Адæмы зæрдæты чи цæры, уыцы бæрæгбон

Республикæйы боны цытæн æфсæддон парад уагъд æрцыд нæ горæты Театралон фæзуаты. Ардæм æрбацыдысты бæстæйы къухдариуæгад Президент Бибылты Анатолийы сæргълæудæй æмæ бæрæгбонмæ æрцæуæг уазджытæ РЦИ-Аланийы делегаци республикæйы Сæргълæууæг Битарты Вячеславы сæргълæудæй, Республикæ Абхазæй президенты Администрацийы къухдариуæггæнæджы хæдивæг Лушба Адгуры сæргълæудæй, Уæрæсейы Федерацийы Сириаг Арабаг Республи-кæйы Æххæстбарджын минæвар, Сирийы президент Башар Аль-Асады сæрмагонд минæвар Риад Хаддад, Республикæ Хуссар Ирыстоны Уæрæсейы Федерацийы президенты хъуыддæгты рæстæгмæ æххæстбарджын Алексей Журов, Приднестроваг Молдаваг Республикæйы Хицауады Сæрдары хæдивæг Алексей Цуркан, Кæсæг-Балхъарты Республикæйы Хицауады Сæрдары хæдивæг Мурат Карданов, Сомихстоны Республикæйы Уырыссаг Чырыстон Аргъуаны амонæг, Дзæуджыхъæуккаг æмæ Алайнаг Архиепископ Фыд Леонид æмæ æндæртæ.

Æфсæддон парадыл командæгæнæг, РХИ-йы Гарзджын тыхты Генералон штабы хистæр инæлар-майор Виктор Федоров Хъахъхъæнынады министр Гассеты Ибрагимæн фехъусын кодта, Хуссар Ирыстон расидыныл 28 азы сæххæсты бæрæгбоны цытæн Цхинвалы гарнизоны æфсæддон тыхтæ парады рацæуынмæ цæттæ кæй сты. Уый фæдыл Гассеты Ибрагим та фехъусын кодта бæстæйы Уæлдæр Сæйрагкомандæгæнæг Бибылты Анатолийæн.

Цытджын мадзалы раныхас кодта Республикæ Хуссар Ирыстоны Президент Бибылты Анатоли (Раныхас мыхуыр цæуы).

Алексей Журов йæ раныхасы Хуссар Ирыстоны Уæрæсейы минæварады номæй арфæ ракодта адæмæн нысаниуæгджын бæрæгбоны цытæн. Йæ цæст сын бауарзта æнтыстытæ æмæ рæзты фæндиæгтæ. Уый фæстæ бакаст, УФ-йы Президент Владимир Путин Бибылты Анатолийы номыл цы арфæйы фыстæг æрæрвыста, уый.

Сириаг уазæг Риад Хаддад дæр арфæйы ныхæстæ загъта Башар Асады номæй Хуссар Ирыстонæн. Уый, загъта, зæгъгæ, стыр райгондæй баззад, ацы бæрæгбонмæ хоныны аккаг æй кæй скодтой, уымæй. Сириаг адæмы, бæстæйы къухдариуæгады номæй ноджыдæр арфæ ракодта хуссарирыстойнаг адæмæн, ацы стыр нысаниуæгджын бæрæгбоны фæдыл. Мæнæн, зæгъгæ, æхсызгон у, ацы аив æмæ райдзаст бæрæгбоны бæстæйы къухдариуæгады сæрмагонд минæвары хуызы хайад кæй исын, уый. Ноджыдæр Хуссар Ирыстоны адæм æмæ къухдариуæгадæн йæ цæст бауарзта бæстæйы дарддæры æнтыстыты æмæ размæцыды фæндиæгтæ.

Республикæ Абхазы минæвар Лушба Адгур бакаст Абхазы президент Рауль Хаджимбайы арфæйы фыстæг æфсымæрон ирон адæмы номыл, паддзахадон бæрæгбоны цытæн. Ныфс бавæрдта, Абхазы къухдариуæгад нырæй фæстæмæ дæр æппæт хъарутæ кæй здахдзæн нæ адæмты хæрзæбонæн алы фадгуыты æнтыстджын æмгуыстадмæ.

Театралон фæзуаты Хуссар Ирыстон æмæ нæ бæстæйы дислокацигонд Уæрæсейы Федерацийы æфсæддон дæлхæйттæ сæххæст кодтой Республикæ Хуссар Ирыстон æмæ Уæрæсейы Федерацийы Паддзахадон гимнты зæлтæ.

Республикæ Хуссар Ирыстон расидыныл 28 азы сæххæсты цытæн бæрæгбонон æфсæддон парады цытджын трибунæйы рæзты цыдысты Хуссар Ирыстоны Хъахъхъæнынады æмæ Мидхъуыддæгты министрады дæлхæйттæ,  Паддзахадон æдасдзинады комитеты Арæнгæрон службæйы, Æмбæстагон хъахъхъæнынад, уæлвæткон уавæртæ æмæ æрдзон æнамонддзинæдтæ иуварс кæныны фæдыл министрады дæлхæйттæ, Хуссар Ирыстоны Уæрæсейы Федерацийы Хъахъхъæнынады министрады 4-æм æфсæддон базæйы службæгæнджытæ, Хуссар Ирыстоны Хъахъхъæнынады æмæ Мидхъуыддæгты министрадты сылгоймаг-службæгæнджытæ, РХИ-йы Хъахъхъæнынады министрады кадетон скъолайы курсанттæ.

Банысан кæнын хъæуы уый, æмæ ацы бæрæгбон горæт-хъайтар Цхинвалы нысан кæй цæуы ивгъуыд æнусы 90-æм азты æмбисæй фæстæмæ. Уæд дзы хайад истой Сæрмагонд нысаниуæджы ротæтæ, Артиллерион дивизион, Хъахъхъæнынады министрады развæдсгарæн батальоны службæгæнджытæ, Милицийы сæрмагонд нысаниуæджы къорд æмæ Цæгат Ирыстонæй Фидауынгæнæг тыхты мотоæхсæг батальоны службæгæнджытæ. Ацы цытджын мадзал Театралон фæзуаты уагъд кæй цæуы, уый символикон уымæн у, æмæ ацы фæзуаты æвзонг республикæйыл æнувыддзинады ард фыццаг хатт бахордтой нæ Фыдыбæстæйы хъахъхъæнджытæ.

Уæды хæдхъахъхъæнынады къордты æфсæддонтæ бахъахъхъæдтой бæстæйы суверенитет æмæ территориалон æнæхъæндзинад. Ныры фыдыбæстæйы хъахъхъæнджытæ та кад æмæ намысимæ дарддæр кæнынц хисдæр фæлтæры æфсæддон традицитæ. Хуссар Ирыстоны тыхон структурæтæ хъахъхъæнынц куыд мидæггагон, афтæ æддагон æдасдзинад. Æппæт хæстон æмæ æндæр хæстæ та биноныг цæуынц Хуссар Ирыстоны уæрæсейаг æфсады контингентимæ иумæ.

Бæрæгбоны тыххæй сæ арфæтæ, сæ фæндиæгтæ загътой:

Республикæ Цæгат Ирыстон – Аланийы сæргълæууæг Битарты Вячеслав:

– Ирыстоны хуссар хайы абон стыр бæрæгбон ис. Уыцы бæрæгбон махæн иумиаг бæрæгбон у. 28 азы размæ Республикæ Хуссар Ирыстон расидыны бон æмæ уый фæстæ Уæрæсейы Федераци Хуссар Ирыстоны Паддзахадон хæдбардзинад кæй банымадта, уый адарддæр  æндæр бæстæты ‘рдыгæй дæр. Ныр мах æвдисæн стæм, куыд рæзы æмæ фидар кæны республикæ дунейы – уый æхсызгон у алкæмæн дæр. Хуссар Ирыстоны ацы стыр бæрæгбон мæ не ‘фсымæртæн арфæ кæнынмæ æрцыдыстæм мах дæр – Цæгат Ирыстоны делегаци.

Хуссар Ирыстоны нæ хотæ æмæ æфсымæртæн мæ цæст уарзы, фыццаджыдæр, сабырад æмæ фидыдады фæндиæгтæ. Уымæн æмæ уый сæйраг у Ирыстонæн. Сабырад æмæ фидыдад куы уа Ирыстоны зæххыл, уæд дзы уыдзæн экономикон рæзт дæр. Уый бæрæг у хуссары дæр æмæ цæгаты дæр. Æмæ нын фæахъаз уыдзæн интеграцийы хуызы нæ ахастытæ аразынæн, кæцы активонæй бæрæг у фæстаг азты.

Мæ хуссайраг хотæ æмæ æфсымæртæн ноджыдæр ацы стыр бæрæгбоны мæ цæст уарзы сабырад, фæрныгад æмæ æгæрон æнтыстытæ адæм æмæ бæстæйы хæрзæбонæн.

Владикавказаг æмæ Алайнаг Архиепископ фыд Леонид:

– Фыццаджыдæр, æвзонг республикæйы номыл цы арфæйы ныхæстæ загъд æрцыдысты ацы нысаниуæгджын бон, уыдон сты раппæлыны аккаг. Хуссар Ирыстон-Аланийы цæрджытæн, мæ чырыстон хотæ æмæ æфсымæртæн мæ зæрдæ зæгъы сабырад, æнæниздзинад æмæ монон сæрибардзинад. Уадз, Хуссар Ирыстоны фæрныг зæххыл макуыуал ныккæлæт туг, уадз, æрмæстдæр дзы хъуысæт сабиты цинæйдзаг æмæ хъæлдзæг худт. Абон адæм афтæ худæндзаст æмæ райгонд кæй сты, уый мæнæн тынг æхсызгон у. Æхсызгон ма мын у уый дæр, æмæ горæт бонæй бонмæ кæй ивы, кæй хуыздæр кæны, фидар кæны. Стыр æнтыстытæ ноджыдæр – хæдбар Хуссар Ирыстонæн!

Къæбулты Маринæ