Абон йæ дæсныйад хъæугæ кæмæн у, уыцы специалисты тыххæй уыдзæн дарддæр ме ’рмæг.
Цхуырбаты Инал цалдæр азы кусы программистæй. Ацы професси домы бирæ хъару æмæ зонындзинæдтæ. Æрыгон программист зæгъы: «Программист хъуамæ уа алывæрсон адæймаг. Техникон æууæлтæй уæлдай ма зонын хъæуы бирæ информаци, цæмæй кæронбæттæны продукт уа æххæст цæттæ. Нæ профессийы ногдзинæдтæ бирæ ис. Нрытæккæ зæххы къорийыл цæрæг адæмы 90 проценты пайда кæнынц интернетæй. Программист фыццаджыдæр хъуамæ зона хъуыды кæнын, стæй бæстон. Зона интернет цы хæстæ дæтта, уыдон адих кæнын. Уыдон та цъус не сты — дизайн, ног бакуысттæ, графикæ, хъомыс, ног уæлæфтауæнтæ æмæ функцитæ. Куыд зонæм, афтæмæй интернетæн ис æгæрон гæнæнтæ. Уымæн ахæм стыр тынг аргъ кæнынц д It къабазы кусынмæ чи рæхсы, уыцы специалисттæн. Уæлдайдæр та экономикæйы къабазы кусын чи рæхсы, уыдонæн. Ахæмтæ ныртæккæ тынг хъæугæ сты. Агурынц сæ куыстуæттæ, цæмæй сын сæ куыст фæткмæ æркæной. Ацы куыстытæ бакæнынæн ис дистанцион æгъдауæй. Бад дæ хæдзары æмæ интернеты руаджы дæ куыст кæн. Фæлæ бынаты фæткмæ гæсгæ кусын кæм домынц, ахæм куыстуæттæ дæр ис. Ома, ног программæ саразын, хызæг баивын, архайд сног кæнын. Уый тыххæй, дам, кусæг бынаты хъуамæ бада. Ахæм хъуыдыйыл хæст фылдæр сты паддзахадон уагдæтты разамонджытæ. Фæлæ коммерцион куыстуæттимæ бадзырдтæ аразыны рæстæджы ахæм нюанстыл не ’мбæлы программист. Уыдон фадат дæттынц дунейы кæцыфæнды къуымæй дæр фæсаууонмæ кусынæн. Æнтыстджын архайдæн та хъæуы ноутбук æмæ интернеты тыгъдадмæ рацæуыны фадат».
Æвзонг программист ма зæгъы, фæсарæйнаг бæстæтæ Уæрæсейы Федерацийæн фæстаг дыууæ аз цы санкцитæ расидтысты, уый аххосæй интернеттыгъдады программисты гæнæнтæ кæй фæкъаддæр сты. Уый тыххæй бахъæуы цавæрдæр ногдзинæдтыл бакусын. Дæ проекттæ бавдис æмæ сын кæд аккаг аргъгæнæг уа, уæд æнæмæнг æнтыстджын суæвæн ис интернеты.
Цхуырбаты Инал куыд зæгъы, афтæмæй ныртæккæ кусы сайт «Трек»-имæ. Уыдон та кусынц Цæгат Кавказы туристон агентадтимæ. «Арæх бынæттон цæрджы-тæн сæ бон цымыдисаг фæлладуадзæн бынат ссарын нæ вæййы. Сайт „Трек“-мæ бахизгæйæ турист фендзæнис хуыздæр туристон фирмæтæ. Кæд æмæ искæй сæрмагондæй историон цыртдзæвæнтæ цымыдис кæны уæд уыцы сайтыл базонгæ уыдзысты сæ равзæрды историимæ. Ацы проектты кусын дыууæ афæдзы бæрц».
Программированийы сусæгдзинæдтæ базонын у алкæй бон дæр. Нæ республикæйы ис цалдæр бынат ацы къабазы рæзынæн, суанг скъолайы ахуыргæнгæйæ дæр. Зæгъæм нæ горæты ис программированийы курсытæ. Уым æвзонг фæлтæры бæстонæй зонгæ кæнынц дæсныйадимæ. Цæгат Ирыстон-Аланийы республикæйы Хæххонметалургон институты дæр ис программированиейы хайад. Уырдæм цæуынц ахуыр кæнынмæ Хуссар Ирыстоны рауагъдонтæ дæр. Институты æнцон ахуыр кæнын нæу, суанг ма уый размæ курсытæ чи рацыдис, уыдонæн дæр. Институтмæ бацæуыны тыххæй радтын хъæуы æртæ фæлварæны: математикæ, уырыссаг æвзаг æмæ информатикæ. Ахуыры æмгъуыд у цыппар азы, уый фæстæ та иу афæдз вæййы практикæ. Афтæмæй студенттæ ахуыркæнгæйæ ссарынц куыст дæр.
Ныртæккæ алы компани, алы куыстуаты дæр хъæуынц It специалисттæ. Уыдонæй аразгæ у фидæн. Уыдон руаджы снысан кæнынц экономикæйы райрæзты æууæлтæ æмæ технологитæ.
УАЗÆГТЫ Марфа
