФ-йы министр Кавказы хъуыддæгты фæдыл Сергей Чеботарев, Цæгат Ирыстон Аланийы делегаци республикæйы Сæргълæууæг Битарты Вячеславы сæргълæудæй, Донецкы Адæмон Республикæйы делегаци, бæстæйы сæргълæууæг Александр Захарченкойы сæргълæудæй, Луганскы Адæмон Республикæйæ, бæстæйы сæргълæууæджы хæстæ æххæстгæнæг Леонид Пасечникы сæргълæудæй, УФ-йы Сирийаг Арабаг Республикæйы минæвар Рияд Хаддад, Республикæ Абхазы делегаци, Æдасдзинады советы сæрдар Мухамед Килбайы сæргълæудæй, делегацитæ Науруйæ, Приднестроваг Молдаваг Республикæйæ, Хæххон Хъарабахæй, Беларуси æмæ Уæрæсейы цæдисы парламентон æмбырдæй, Хъырымæй, Кæсæг-Балхъарæй, Хъæрæсе-Черкессийæ, Цæцæны Республикæйæ, Мæхъæлы Республикæйæ, Владимиры областæй, Ветеранты æппæтуæрæсейаг æхсæнадон организаци «Хæстон æфсымæрдзинад»-æй, Æппæтуæрæсейаг æхсæнадон организаци «Афганистаны хæсты инвалидтæ», Италийæ.
Уæрæсейы Федераци Хуссар Ирыстоны Паддзахадон хæдбардзинад куы банымадта, уый цытæн цытджын æмбырды доклад сарæзта Президент Бибылты Анатоли. Йæ доклад мыхуыр цæуы.
Цытджын мадзал адарддæр хорзæхтæ дæттыны церемонийæ.
Хуссар Ирыстоны Президент Бибылты Анатолийы Барамындæй орден «Уацамонгæ»-йæ хорзæхджын æрцыд Паддзахадон Думæйы хъахъхъæнынады фæдыл комитеты сæрдары хæдивæг Андрей Краснов.
Бибылты Анатоли Кады орденæй схорзæхджын кодта: УФ-йы президенты æххуысгæнæг Владислав Сурковы, Донецкы Адæмон Республикæйы сæргълæууæг Александр Захарченкойы, Луганскы Адæмон Республикæйы сæргълæууæджы хæстæ æххæстгæнæг Леонид Пасечникы, Цæгат Ирыстон-Аланийы Сæргълæууæг Битарты Вячеславы. Йæ рады уый Президент Бибылты Анатолийы схорзæхджын кодта РЦИ- Аланийы уæлдæр хорзæх майдан «Во славу Осетии»-йæ. Битарты Вячеслав куыд банысан кодта, афтæмæй дыууæ Ирыстоны кæдфæнды дæр сты кæрæдзийы фарсмæ.
Президенты къухæй цытджын мадзалы хорзæхтæ райсыны фæстæ Донецк æмæ Луганскы Республикæты сæргълæуджытæ бузныджы ныхæстæ загътой æппæт ирон адæмæн бæстæйы сæргълæууæг Бибылты Анатолийы номæй. Банысан кодтой, зæгъгæ цалынмæ сæ бæстæты ныры фæлтæр цæра, уæдмæ уыдон никуы ферох кæндзысты, Хуссар Ирыстон сын сæ хæдбардзинад кæй банымадта æмæ сæм кæй фæдаргъ кодта йе ‘ххуысы къух. Афтæ ма сæ рох нæу, Ирыстоны бархионтæ кæй хъахъхъæдтой сæ бæстæты сæрибар-дзинад.
Владислав Сурков дæр бузныджы ныхæстæ загъта Президент Бибылты Анатолийæн, ахæм нысаниуæгджын боны кæй райста ахæм стыр хорзæх, уый тыххæй. Банысан кодта, зæгъгæ, кæд дæс азы размæ Уæрæсейы къухдариуæгадæн Хуссар Ирыстоны хæдбардзинад банымайыны хъуыддаг уыд зын, уæддæр сарæзта раст къахдзæф.
Дарддæр ма бæрæгбонон хорзæхтæ райстой Цæгат Кавказы хъуыддæгты фæдыл министр Сергей Чеботарев, Сириаг Арабаг Республикæйы президент Башар Асады сæрмагонд минæвар Рияд Хаддад.
Сергей Чеботарев хорзæх райсыны фæстæ банысан кодта, зæгъгæ, уый æрмæст уый хорзæх нæу, фæлæ æгас министрады архайджыты, кæцытæ егъау куыст кæнынц Хуссар Ирыстоны райрæзты сæраппонд.
«Дæс азы размæ æппæт Уæрæсейы хъусдард здæхт уыд Хуссар Ирыстоны æрцæугæ цаутæм. Алкæцы уæрæсейаг дæр хъуыды кодта ирон адæмы хъысмæтыл, фæлæ Уæрæсейы Федераци ирон адæммæ æрцыд æххуысмæ, фыццагдæр – йæ хæдбардзинад ын куы банымадта, уæд. Уæдæй абоны онг Республикæ Хуссар Ирыстоны адæм цæрынц æмæ сын сæ сабырад хъахъхъæнынц Уæрæсейы æфсæддон тыхтæ. Иу бæстæ дæр нæ бауæнддзæн Хуссар Ирыстоны сабырад фехалын», – загъта уый.
Цытджын æмбырды ма паддзахадон бæрзонд хорзæхтæ, уыцы нымæцы ног майдан – «Фыдыбæстæйон хæстыл 10 азы сæххæсты» майдан, райстой бæрæгбонмæ æрцæуæг уазджытæй бирæтæ æмæ Республикæйы иуæй-иу æмбæстæгтæ.
Дарддæр грандиозон шоу уагъд æрцыд нæ горæты стадионы. Изæрæй та нæ горæты цæрджытæн фадат уыд ирон æмæ уырыссаг аивады дæсныты концертмæ бакæсын.
Танделаты Виленæ,
Къæбулты Марина
Comments are closed, but trackbacks and pingbacks are open.