Ныры дуджы фæсивæд цы професситæ æвзарынц, уыдонæн сæ фылдæр баст вæййынц нымæцон технологитимæ. Æниу нымæцон технологитæ ныртæккæ царды алы къабазы дæр хъæуынц. Уый æмбаргæйæ скъоладзаутæ сæхи уынынц информатикон тыгъдады. Информацион технологитимæ чи рæхсы, уымæн уæрæх фæндаг уыдзæн куысты карьерæйы. Ай-Ти къабазы ма ис хорз æфтиæгтæ бакусæн дæр, стæй нымад цæуы уый дæр æмæ ныртæккæ Ирыстоны ахæм специалисттæ бирæ нæма ис.
Фæлæ куыд рабæрæг, афтæмæй нæ фæсивæд канд информацион системæтæм не сты æмхиц. Бирæ рауагъдонты бафæндыд райсын кусæг дæсныйæдтæ. Æниу ахæм дæсныйæдтæ æдзухдæр хъуыдысты, фæлæ æрыгон фæлтæрмæ «модæйы» уыдысты юридикон æмæ экономикон факультеттæ. Рæстæджы цыдимæ сæхæдæг дæр æмæ сæ ныййарджытæ дæр бамбæрстой нæ республикæйы уыйбæрц юристтæ æмæ экономисттæ кæй нæ хъæуы. Бирæ-профилон колледжмæ тынгдæр райдыдтой цæуын. Зæгъæм, Сиукъаты Ирбег йæ фыдау хъуамæ суа æндадзæг (сварщик). Уый тыххæй колледжмæ ацыд фарастæм къласæй. «Æндадзджытæн ныртæккæ хорз фидынц, фæлæ цæмæй стыр æхцатæ бакусай, уый тыххæй хъæуы бирæ зонын. Мæнæн æфсæйнаг æндадзын мæ фыд дæр амыдта, фæлæ нырма афтæ хорз нæ зонын. Мæн фæнды теори сахуыр кæнын, стæй ацы дæсныйад куы сахуыр кæнон, уæд та мæ зæрды ис кафелæвæрæджы дæсныйад райсын дæр.
Колледжы разамынад куыд зæгъы, афтæмæй хорз рауагъдон йæхицæн кæдфæндыдæр ссары куыст. Ам ма чызджытæн ис ахæм дæсныйæдтæ райсæн, куыд повар-кондитер æмæ уæлæдарæс хуыйæджы професситæ. Уый тыххæй колледжы ис хуыйджыты цех нырыккон машинæтæ æмæ ахуырадон ифтонггæрзтимæ. Уалыты Маринæ ахуыр кæны ацы хайады дыккаг курсы. Йæ дæсныйад хорз базыдта. Ныридæгæн хуыйы дарæс йæ кæстæр хотæн. Сæрæй дæсныйадимæ зонгæ кодта йæ мады хойы æххуысæй. Чызджы фæнды фидæны хи ателье байгом кæнын.
Бирæпрофилон колледжы ма цæттæ кæнынц механизаторты, экскаваторыл куысджыты, дура-майджыты, электрикты, сантехниктæ æмæ программистты. Колледж фæуыны фæстæ уыдон араст вæййынц фæллойы фæн-дагыл æмæ зонындзинæдтæй раст куы спайда кæнынц, уæд æгуыст никуы баззайынц. Кæй бафæнды, уый та спайда кæны нæ республикæйы чысыл æмæ астæуккаг бизнесæн æххуысы фонды программæйæ. Афтæмæй фæсивæд байгом кæнынц сæхи бизнестæ æмæ æнтыстджынæй сæ цард адарддæр кæнынц.
2024-09-12
Previous Post: Сæ куыст – фосы æнæниздзинадыл аудын
Next Post: Арфæ уын кæнынц, дохтыртæ