Фыццаг хатт Хуссар Ирыстонмæ дыууæ боны æмгъуыдмæ кусæгон балцы æрцыдис Уæрæсейы Федерацийы Æнæниздзинад хъахъхъæныны министр Михаил Альберты фырт Мурашко. Уый Цхинвалмæ æрцыдис РХИ-йы Æнæниздзинад хъахъхъæныны министры фæхуындмæ гæсгæ.
15-æм сентябры уæрæсейаг делегацийыл хуссарирыстойнаг-уæрæсейаг арæныл цытджын æгъдауæй сæмбæлдысты нæ республикæйы Хицауады Сæрдары хæдивæг Джиоты Алан, РХИ-йы Æнæниздзинад хъахъхъæныны министр Джыгкайты Томас, Хуссар Ирыстоны Уæрæсейы Федерацийы æххæстбарджын минæвар Марат Кулахметов æмæ Дзауы районы администрацийы сæргълæууæг Тыбылты Вандæ йæ хæдивджытимæ.
Цытджын уазджыты ирон æгъдаумæ гæсгæ æртæ уæливых æмæ дзаггарзимæ суазæг кодтой Ручъы рæсугъд комы, афтæ ма сын сæххæст кодтой цалдæр ирон зарæджы.
***
16-æм сентябры райсомæй Республикæ Хуссар Ирыстоны Президент Гаглойты Аланæн фембæлд уыдис Михаил Мурашкоимæ. Йæ раныхасы бæстæйы сæргълæууæг банысан кодта Уæрæсейы Федерацийы иузæрдион æмæ æдзухон æххуыс Хуссар Ирыстонæн. Гаглойты Алан ма сæрмагондæй арфæ ракодта Михаил Мурашкойæн, Хуссар Ирыстоны II Æхсæнадæмон медицинон конференцийы хайадисæг кæй у, уый сæраппонд.
«Абон махæн нæ Республикон бирæпрофилон центры Уæрæсейы Федерацийы æххуысы руаджы арæзт æрцыдысты æппæт уавæртæ дæр. Ис нын ацы къабазы скъуыддзаггæнинаг фарстатæ дæр. Уырны мæ, сымах сæрмагондæй æппæтдæр куы фенат, уæд махæн фæуыдзæн рæстæг, цæмæй сыл æруынаффæ кæнæм æмæ ссарæм иумæйаг æвзаг», – банысан кодта Гаглойты Алан. Уый ма Михаил Мурашкойы зæрдыл æрлæууын кодта, Хуссар Ирыстонæн медицинæйы къабазы специалисттæ цæттæ кæныны хъуыддаджы дæр стыр æххуыс кæй у Уæрæсейы Федераци.
«Ацы хъуыддаджы дæр ис къорд фарстайы, кæцытыл æнæмæнгдæр хъæуы æруынаффæ кæнын. Хуссар Ирыстон, стæй ирон адæм рагæй фæстæмæ дæр сты уазæгуарзаг æмæ дын ноджыдæр зæгъын æгас цу. Алыхатт дæр нын æхсызгон у дæ фенд», – йæ ныхасы кæрон банысан кодта бæстæйы сæргълæууæг.
Михаил Мурашко дæр йæ рады арфæ ракодта Президент Гаглойты Аланæн æмæ йын бузныг загъта, афтæ хорз æй кæй суазæг кодтой æмæ йыл зæрдиагæй кæй сæмбæлдысты Хуссар Ирыстоны зæххыл, уый тыххæй.
«Стыр бузныг, Алан Эдуарды фырт. Стыр æхсызгонæй сæмбæлдтæн, Хуссар Ирыстонмæ мæ кæй фæхуыдтат, уыцы хъуыддагыл. Абон ам цы конференци уыдзæн, уым мемæ хайад райсдзысты Уæрæсейы размæдзыд медицинон уагдæтты хуыздæр специалисттæ – профессортæ, академиктæ, афтæ ма уым хайад исынц æввахс регионты специалисттæ. Конференцийы архайынц æхсæрдæс федералон уагдоны специалисттæ, уыдон ма уымæй уæлдай басгардзысты, ныртæккæ хос чи кæны, уыцы пациентты дæр. Конференцийы фæстиуджытæм гæсгæ ма нæ фæндид æруынаффæ кæнын дарддæры райрæзты фарстытыл, афтæ ма нæ ныфс ис, дарддæр дæр кæй æмгуыстад кæндзыстæм», – банысан кодта Михаил Мурашко.
***
Уæрæсейы Федерацийæ уазджытæ дарддæр бабæрæг кодтой Республикон бирæпрофилон медицинон центр. Семæ ма уыд Æнæниздзинад хъахъхъæныны министр Джыгкайты Томас. Уый сын равдыста рынчындоны медико-санитарон, сæрмагонд æмæ технологон медицинон уавæртæ. Хирургион корпусы цы фадæттæ ис, цæмæй экстремалон цауты рæстæджы рынчынтæ æрвыст ма цæуой республикæйæн æддæмæ, дзырдтой уыцы фарстыл.
Уазджытæ бахызтысты палатæтæм дæр æмæ сæрмагондæй аныхас кодтой рынчынтимæ. Фарстой сæ, куыд райгонд сты медицинон кусджыты лæггæдтæй æмæ сын медицинон препараттæ афоныл вæййы, æви нæ. Уазджытæ сæрмагондæй бацыдысты алы хайадмæ дæр, М. Мурашкойы æххуысгæнæг фарстатæ лæвæрдта хайадты сæргълæуджытæм, цы медицинон ифтонгадтæй цух сты, уыдон йæхимæ нысан кодта. Хайадты цы цухдзинæдтæ уыд, уыдон дæр бацамыдта æмæ лæмбынæг байхъуыста дохтырты фæндиæгтæм.
Ахсджиаг конференци
Хуссар Ирыстоны къуырисæры байгом II-æм Æхсæнадæмон медицинон конференци «Практические аспекты развития здравоохранения», ахæм номимæ паддзахадон университеты конференц-залы. Конференцийы куысты хайад райстой куыд нæ республикæ, афтæ Уæрæсейы Федераци, Абхазы республикæ, Приднестровье, Кæсæг-Балхъар, Краснодар æмæ Цæгат Ирыстон-Аланийы медицинон уагдæтты разамонджытæ æмæ минæвæрттæ.
Конференцийы райдиан уазджытæн уæрæх экраныл равдыстой Хуссар Ирыстоны медицинæ 2008-æм азы августы хæсты рæстæджы æмæ уый фæстæ республикæ куыд æндидзыдта, уыцы æрмæг.
Пленарон рабадты Республикæ Хуссар Ирыстоны Президент Гаглойты Алан байгом кодта конференци. Уый, сæйраджыдæр, банысан кодта ацы медицинон конференцийы ахсджиагдзинад.
«Нæ республикæ фыццаг хатт уадзы уæрæхмасштабон æхсæнадæмон конференци. Ацы конференци стыр ахъаз у æнæниздзинад хъахъхъæныны къабазы сæвзæргæ ахсджиаг фарстатыл æруынаффæ кæнынæн. Афтæ æххуыс у, бæстæты медицинон кусджыты æмгуыстад сфидардæр кæнынæн æмæ æнæниздзинад хъахъхъæныны системæйæн ног фадæттæ саразынæн. Медицинон кусджытæ дзы сæхицæн райсдзысты хъæуæг зонындзинæдтæ, уымæ гæсгæ æз стыр æхсызгонæй арфæ кæнын æппæт хайадисджытæн дæр Уæрæсейы Федерацийы Æнæниздзинад хъахъхъæныны министр Михаил Мурашкойы сæргълæудæй. Уадз, ацы конференци фидар бындур æрæвæрæд дарддæры æмгуыстад æмæ бастдзинæдтæн нæ бæстæты медицинæйы къабазы. Бузныг æппæт хайадисджытæн дæр, мæ зæрдæ уын зæгъы æнтыстджын куыст», – банысан кодта бæстæйы сæргълæууæг.
Конференцийы хайадисджытæм арфæйы ныхæстимæ рахызт УФ-йы Æнæниздзинад хъахъхъæныны министр Михаил Мурашко дæр. Уый банысан кодта, зæгъгæ, йын стыр æхсызгон у, Хуссар Ирыстоны кæй ис кусæгон балцы æмæ хайад кæй исы конференцийы.
«Зонын ирон адæмы тых æмæ истори. Ирон адæм нырма дæр хизынц зындзинæдты сæрты, уыимæ иумæ цæуынц сæ рагон бæллицмæ. Мах абон куыд федтам, афтæмæй горæт йæ хуыз скалдта, уыимæ медицинон уагдæттæ дæр бирæ фæхуыздæр сты, цæуынц ифтонг, фæлæ уыимæ иумæ абон медицинæ размæ цæуы æмæ йын ис ног домындзинæдтæ. Хуссар Ирыстоны адæм цы зындзинæдтæ бавзæрстой, уыдон ныууагътой æппæрццаг фæд æмæ уый фæстæ, кæй зæгъын æй хъæуы, Хуссар Ирыстоны паддзахад æмæ Уæрæсейы Федерацийы сæйраг фарста у -æнæниздзинад хъахъхъæныны райрæзт æмæ цæрджыты æнæниздзинад сфидар кæнын», – банысан кодта уæрæсейаг министр.
Дарддæр æрдзырдта Советон дуджы æмæ ныры рæстæджы æнæниздзинад хъахъæныны системæтыл. Ацы аз фыдыбæстæйон медицинæйы бындурæвæрæг Николай Семашкойыл 150 азы кæй æххæст кæны, уый цытæн октябры мæйы Мæскуыйы хъуамæ ауадзой III-æм Национ конгресс æмæ дзы хайад райсыны тыххæй фæхуыдта йæ коллегæты. Михаил Мурашко ма банысан кодта, коронавирусы пандемийы рæстæджы нысанмæздæхтæй куыд тох кодтой æмæ цавæр зындзинæдтæ æвзæрстой, ныр та цæф хæстонтæн медицинон æххуыстæ кæй кæнынц, уый.
Хуссар Ирыстоны Æнæниздзинад хъахъхъæныны министр Джыгкайты Томас банысан кодта, зæгъгæ, ацы конференци у ахсджиаг æмæ фæахъаз уыдзæн медицинæйы къабазы æхсæнадæмон æмгуыстад сфидар кæнынæн.
Конференцийы ма раныхас кодтой Абхазы республикæйы Æнæниздзинад хъахъхъæныны министр Эдуард Бутба, Приднестроваг Молдаваг республикæйы Æнæниздзинад хъахъхъæныны министры хæдивæг Лия Пионтковская æмæ Цæгат Ирыстон-Аланийы паддзахадон медицинон академийы проректор А. Гурина. Гурина конференцийы бакаст Цæгат Ирыстоны паддзахадон медицинон академийы ректор Олег Ремизовы фыстæг. Ремизов стыр нысаниуæг дæтты конференцийæн.
Медицинон конференци уыцы бон адарддæр ис æндæр æмæ æндæр лекцитæй æмæ тымбыл фынгæй æмæ уын уый тыххæй фехъусын кæндзыстæм нæ радон номыры.
ЦХУЫРБАТЫ Ларисæ