Бæрнон æмæ ахсджиаг хæстæ лæууы педагогон конференци кæддæриддæр ахуырады кусджыты – ахуыргæнджыты раз. Ног ахуыры азы райдиан Дзауы районы ахуыры хайад, æппæт скъолаты педагогон коллективтимæ ауагъта ахуыргæнджыты конференци. Уым сæрмагондæй хайад райста Республикæ Хуссар Ирыстоны Ахуырад æмæ зонады министр Лолаты Аслан дæр.
Райдианы æппæт хайадисджытæ иу уысм æмырæй алæууынæй ссардтой Беслæны трагедийы амæттæгты рухс нæмттæ. Уый фæстæ районы педагогон коллектив æруынаффæ кодтой ахуырдзау фæсивæды ахуыр-хъомыладон куысты тыххæй.
Дзауы районы администрацийы ахуыры хайады гæс Джиоты Алексей йæ коллегæты рæгъмæ рахаста, ивгъуыд ахуыры азæн цы хатдзæгтæ сарæзта, уыдон, афтæ ма æрдзырдта ахуырады системæйы аскъуыддзаггæнинаг фарстытæ æмæ дарддæры плæнттыл.
Педагогон конференцийы ма ахуыргæнджытæ бакастысты докладтæ, зæгъæм, историйы уроктыл скъоладзау фæсивæды патриотикон хъомылады тыххæй, ног ахуырадон стандартмæ гæсгæ райдиан кълæсты ахуыр-хъомыладон куысты хæстæ æмæ хатдзæгты тыххæй æмæ æндæр ахæм темæтыл.
Конференцийы раныхас кодта Ахуырад æмæ зонады министр Лолаты Аслан дæр. Ног ахуыры азы райдианы тыххæй арфæты фæстæ министр æрдзырдта ахуырады системæйы ногдзинæдтыл, банысан кодта, зæгъгæ, районы æппæт скъолаты проблемæтимæ зонгæ кæй у, уый дæр.
Дзауы районы администрацийы сæргълæууæг Тыбылты Вандæ та йæ раныхасы баныфсæвæрдта, зæгъгæ, районы ахуырадон уагдæттæн баххуыс кæныны тыххæй сæ фарсмæ кæй балæудзæн.
Конференцийы фæлгæтты ахуыргæнджытæ Цхуырбаты Нодар, Гасситы Тинæ æмæ Гасситы Ильнæ хорзæхджын æрцыдысты ахуыры хайады кады грамотæтæй.
КОЦТЫ Еленæ
