Фæстаг азты нæ респубдликæйы фæзынд цалдæр мини-заводы. Уыдон архайынц цадæггай, фæлæ ныридæгæн æвдисынц хорз фæстиуджытæ. Æрæджы та æрбайгом ис дургуыстгæнæн завод ООО «Импульс-А».
Ахæм куыстуат æрбайгом кæнын стыр цау у Хуссар Ирыстонæн. Уымæн æмæ дургуыстгæнæн заводтæ цъус ис æгас Уæрæсейы дæр. Завод æппæт хъомысадæй нæма скуыста, фæлæ ныридæгæн куыстæй сифтонг кодта дыууадæс адæймаджы. Дарддæр хъавы йæ куыстуат рауæрæх кæнын æмæ уæд фылдæр адæмы райсдзæнис кусынмæ.
Завод хомаг исы нæхи æрдзы гуырæнтæй æмæ аразы дурæй алыгъуызон фигурæтæ, асинтæ.
Заводы директор Коцты Эльбрус куыд загъта, афтæмæй: «Куыстуаты продукци фыццаджыдæр, хъæуы нæхи, уымæн æмæ нæ республикæйы æппынæдзух цæуы арæзтæдтæ. Нырма кæд чысыл парти продукци уадзынц, уæддæр, фæстæдæр, цалдæр цехы куы скуса, уæд дзы уæйгæнæн уыдзæн суанг республикæйы фæлгæтты дæр. Хуссар Ирыстоны æрдз хъæздыг у гранитæй, чъырдурæй, æмæ минералон дæттæй. Уыцы хæрзиуджытæй, фыццаджыдæр, хъуамæ пайда кæной Ирыстоны адæм. Мах ныридæгæн бадзырдтæ сарæзтам Уæрæсейы Федерацийы цалдæр куыстуæттимæ дæр æмæ уыдонимæ дæр кæндзыстæм æмгуыст», – зæгъы заводы директор.
УАЗÆГТЫ Марфа
