РУХС ФЕНДЗЫСТЫ «ИРОН ДРАМАТУРГИЙЫ АНТОЛОГИТÆ»

2024 азы планмæ гæсгæ «Ирон драматургийы антологиты» дыккаг æмæ æртыккаг томтæ мыхуыры рацæудзысты.
«Антологи»-йы фыццаг том рухс федта 2023 азы, бакуыста йыл рауагъдад «Харизма»-йы стыр командæ бындурæвæрæг Аида Харкиладзейы сæргълæудæй. Дыккаг æмæ æртыккаг томты ис 1871 азæй 1958 азты онг 13 авторы уацмыстæ. Се ‘хсæн Коцойты Арсен, Малиты Георги, Туаты Дауыт, Мамсыраты Дæбе. Æвдыст сæ цæуы национ драматургийы бирæхуызджын палитрæ. Ацы томтæм бахаст хицæн уацмыстæ фæстаг хатт мыхуыр уыдысты тынг раджы, уымæ гæсгæ сæ агурынц библиотекæты æмæ музейон фондты. «Махæн нысаниуæгджын у уый, æмæ ацы куысты процессы кæй ис æрмæст æнæмæнгхъæуæг литературæ нæ, фæлæ ма уникалон чингуытæ дæр, зонгæ кæнæм йæ хъуыддагыл æнувыд æмæ рауагъд бацæттæ кæнынмæ чи тырны, ахæм адæймæгтимæ. «Антологи» у чиныгкæсджыты бирæ категоритæн: студенттæ, ахуыргæнджытæ, лингвисттæ, литературæзонджытæ, режиссертæ, актертæн ахсджиаг чи у, ахæм проект.
Республикæйы театралон архайджыты цæдисы сæрдары хæдивæг, проекты автор Пагæты Фатимæимæ мах ссардтам бирæ æрмæджытæ ирон литературæйы музейы æмæ ЦИПУ-йы библиотекæйы фондты. Уыдон сты Хъуысаты Дмитри (Хъасболат) æмæ Тотраты Бесайы пьесæтæ. Ацы уацмыстæ мыхуыр æрцыдысты 20-æм æнусы 20-30 азты. Уый стыр æнтыст у. Ссаргæ пьесæтæ фыст сты латиницæйыл, фæлæ «Антологи»-йæн сæ цæттæ кæнæм кириллицæйы варианты. Редакци æрцæудзысты ирон æвзаджы нырыккон уагæвæрдтæм гæсгæ. «Антологи»-йыл кусы æмхъуыдыгæнджыты стыр командæ. Драматургты портреттæ бацæттæ кодта Цæгат Ирыстоны сгуыхт нывгæнæг Саулаты Сергей. Бацæуæн уац ныффыста Абайты Васойы номыл Гуманитарон æмæ социалон иртасæнты Цæгат Ирыстоны институты фольклор æмæ литературæйы хайады зонадон кусæг Хъуысаты Залинæ. «Ирон драматургийы антологи»-йы 2 æмæ 3 томтæ рацæудзысты 2 мин экземплярæй æмæ сæ лæварæй дæтдзысты библиотекæтæ, театртæ, уæлдæр ахуырадон уагдæттæ, зонад-иртасæн институттæн æмæ сфæлдыстадон лабораторитæн. Чингуыты нымæцон верситæ æнцонвадат уыдзысты цалдæр интернет-ресурсы. Проект реализаци цæуы культурон инициативæты президенты фонды æххуысы фæрцы.