Бирӕ фембӕлдтытӕ ахсджиаг хъуыддӕгты фӕдыл
Владимир Путин кæдфæнды дæр æнæвдæлон у, йæ хъуыддæгтæ нæдæр къаддæр кæнынц, нæдæр – хуымæтæгдæр. Ахæм уæззау куысты графикы ма уæддæр разыны æмæ нын уæд сæрибар рæстæг бынтондӕр куы нӕ вӕййы, йæ фæллад дæр не суадзы. 12 сентябрь уыдис растдæр ахæм бон.
Райдианы Путин фембӕлд ӕдасдзинады хаххыл БРИКС-ы минӕвӕртты къордимӕ. УФ-йы президент куыд фехъусын кодта, афтӕмӕй ныридӕгӕн 34 бӕстӕйы фӕнды БРИКС-имӕ ӕмархайд кӕнын.
«Махӕн приоритетон у глобалон ӕдасдзинад ӕмӕ стабилондзинад. Уӕлдай хъусдард нӕ хъӕуы аздахын финансон терроризммӕ, гӕртамхортӕм, ӕнӕзакъонӕй цы фӕллӕйттӕ ӕмӕ активтӕ ӕрцыдысты давд, уыдон фӕстӕмӕ раздахынмӕ. БРИКС-мӕ ис фаг фӕлтӕрддзинад, цӕмӕй аккаг ныхкъуырд радта терроризмӕн ӕмӕ экстремизмӕн, наркотиктӕ ӕмӕ ӕхсӕнгарзы ӕнӕзакъонон ӕрзылдӕн, транснационалон ӕвзӕрдзинадӕн, ӕнӕлегалон миграцийӕн. Иттӕг хорз у, кӕй ӕрцыд арӕзт сӕрмагонд электрон реестр, кӕцыйы фӕрцы БРИКС-ы уӕнгтӕ сӕ кӕрӕдзийӕн рӕстӕгыл хъусын кӕнынц копьютерон атакӕты ӕмӕ ӕндӕр ахӕм инциденты тыххæй. Ӕдасдзинады фӕдыл БРИКС цы куыст кӕны, уый ӕнӕмӕнгхъӕуӕг у ныры дуджы. Ныгуылӕн бӕс-тӕтӕ БРИКС-ы нымайынц се знагыл, сӕ гегемони фесафынӕй тӕрсынц, ӕмӕ сӕ фӕнды йӕ ныппырх кӕнын. Мах хъуамӕ архайӕм ӕдӕрсгӕ, ма сайды кӕнӕм провокацитӕн», – банысан кодта Путин.
Путин ма хицӕнӕй фембӕлд Инди, Китай ӕмӕ Ираны минӕвӕрттимӕ дӕр ӕмӕ аскъуыддзаг кодтой дзӕвгар вазыгджын стратегион фарстатӕ.
УФ-йы президент ма радта Украинӕйы цӕуӕг сӕрмагонд ӕфсӕддон операцийы фæдыл интервью:
«АИШ ӕмӕ Евроцӕдис украинаг гарзджын тыхтӕн се ‘хсӕнгарзӕй Уӕрӕсейы территоримӕ цӕвыны бар куы радтой, уӕд уый бамбарӕн ис ӕрмӕстдӕр афтӕ – НАТО хӕцы Уӕрӕсеимӕ. Ацы хъуыддаг украинаг конфликт бындуронӕй фӕивдзӕн ӕмӕ уӕд мах дӕр бахъӕудзӕн ӕмбӕлон мадзӕлттӕ райсын сæдæгай километртæм цæвæг. Бӕрзонд-технологон ӕхсӕнгарзыл дзырд куы цӕуа, уӕд ӕй алчидӕр ӕмбары, украинаг ӕфсӕддонтӕн ахӕм ӕхсӕнгарзимӕ архайыны фӕрӕзтӕ кӕй нӕй. Уыцы ӕхсӕнгарзӕй фехсыны онг ӕнӕмӕнг архайдзысты ныгуылӕн бӕстӕты ӕфсӕддонтӕ, ракетон системӕтӕ та информаци исдзысты АИШ ӕмӕ Евроцӕдисы спутниктӕй. Аф-тӕ куы нӕ уа, уӕд уыцы нырыккон ракетӕтӕй хуымӕтӕджы украинаг хӕстонтӕ ницы спайда кӕндзысты», – загъта Путин.
Уый фӕстӕ Путин фæуазæг Санкт-Петербургы цæуæг Культурæты иудзинады форуммæ æмæ хайад райста дискусситы. Мадзӕлттӕ уагъд цыдысты Казайнаг стыр аргъуаны ӕмӕ Эрмитажы сӕйраг штабы. Путин йӕ раныхасы банысан кодта, зӕгъгӕ ныры дуджы культурӕйы къабазы ӕгӕр политизаци кӕнынц, кӕцыдӕр бӕстӕтӕ дзы пайда кӕнын райдыдтой сӕ геополитикон интригӕты.
«Мах Уӕрӕсейы нӕ культурон ӕргъӕдтӕн кад кӕнӕм ӕмӕ сӕ хъахъхъӕнӕм. Стӕй ма нӕ хъуыдыйыл хӕст чи у, уыдоны фарсмӕ дӕр балӕууӕм. Алы адӕмыхаттӕн дӕр йӕ мадӕлон ӕвзагыл дзурыны бар ис, хъахъхъӕнын сӕ традицитӕ, фыдӕлтӕй сын цы уырнынад баззад, уый. Мах никуы сразы уыдзыстӕм ууыл, ӕмӕ кӕцыдӕр бӕстӕтӕ иннӕты культурӕ дӕлдзиныг кӕной, кӕнӕ та йӕ мауал уадзой парахат кӕнын. Культурӕ рагӕй фӕстӕмӕ дзыллӕтӕн у сабырдзинады хос. Фӕлӕ ныры дуджы кӕцыдӕр политикты уагахастмӕ нӕ хъус куы ӕрдарӕм, уӕд бафиппайдзыстӕм, уыдонӕн кӕй нал ис намыс, сӕ цӕсгӕмттыл сӕ къух кӕй систой, элементарон фӕтк ӕмӕ ӕгъдау кӕй ферох кодтой. Ныридӕгӕн ныгуылӕны элитӕтӕ цы ӕргъӕдтӕ размӕ кӕнынц, уыдон культурӕмӕ, динмӕ, ӕгъдаумӕ ницы бар дарынц. Мӕн фидарӕй уырны, бӕстӕты ӕмӕ дзыллӕты фылдӕр хайӕн ацы зианхӕссӕг ныгуылӕн ӕргъӕдтӕ ӕцӕгӕлон кӕй сты. Дзыллӕтӕн рухс фидӕн уыдзӕн уӕд, кӕд ӕмӕ кӕрӕдзийӕн тӕригъӕд кӕной, тыхст рӕстӕджы ӕххуысмӕ цӕуой, рӕстдзинадыл хӕст уой, уа сӕм патриотизм, уарзой сӕ Фыдыбӕстӕ, уа сын бинонтӕ», – загъта Путин.
Путины ныхӕстимӕ сразы ис БРИКС-ы координацион советы сӕрдар Висенте Барриентос, загъта, зӕгъгӕ, англо-саксты ӕмӕ, иумийагӕй, ныгуылӕн культурӕйы кӕрон ӕрхӕццӕ.
«Владимир Путины раныхасӕй бӕрӕг у, Уӕрӕсеимӕ хӕцын кӕй нӕ хъӕуы, фӕлӕ кæй хъæуы хӕларадон ахастытӕ аразын. Махӕн нырма бирӕ бæстон кæнинаг хъуыддӕгтӕ ис иумӕ – Латинаг Америкӕйы бӕстӕтӕн БРИКС-ы сконды уӕвгӕйӕ егъау потенциал ис», – банысан кодта Барриентос.
Уӕрӕсейаг паддзахадон ӕмӕ политикон архайӕг Михаил Швыдкой та Путины раныхасы акцент сӕвӕрдта культурон суверенитетыл.
«Бӕстӕтӕн хъуамӕ уа ӕмхуызон бартӕ ӕмӕ иу бӕстӕ иннӕйы ма хъуамӕ дӕлдзиныг кӕна, конструктивон диалог аразыны хъуыддаг мачи хъуамӕ къуылымпы кӕна. Растдӕр ахӕм принциптыл кусын домы Уӕрӕсе. Ис нӕм ахӕм зарджыты конкурс, «Интервидение» зӕгъгӕ, кӕцыйы схонӕн ис хӕдбар культурон мадзал. Йӕ бындур лӕууы национ традицитыл, фольклорыл. Ацы конкурсы фехъусӕн вӕййы алыгъуызон рӕсугъд зарджытӕ. Нӕ эст-радӕйы кӕй фехъусӕм, уыдонӕй бирӕ гъӕдджындӕр вæййынц. Тагъд рӕстӕджы та уагъд ӕрцӕудзӕн ацы конкурс ӕмӕ дзы хайад райсдзысты 20 бӕстӕйӕ фылдӕр, се ‘хсӕн ӕнӕмӕнг уыдзысты Бразили, Китай, Инди ӕмӕ ӕндӕртӕ».
Ахӕм бон ма Путин ӕфсӕддон госпиталмӕ бацӕуыны рӕстӕг дӕр ссардта. Ам фембӕлд дӕлбулкъон Александр Даниловимӕ. Уый фесгуыхт Курскы областы контртеррористон операци уадзыны рӕстӕджы – мӕлӕтӕй фервӕзын кодта 30 хӕстоны.
Знагимӕ карз тохты Даниловы дӕлхай скуынӕг кодта знаджы аст диверсион-развӕдсгарӕг къорды ӕмӕ 23 та ӕфсӕддон згъӕрварс автотранспорты. Фӕлӕ уӕдмӕ бахаудтой ӕрхъулайы, нал сӕм уыд фаг нӕмгуытӕ дӕр. Ныфсджын командиры архайды фӕрцы хӕстонтӕ иууылдӕр раирвӕзтысты ӕрхъулайӕ. Данилов йӕхӕдӕг баззад знаджы ныхмӕ иунӕгӕй, украинаг фашисттӕ йӕм ӕрбацыдысты хӕрзӕввахс. Йӕ ныхӕстӕм гӕсгӕ украинаг дронтыл ифтонг уыдысты динамиктæй æмæ сидтысты уӕрӕсейаг хӕстонтӕм, цӕмӕй сӕхи уацары радтой. Данилов рацийӕ ӕрдомдта артиллери ӕмӕ сын радта йӕхи координаттӕ. Ӕхсарджын хӕстон удӕгасӕй баззад, ӕрмӕст райста контузи.
Путин Даниловӕн фехъусын кодта, зӕгъгӕ Хъахъхъӕнынады министрады разамынады фӕндонмӕ гӕсгӕ дæ хъуамӕ схорзӕхджын кӕной Уӕрӕсейы хъайтары номӕй. «Ӕввахс рӕстӕджы уыцы Указыл мӕ къух ӕрфысдзынӕн».
ДЖИОТЫ Алыксандр
